உலகச் சந்தையின் மச்சையெண்ணெய் (Boric Oil) விலைக் குறியீடுகள் காட்டுகின்ற அளவை விட மிக அதிக விலையை ஆசிய பிராந்திய கொள்வனவாளர்கள் செலுத்த வேண்டியுள்ளதாகவும், ஒரு சந்தர்ப்பத்தில் இலங்கை கொள்வனவாளர் ஒரு பேரல் எண்ணெய்க்கு 286 டொலர் என்ற பாரிய தொகையைச் செலுத்தியுள்ளதாகவும் HSBC வங்கியின் பிரதம நிறைவேற்று அதிகாரி ஜோர்ஜ் எல்ஹெட்ரி (Georges Elhedery) வெளிப்படுத்தியுள்ளார்.
ஹொங்கொங்கில் நடைபெற்ற முதலீட்டு மாநாடொன்றில் கருத்துத் தெரிவித்த அவர், மேற்கத்திய உலகின் எண்ணெய் விலைக் குறியீடுகள் ஊடாகக் காட்டப்படும் விலையை விட, நிஜ உலகில் கொள்வனவாளர்கள் செலுத்தும் விலை முற்றிலும் மாறுபட்டது எனச் சுட்டிக்காட்டினார்.
குறிப்பாக மத்திய கிழக்கு பிராந்தியத்தில் நிலவும் போர்ச் சூழலால் கப்பல் கட்டணங்கள், காப்பீட்டுச் செலவுகள் மற்றும் விநியோகத் தட்டுப்பாடு என்பன இதற்கு முக்கிய காரணங்களாக அமைந்துள்ளன.
தற்போதைய சந்தை தரவுகளின்படி, ப்ரெண்ட் (Brent) மச்சையெண்ணெய் பேரல் ஒன்று 95 டொலராகவும், வெஸ்ட் டெக்சாஸ் (WTI) எண்ணெய் பேரல் ஒன்று 91 டொலராகவும் காணப்படுவதுடன், ஆசியாவுக்கு மிகவும் பொருத்தமான ஓமான் விலைக் குறியீடு 100 டொலர் வரம்பில் உள்ளது. எவ்வாறாயினும், மத்திய கிழக்கில் இருந்து எண்ணெயைப் பெறும்போது அதன் உண்மையான செலவு ஒரு பேரலுக்கு 140-150 டொலர் வரை அதிகரிப்பதாக எல்ஹெட்ரி தெரிவித்தார்.
செங்கடல் ஊடாக எண்ணெயைக் கொண்டு செல்லும்போது கப்பல் கட்டணங்கள் மாத்திரம் ஒரு பேரலுக்கு 30-40 டொலர் வரை அதிகரித்துள்ளதுடன், முன்னதாக 0.25 சதவீதமாக இருந்த காப்பீட்டுக் கட்டணங்கள் 5 சதவீதம் வரை உயர்ந்துள்ளன. மேலும், போர் காப்பீட்டு முறைகள் ரத்து செய்யப்பட்டுள்ள பின்னணியிலும் கூட, இத்தகைய அதிக கட்டணங்களைச் செலுத்த கொள்வனவாளர்கள் நிர்ப்பந்திக்கப்பட்டுள்ளனர்.
அமெரிக்க – ஈரான் மோதல்கள் மற்றும் செங்கடலில் நிலவும் ஸ்திரமற்ற தன்மை இந்த நெருக்கடிக்கு நேரடியாகப் பாதிப்பை ஏற்படுத்தியுள்ளன. ஹோமுஸ் (Hormuz) நீரிணையை ஈரான் தனது கட்டுப்பாட்டில் வைத்து வளைகுடா பிராந்தியத்தின் ஏற்றுமதியைத் தடுத்துள்ளமையும், அதற்குப் பதிலடியாக அமெரிக்கா விதித்துள்ள தடைகளும் எண்ணெய் விநியோகத்தை மட்டுப்படுத்தியுள்ளன.CN – MEE
