ஒரு கடும்போக்குவாத மதகுருவுக்குப் பதிலாக அதே போன்ற மற்றொருவர் ஆட்சியில் அமர்வதை இஸ்ரேல் விரும்புவதில்லை

ஈரானில் ஆட்சி மாற்றம் ஏற்படும் பட்சத்தில் அந்நாட்டின் எதிர்காலத் தலைமை குறித்துக் கேட்கப்பட்ட கேள்விக்கு, இஸ்ரேலியப் பிரதமர் பெஞ்சமின் நெதன்யாகு பதிலளித்தார். அப்போது, ஒரு கடும்போக்குவாத மதகுருவுக்குப் பதிலாக அதே போன்ற மற்றொருவர் ஆட்சிக்கட்டிலில் அமர்வதை இஸ்ரேல் விரும்புவதில்லை என்பதை அவர் தெளிவுபடுத்தினார்.

“மாற்றத்தை முன்னெடுக்கும் ஒரு இடைக்காலத் தலைவரையே நீங்கள் விரும்புவீர்கள். ஒரு ஆயதுல்லாவிற்குப் பதிலாக மற்றொரு ஆயதுல்லாவை நீங்கள் விரும்ப மாட்டீர்கள். ஹிட்லருக்குப் பதிலாக ஹிம்லரை (Himmler) நியமிக்க நீங்கள் விரும்ப மாட்டீர்கள்,” என்று அவர் கூறினார். மறைந்த உச்ச தலைவர் அலி கமேனியை அடால்ஃப் ஹிட்லருடன் ஒப்பிட்டு அவர் இவ்வாறு பேசினார்.

ஆட்சி மாற்றம் ஏற்படுவதற்கான சாத்தியக்கூறுகள் குறித்துப் பேசிய நெதன்யாகு, “அதை இப்போதே சொல்லிவிட முடியாது. அந்தந்தத் தருணங்களில் கிளர்ந்தெழுவது ஈரானிய மக்களின் கைகளில்தான் உள்ளது. அதற்கான சூழலை எங்களால் உருவாக்க முடியும், ஆனால் அந்தச் சூழலை ஒரு குறிப்பிட்ட கட்டத்தில் அவர்கள் (மக்கள்) பயன்படுத்திக்கொள்ள வேண்டும்,” என்றார்.

தொடர்ந்து பேசிய அவர், “ஆகாய மார்க்கமாகத் தாக்குதல் நடத்தி மட்டும் புரட்சிகளைச் செய்துவிட முடியாது என்று அடிக்கடி சொல்லப்படுவதுண்டு. அது உண்மைதான். வான்வழித் தாக்குதல்கள் மூலம் மட்டுமே அதைச் செய்ய முடியாது. வான்வழியாக எங்களால் பல காரியங்களைச் செய்ய முடியும், நாங்களும் அதைச் செய்து வருகிறோம். ஆனால், அதனுடன் தரைவழித் தாக்குதல் கூறுகளும் (ground component) இருக்க வேண்டும். இந்தத் தரைவழித் தாக்குதலில் பல சாத்தியக்கூறுகள் உள்ளன, அந்தச் சாத்தியக்கூறுகள் அனைத்தையும் உங்களுடன் பகிர்ந்து கொள்ளாத சுதந்திரத்தை நான் எடுத்துக் கொள்கிறேன்,” என்றார்.

மேலும், ரெசா பஹ்லவி (Reza Pahlavi) ஒரு “நன்மைக்கான சக்தியாக” இருந்து வருவதாக நெதன்யாகு குறிப்பிட்டார். “மக்களை ஒரு ஜனநாயக அல்லது மிதமான இடைக்கால அரசாங்கத்திற்காக ஒன்றிணைக்க அவர் முயன்று வருகிறார். அத்தகையதொரு மாற்றம் நிகழும் என்று நான் நம்புகிறேன், ஆனால் இப்போதே அதை உறுதிபடக் கூற முடியாது,” என்று அவர் தெரிவித்தார்.