“எரிபொருள் விலையை அதிகரித்தது எரிபொருள் கூட்டுத்தாபனம்.. அரசாங்கம் அல்ல..” பிரதி அமைச்சர் சதுரங்க

எரிபொருள் விலை திருத்தம் என்பது அரசாங்கத்தினால் எடுக்கப்பட்ட தீர்மானம் அல்ல என்றும், அது இலங்கை கனிப்பொருள் எண்ணெய் கூட்டுத்தாபனத்தினால் (CPC) சுயாதீனமாக எடுக்கப்பட்ட தீர்மானம் என்றும் சிரச தொலைக்காட்சியின் ‘சட்டன’ (Satana) நிகழ்ச்சியில் கலந்துகொண்டு உரையாற்றிய பிரதி அமைச்சர் சதுரங்க அபேசிங்க தெரிவித்தார்.

கடந்த காலங்களில் அமைச்சர்கள் அரச நிறுவனங்களின் தீர்மானங்களில் தன்னிச்சையாக தலையிட்டதாலேயே அந்த நிறுவனங்கள் செயலிழந்தன எனச் சுட்டிக்காட்டிய அவர், தற்போதைய அரசாங்கம் அத்தகைய தலையீடுகளைச் செய்யாது என வலியுறுத்தினார்.

கூட்டுத்தாபனத்தின் நடவடிக்கைகளை முன்னெடுப்பதற்காக நியமிக்கப்பட்டுள்ள அதிகாரிகள் மற்றும் பணிப்பாளர் சபையினாலேயே இந்தத் தீர்மானம் எடுக்கப்பட்டதாகவும், உலகச் சந்தையில் நிலவும் விலை மாற்றங்களுக்கு ஏற்ப உள்நாட்டு விலைகள் திருத்தப்படுவதாகவும் அவர் விளக்கினார்.

உலகச் சந்தையில் விலை திடீரென அதிகரித்தமையே இந்த விலை திருத்தத்திற்கு பிரதான காரணமாக அமைந்துள்ளது. எவ்வாறாயினும், எதிர்காலத்தில் உலகச் சந்தையில் விலை குறைந்தால் அதன் நன்மையை மக்களுக்கு வழங்க நடவடிக்கை எடுக்கப்படும் என்றும் பிரதி அமைச்சர் இங்கு குறிப்பிட்டார்.

எரிபொருள் விலை அதிகரிப்பினால் பாதிக்கப்படும் விவசாயம், மீன்பிடி மற்றும் உற்பத்தி ஏற்றுமதித் தொழில்கள் போன்ற முன்னுரிமைத் துறைகளுக்கு மானியங்களை வழங்கும் திட்டம் அரசாங்கத்திடம் உள்ளதாக அவர் வெளிப்படுத்தினார்.

இந்த மானியங்களை வழங்குவதற்காக வரவு செலவுத் திட்டத்தின் மூலம் இதுவரை நிதி ஒதுக்கீடு செய்யப்படவில்லை என்றாலும், ஏனைய தேவையற்ற செலவுகளைக் குறைப்பதன் மூலம் அதற்கான பணத்தைக் கண்டறிய உள்ளதாக அவர் கூறினார்.

நாட்டின் நிதி ஒழுக்கத்தைப் பேணுவதற்காக ஆரம்ப உபரியை (Primary Balance) நேர்மறை 2.3 மட்டத்தில் பேணுவதற்கு அரசாங்கம் கட்டுப்பட்டுள்ளதாகவும், அதற்கமைய செலவுகளை முகாமைத்துவம் செய்து மக்களுக்கு நிவாரணம் வழங்குவதே அரசாங்கத்தின் எதிர்பார்ப்பு என்றும் சதுரங்க அபேசிங்க மேலும் தெரிவித்தார்.