“நிலைமை மோசம்.. ஊழியர்கள் வீட்டில் இருந்து வேலை செய்யுமாறு பணிப்புரை.. மின்விளக்குகளை அணைக்கவும்.. AC-யை நிறுத்தவும்.. அரசாங்கம் உத்தியோகபூர்வமாக அறிவிப்பு..”

மத்திய கிழக்கு பிராந்தியத்தில் ஏற்பட்டுள்ள போர்ச் சூழல் காரணமாக, எதிர்வரும் காலங்களில் நாட்டுக்கு எரிபொருளை இறக்குமதி செய்வதில் தடைகள் ஏற்படக்கூடும் என்பதால், தற்போதுள்ள கையிருப்புகளை சிக்கனமாகப் பயன்படுத்துவதற்காக அத்தியாவசிய சேவைகள் ஆணையாளர் நாயகம் அலுவலகத்தினால் அனைத்து அரச மற்றும் தனியார் நிறுவனங்களுக்கும் கடுமையான வழிகாட்டுதல்கள் வெளியிடப்பட்டுள்ளன.

அத்தியாவசிய சேவைகள் ஆணையாளர் நாயகம் பி. கே. பிரபாத் சந்திரகீர்த்தி அவர்களின் கையொப்பத்துடன் வெளியிடப்பட்டுள்ள இந்த அறிவித்தலில், எரிபொருள், மின்சாரம் மற்றும் நிறுவன செயல்பாடுகள் தொடர்பாக பின்பற்றப்பட வேண்டிய பல நடவடிக்கைகள் சுட்டிக்காட்டப்பட்டுள்ளன.

(வழிகாட்டுதல் – இலக்கம் 01)

மத்திய கிழக்கு பிராந்தியத்தில் உருவாகியுள்ள யுத்த நிலைமை காரணமாக, எரிபொருள் இறக்குமதியில் சிக்கல்கள் ஏற்பட வாய்ப்புள்ளதால், தற்போதுள்ள எரிபொருள் கையிருப்புகளை சிக்கனமாக பயன்படுத்துவது அனைத்து அரச மற்றும் தனியார் நிறுவனங்களின் பொறுப்பாகும். அதன்படி, அத்தியாவசிய சேவைகளை தடையின்றி முன்னெடுத்துச் செல்வதை உறுதிப்படுத்தும் பொருட்டு பின்வரும் வழிகாட்டுதல்கள் உடனடியாக நடைமுறைப்படுத்தப்பட வேண்டும்:

1. அலுவலக பணியாளர் போக்குவரத்து மற்றும் எரிபொருள் மேலாண்மை

• அதிகாரிகள் கடமைக்கு வருகை தரும் போது தனிப்பட்ட வாகனங்களைப் பயன்படுத்துவதற்குப் பதிலாக, முடிந்தவரை பொதுப் போக்குவரத்து அல்லது குழு போக்குவரத்து முறைகளை (Carpooling) பயன்படுத்த வேண்டும்.

• களப்பணிகளுக்காக குறைந்தபட்ச வாகன எண்ணிக்கையைப் பயன்படுத்தும் வகையில் தினசரி போக்குவரத்துத் திட்டங்கள் தயாரிக்கப்பட வேண்டும். இது ஒரு சிரேஷ்ட அதிகாரியின் மேற்பார்வையின் கீழ் இருக்க வேண்டும்.

• கூட்டங்கள் மற்றும் கலந்துரையாடல்களுக்காக அதிகாரிகளை தூர இடங்களிலிருந்து அழைப்பதைத் தவிர்க்க வேண்டும். அதற்குப் பதிலாக WhatsApp, Zoom, Google Meet, MS Teams போன்ற தொழில்நுட்ப முறைகளை கட்டாயமாகப் பயன்படுத்த வேண்டும்.

• அனைத்து கடிதப் பரிமாற்றங்கள் மற்றும் தகவல்களைப் பகிர மின்னஞ்சல் (E-mail) அல்லது WhatsApp போன்ற மின்னணு முறைகளைப் பயன்படுத்த வேண்டும். கடிதங்களை பௌதிகமாக கொண்டு செல்வதை குறைக்க வேண்டும்.

• சுகாதார, பாதுகாப்பு மற்றும் ஏனைய அத்தியாவசிய சேவைகளுக்கான எரிபொருளை தடையின்றி வழங்க மேலதிக எரிபொருள் கையிருப்புகளை பராமரிக்க வேண்டும்.

• அரச துறையிடம் தற்போது சுமார் 92,000 வாகனங்கள் உள்ளன. ஒரு வாகனத்தில் ஒரு நாளைக்கு ஒரு லீட்டர் எரிபொருளைச் சேமித்தால், அனைத்து வாகனங்களிலிருந்தும் ஒரு நாளைக்கு 92,000 லீட்டர் எரிபொருளைச் சேமிக்க முடியும். இதன் மூலம் மாதத்திற்கு 9.2 மில்லியன் லீட்டர்களையும், வருடத்திற்கு 110 மில்லியன் லீட்டர்களையும் சேமிக்க முடியும்.

2. மின்சாரம் மற்றும் எரிசக்தி பாதுகாப்பு

• முடிந்தவரை இயற்கை வெளிச்சத்தை அல்லது கூரை வழியான ஒளி அமைப்புகளை (Sky lights) பயன்படுத்த வேண்டும்.

• மேசை விளக்குகளைப் பயன்படுத்தி, பொதுவான மின் விளக்குகளை அணைக்க நடவடிக்கை எடுக்க வேண்டும். இரவு நேரங்களில் அவசியமான இடங்களில் மட்டுமே மின் விளக்குகளை ஒளிரவிட காவலாளிகள் மற்றும் ஊழியர்களுக்கு அறிவுறுத்த வேண்டும்.

• குளிரூட்டிகளுக்கு (AC) பதிலாக மின்விசிறிகளைப் பயன்படுத்த வேண்டும். (மேசை மின்விசிறிகள் மற்றும் பெடஸ்டல் மின்விசிறிகள் ஏனையவற்றை விட அதிக எரிசக்தி திறன் கொண்டவை).

• காலையில் ஜன்னல்களைத் திறந்து இயற்கை காற்றோட்டத்தைப் பெற வேண்டும். கடமை நேரத்தின் போது குறைந்தது ஒரு நாளைக்கு 1-2 மணித்தியாலங்கள் குளிரூட்டிகளை அணைப்பது கட்டாயமாகும். குளிரூட்டி தேவையற்ற பகுதிகளில் அவற்றை முழுமையாக அணைக்க வேண்டும்.

• குளிரூட்டிகளின் வெப்பநிலையை 26°C அல்லது அதற்கு மேல் பராமரிப்பது கட்டாயமாகும்.

• உள்ளூராட்சி மன்றங்களின் கீழ் உள்ள வீதி விளக்குகளை தேவையற்ற நேரங்களில் அணைக்க சிறப்புத் திட்டங்களைச் செயல்படுத்த வேண்டும்.

• அதிஉயர் பாதுகாப்பு வலயங்களைத் தவிர ஏனைய வீதிகளில் தற்காலிக தீர்வாக வீதி விளக்குகளை அணைக்க வேண்டும்.

• மின்தூக்கிகளின் (Lift) பயன்பாட்டைக் குறைத்து, முடிந்தவரை படிக்கட்டுகளைப் பயன்படுத்துவதை ஊக்குவிக்க வேண்டும்.

• இரவு 9.00 மணிக்குப் பிறகு விளம்பரப் பலகைகளை அணைக்க வேண்டும். பகல் நேரத்தில் அலுவலகங்களில் உள்ள தொலைக்காட்சி பெட்டிகளை அணைத்து வைக்க வேண்டும்.

3. நிறுவன செயல்பாட்டு நடைமுறைகள்

• நிறுவனத்தில் தொழில்நுட்ப வசதிகள் இருந்தால், ஊழியர்களை அலுவலகத்திற்கு அழைக்காமல் ஆன்லைன் (Online) மூலம் வேலைகளைப் பெற்றுக்கொள்ள நிறுவனத் தலைவர்கள் நடவடிக்கை எடுக்க வேண்டும்.

• நிர்ணயிக்கப்பட்ட வேலை நேரத்திற்குப் பிறகும், வார இறுதி நாட்களிலும் (அத்தியாவசியத் தேவை தவிர) அலுவலகத்தை மூடி வைப்பதை உறுதி செய்ய வேண்டும்.

• கடந்த மாதத்துடன் ஒப்பிடுகையில் மின்சாரம் மற்றும் எரிபொருள் பயன்பாடு எவ்வளவு குறைக்கப்பட்டுள்ளது என்பதைச் சரிபார்க்க ஒவ்வொரு நிறுவனமும் ஒரு சிறப்பு மேற்பார்வை முறையை உருவாக்க வேண்டும்.

• அனைத்து அரச அதிகாரிகளும் இந்த நெருக்கடியான நேரத்தில் பொதுமக்களுக்கு முன்மாதிரியாகச் செயல்பட வேண்டும் என்பதுடன், தேசிய எரிசக்தி பாதுகாப்புக்காகத் தங்களது அதிகபட்ச ஒத்துழைப்பை வழங்க வேண்டும்.