அனுபவமற்ற அரசாங்கமே காரணம் ; ரணில் தலையிலான எதிர்க்கட்சித் தலைவர்களின் கூட்டத்தில் குற்றம் சாட்டப்பட்டது

“டிட்வா” (Ditwah) புயல் ஏற்படுத்திய பேரழிவை அடுத்து, தற்போதைய தேசிய நெருக்கடியை எந்தவொரு அரசாங்காலும் தனித்து எதிர்கொள்ள முடியாது என்றும், நாட்டைக் கட்டியெழுப்ப ஒரு கூட்டுத் தேசிய முயற்சி அவசியம் என்றும் எதிர்க்கட்சித் தலைவர்கள் மற்றும் பிரதிநிதிகள் வலியுறுத்தியுள்ளனர்.

முன்னாள் ஜனாதிபதி ரணில் விக்ரமசிங்கவின் அழைப்பின் பேரில், கொழும்பு   ஐக்கிய தேசியக் கட்சியின் (UNP) தலைமையகத்தில் நடைபெற்ற கூட்டத்திலேயே அவர்கள் இந்தக் கருத்துக்களை வெளியிட்டனர்.

பதிவு செய்யப்பட்ட 35க்கும் மேற்பட்ட அரசியல் கட்சிகளின் தலைவர்கள் அல்லது பிரதிநிதிகள் இக்கூட்டத்தில் கலந்துகொண்டதாக ஐக்கிய தேசியக் கட்சியின் தவிசாளர் வஜிர அபேவர்தன தெரிவித்தார்.

புயலினால் உயிரிழந்த இலங்கையர்களுக்காக சில நிமிட மௌன அஞ்சலியுடன் இக்கூட்டம் ஆரம்பமானது.

அரசாங்கம் மீது கடும் விமர்சனம்
தற்போதைய அரசாங்கம் அனுபவமற்றது என்றும், அனர்த்த தயார்நிலை மற்றும் மீட்பு நடவடிக்கைகளில் பாரிய குறைபாடுகள் உள்ளதாகவும் எதிர்க்கட்சித் தலைவர்கள் கடும் விமர்சனங்களை முன்வைத்தனர்:

* இந்த ஆண்டின் முற்பகுதியில் விரிவான செயலமர்வுகள் நடத்தப்பட்ட போதிலும், நவம்பர் 27 அன்று அனர்த்த முகாமைத்துவச் சட்டத்தின் முக்கிய ஏற்பாடுகள் நடைமுறைப்படுத்தப்படவில்லை.

* நவம்பர் 28 அன்று விடுமுறை அறிவித்தமையானது, அவசர பணிகளுக்குப் பொறுப்பான திணைக்களங்களை முடக்கிவிட்டது.

* நிவாரண விநியோகத்தை அரசாங்கம் அரசியலாக்குவதாகவும், நாடாளுமன்றம், அமைச்சரவை மற்றும் அனர்த்த முகாமைத்துவ நிலையம் (DMC) ஆகியவற்றைத் தவிர்த்து சமாந்தரமான நிவாரண நிதியமொன்றை அமைத்துள்ளதாகவும் அவர்கள் குற்றம் சாட்டினர்.

* அனர்த்தத்தை எதிர்கொள்வதற்குத் தெளிவான மூலோபாயமோ அல்லது மறுசீரமைப்புக்கான திட்டமோ வெளியிடப்படவில்லை.
எதிர்க்கட்சிகளின் முன்மொழிவுகள்
இக்கூட்டத்தில் கலந்துகொண்ட குழுவினர் பின்வரும் முக்கிய முன்மொழிவுகளை முன்வைத்தனர்:

* நாடாளுமன்றக் குழுக்கள்: அனர்த்த முகாமைத்துவம் மற்றும் மீள்கட்டுமானத்திற்காக, அரசாங்க மற்றும் எதிர்க்கட்சி உறுப்பினர்களைச் சமமாக உள்ளடக்கிய, அனுபவம் வாய்ந்த எம்.பி ஒருவரின் தலைமையில் மேற்பார்வைக் குழுவொன்றை (Oversight Committee) நாடாளுமன்றம் உடனடியாக நியமிக்க வேண்டும். மேலும், நவம்பர் 28 அன்று இடம்பெற்ற குறைபாடுகளை ஆராய்ந்து ஆறு மாதங்களுக்குள் அறிக்கை சமர்ப்பிக்க, எதிர்க்கட்சி உறுப்பினர் ஒருவரின் தலைமையில் தனியான தெரிவுக்குழு (Select Committee) ஒன்று அமைக்கப்பட வேண்டும்.

* நிர்வாகம்: மாவட்ட அளவிலான நிவாரணப் பணிகளை மாவட்ட செயலாளர்களே முன்னெடுத்துச் செல்ல வேண்டும் என்றும், களச் செயற்பாடுகளிலிருந்து அரசியல் தலையீடுகள் நீக்கப்பட வேண்டும் என்றும் வலியுறுத்தப்பட்டது.

* வரவு-செலவுத் திட்டம்: தற்போதைய வரவு-செலவுத் திட்டம் உடனடித் தேவைக்குப் பொருத்தமற்றது என்றும், சேதங்களின் முழுமையான விபரம் அறியப்பட்ட பின்னர் 2026 ஜனவரியில் புதிய வரவு-செலவுத் திட்டம் சமர்ப்பிக்கப்படும் வரை கணக்கு வாக்கெடுப்பு (Vote on Account) போதுமானது என்றும் தலைவர்கள் கூறினர்.

பொருளாதாரம் மற்றும் நிதியுதவி
உலகளாவிய பொருளாதார நெருக்கடிகள் காரணமாக உடனடி வெளிநாட்டு மானியங்கள் கிடைப்பது அரிது என்று சுட்டிக்காட்டிய குழு, ADB, AIIB, JBIC மற்றும் KOICA போன்ற அமைப்புகளிடமிருந்து நீண்ட கால சலுகைக் கடன்களைப் பெற்றுக்கொள்ள இலங்கை முயற்சிக்க வேண்டும் என்று வலியுறுத்தியது.

மேலும், ரயில்வே புனரமைப்புக்கு இந்தியாவின் உதவியைக் கோருமாறும், தேசிய காலநிலை மாற்றக் கொள்கையை மீண்டும் செயற்படுத்துமாறும் பரிந்துரைத்தனர்.

அண்மைய உயர் நீதிமன்றத் தீர்ப்பின்படி, அரசாங்கத்தின் இத்தகைய கவனக்குறைவு அரசியலமைப்பு ரீதியான தவறு (constitutional tort) என்றும் பொது நம்பிக்கையை மீறும் செயல் என்றும் கட்சித் தலைவர்கள் வாதிட்டனர்.

தேசிய சபை மற்றும் அரசியலமைப்பு
நீண்ட கால மீள்கட்டுமானப் பணிகளை வழிநடத்த நான்கு மகாநாயக்க தேரர்களின் தலைமையில் மதத் தலைவர்கள் மற்றும் அரசியல் தலைவர்களை உள்ளடக்கிய தேசிய சபை ஒன்றை கூட்டுவதற்கான யோசனையையும் இக்குழு அங்கீகரித்தது. இதற்கு முன்னாள் சபாநாயகர் கரு ஜயசூரிய ஒரு ஒருங்கிணைப்பாளராகச் செயல்பட வேண்டும் என்று பரிந்துரைக்கப்பட்டது.

நெருக்கடி காலத்தில் ஜே.வி.பி.யின் (JVP) பெலவத்தை அலுவலகம் முடிவெடுக்கும் மையமாக மாறியுள்ளதாகவும், அரசியலமைப்பு வழிமுறைகளுக்கு அப்பால் அரச அதிகாரம் பயன்படுத்தப்படுவதாகவும் எதிர்க்கட்சிப் பிரதிநிதிகள் குற்றஞ்சாட்டினர்.

அதிகாரம் மீண்டும் நாடாளுமன்றத்திடம் ஒப்படைக்கப்பட வேண்டும் என்று அவர்கள் கூறினர்.

இலங்கையை மீளக்கட்டியெழுப்ப அரசியல், மத மற்றும் சிவில் துறைகளுக்கு இடையில் பரந்த ஒத்துழைப்பு அவசியம் என்றும், மீட்பு முயற்சிகளை வழிநடத்த ஒரு கட்டமைக்கப்பட்ட தேசிய தளம் உருவாக்கப்பட வேண்டும் என்றும் கலந்துரையாடலின் முடிவில் இணக்கம் காணப்பட்டது.