ஈரான் மீதான தீர்க்கமான “இறுதித் தாக்குதல்”: அமெரிக்க பென்டகன் பாரிய இராணுவத் திட்டங்களை முன்னெடுக்கிறது
ஈரானுடனான போரை ஒரு தீர்க்கமான முடிவுக்குக் கொண்டு வருவதற்காக, பாரிய “இறுதித் தாக்குதல்” (Final Blow) ஒன்றை நடத்துவதற்கான இராணுவத் திட்டங்களை அமெரிக்க பாதுகாப்பு தலைமையகமான பென்டகன் தயாரித்து வருவதாகத் தகவல்கள் தெரிவிக்கின்றன. இந்த நடவடிக்கைகளுக்காக தரைப்படை மற்றும் பாரிய வான்வழித் தாக்குதல் படைகளைப் பயன்படுத்துவதில் கவனம் செலுத்தப்பட்டுள்ளதாக அமெரிக்க அதிகாரிகளை மேற்கோள் காட்டி சர்வதேச ஊடகங்கள் செய்தி வெளியிட்டுள்ளன.
ஈரான் போரை முடிவுக்குக் கொண்டுவருவதற்காக ஜனாதிபதி டிரம்பிற்கு முன்வைக்கப்பட்டுள்ள நான்கு பிரதான இராணுவ விருப்பங்கள் குறித்து வொஷிங்டன் வெளிப்படுத்தியுள்ளது:
1. கார்க் தீவைக் கைப்பற்றுதல்: ஈரானின் பிரதான எண்ணெய் ஏற்றுமதி மையமான கார்க் (Kharg) தீவை ஆக்கிரமித்தல் அல்லது முற்றுகையிடுதல்.
2. அபு மூசா தீவைக் கைப்பற்றுதல்: ஹார்முஸ் நீரிணைக்கு அருகில் உள்ள மூலோபாய முக்கியத்துவம் வாய்ந்த அபு மூசா மற்றும் ஏனைய இரண்டு சிறிய தீவுகளைத் தங்கள் கட்டுப்பாட்டிற்குள் கொண்டுவருதல்.
3. எண்ணெய் தாங்கிக் கப்பல்களை முற்றுகையிடுதல்: ஹார்முஸ் நீரிணையின் கிழக்குப் பகுதியில் ஈரானிய எண்ணெய் ஏற்றுமதி செய்யும் கப்பல்களை நிறுத்துதல் அல்லது அவற்றைக் கைப்பற்றுதல்.
4. அணுசக்தி நிலையங்களை இலக்கு வைத்தல்: ஈரானின் வசம் உள்ள யுரேனியம் இருப்புகளைக் கைப்பற்ற அந்நாட்டிற்குள் தரைவழித் தாக்குதல்களை நடத்துதல் அல்லது அந்த நிலையங்களை அழிப்பதற்கு வான்வழித் தாக்குதல்களை முன்னெடுத்தல்.
வெள்ளை மாளிகையின் ஊடகச் செயலாளர் கரோலின் லெவிட் கூறுகையில், ஈரானுடன் ஒரு உடன்பாட்டிற்கு வர முடியாவிட்டால், இதற்கு முன் எப்போதும் இல்லாத வகையிலான சக்திவாய்ந்த தாக்குதலை நடத்த ஜனாதிபதி தயாராக இருப்பதாகத் தெரிவித்தார். “ஜனாதிபதி வெறும் வெற்று மிரட்டல்களை விடுப்பவர் அல்ல, அவர் ‘நரகத்தை அவிழ்த்துவிட’ (Unleash hell) தயாராக இருக்கிறார்” என்று அவர் மேலும் குறிப்பிட்டார்.
இதற்கிடையில், ஈரான் நாடாளுமன்ற சபாநாயகர் முகமது பாகர் காலிபாப், தமது தீவுகளை ஆக்கிரமிக்க முயற்சிக்கும் எந்தவொரு நடவடிக்கைக்கும் எதிராக, பிராந்திய உட்கட்டமைப்புகளை இலக்கு வைத்து பாரிய பதிலடித் தாக்குதல்கள் நடத்தப்படும் எனத் தெரிவித்துள்ளார்.
இந்த பதற்றமான சூழ்நிலைக்கு மத்தியில், மேலதிக மெரைன் படைகள் மற்றும் 82-வது வான்வழிப் பிரிவின் ஆயிரக்கணக்கான படையினர் வரும் நாட்களில் மத்திய கிழக்கிற்கு வந்தடைய உள்ளனர்.
தற்போதுள்ள இராஜதந்திர பேச்சுவார்த்தைகள் தோல்வியடைந்தாலோ அல்லது ஹார்முஸ் நீரிணை தொடர்ந்து மூடப்பட்டிருந்தாலோ, இந்த பாரிய இராணுவ நடவடிக்கை முன்னெடுக்கப்படுவதற்கான வாய்ப்புகள் அதிகம் என பாதுகாப்புப் பிரிவினர் சுட்டிக்காட்டுகின்றனர்.
