இலங்கை வரலாற்றில் 2025 ஆம் ஆண்டில் தபால் சேவை எதிர்பார்த்த இலக்கை தாண்டி 13.1 பில்லியன் வருமானத்தை பதிவு செய்தது

இலங்கை தபால் சேவையில் பாரிய மறுமலர்ச்சி: 2025 இல் வருமான இலக்கை விஞ்சியது

பல தசாப்தங்களாக தேக்க நிலையில் இருந்த இலங்கை தபால் சேவை, 2025 ஆம் ஆண்டில் திறைசேரியினால் நிர்ணயிக்கப்பட்ட வருமான இலக்குகளை விஞ்சி, ஒரு குறிப்பிடத்தக்க திருப்புமுனையையும் பாரிய மறுமலர்ச்சியையும் பதிவு செய்துள்ளதாக அதிகாரிகள் தெரிவித்துள்ளனர்.

தபால் மா அதிபர் ருவன் சத்குமார இது குறித்துக் கூறுகையில், 2025 ஆம் ஆண்டிற்காக திறைசேரியினால் வழங்கப்பட்ட வருமான இலக்கை விட அதிக வருமானத்தை ஈட்டி, தபால் திணைக்களம் ரூபா 13.1 பில்லியன் வருவாயைப் பெற்றுள்ளதாகக் குறிப்பிட்டார்.
கடந்த ஆண்டில் பாரிய அளவிலான ஆட்சேர்ப்பு, நீண்டகாலமாகப் பணியாற்றும் ஊழியர்களை நிரந்தரமாக்குதல், உட்கட்டமைப்பு அபிவிருத்தி, தொழில்நுட்பம் மற்றும் போக்குவரத்துத் துறைகளில் முதலீடுகள் என சேவைத் திறனை மேம்படுத்தும் நோக்கில் விரிவான சீர்திருத்தங்கள் முன்னெடுக்கப்பட்டதாக அவர் தெரிவித்தார்.

பணியாளர் நியமனங்கள் மற்றும் உறுதிப்படுத்தல்கள்
தபால் மா அதிபரின் கூற்றுப்படி, ஜூன் 2025 இல் 378 உப தபால் அதிபர்களுக்கு நிரந்தர நியமனங்கள் வழங்கப்பட்டன.

இது 2020 ஆம் ஆண்டிற்குப் பின்னர் வழங்கப்பட்ட முதலாவது நிரந்தர நியமனமாகும். அத்துடன், செப்டம்பர் 2025 இல் 1,000 தபால் உதவியாளர்களின் பதவிகள் முறைப்படுத்தப்பட்டன. இது 2022 இற்குப் பின்னர் அந்தப் பிரிவில் இடம்பெற்ற முதல் உறுதிப்படுத்தலாகும்.
மேலும் பல நியமனங்கள் குறித்து அவர் பின்வருவனவற்றைத் தெரிவித்தார்:

* 600 தபால் சேவை உத்தியோகத்தர்களை திறந்த போட்டிப் பரீட்சை மூலம் ஆட்சேர்ப்பு செய்யும் நடவடிக்கைகள் முன்னெடுக்கப்பட்டு வருகின்றன. இவர்களுக்கான நியமனங்கள் இந்த ஆண்டு பெப்ரவரி மாதம் வழங்கப்படவுள்ளன.
* நவம்பர் 2025 இல் 40 தரம் III தபால் வாகன சாரதிகள் நியமிக்கப்பட்டனர். இது 2018 ஆம் ஆண்டிற்குப் பிறகு இடம்பெற்ற முதல் நியமனமாகும்.

* ஊடகத்துறை அமைச்சர் நலிந்த ஜயதிஸ்ஸவின் கோரிக்கைக்கு அமைவாக, அமைச்சரவை அங்கீகாரத்துடன் 1,000 தபால் உதவியாளர்களை ஆட்சேர்ப்பு செய்ய நடவடிக்கை எடுக்கப்பட்டது. இதில் தகுதியுள்ள 731 பதிலீட்டு ஊழியர்கள் கடந்த ஆண்டு நிரந்தரமாக்கப்பட்டனர்.
நவீனமயமாக்கல் மற்றும் போக்குவரத்து மேம்பாடு
தபால் நடவடிக்கைகளை நவீனமயமாக்கும் நோக்கில் 2025 ஆம் ஆண்டில் பின்வரும் உபகரணங்கள் கொள்வனவு செய்யப்பட்டன:

* 225 கணினிகள் மற்றும் 1,500 டேப்லட் (Tablet) சாதனங்கள்.
* 500 அச்சுப்பொறிகள் (Printers) மற்றும் 32 லேசர் அச்சுப்பொறிகள்.
* போக்குவரத்து வசதிகளை மேம்படுத்த 10 புதிய பாரிய லொறிகள் மற்றும் 20 புதிய கேப் (Cab) வாகனங்கள்.
கூடுதலாக, QSF நிதியத்தின் கீழ் வழங்கப்பட்ட 500,000 டொலர் செலவில் 20 மின்சார சரக்கு முச்சக்கர வண்டிகள் மற்றும் 165 மின்சார மோட்டார் சைக்கிள்களை கொள்வனவு செய்யும் பணிகள் ஆரம்பிக்கப்பட்டுள்ளன. அமெரிக்க தபால் சேவையிடமிருந்து (USPS) கிடைத்த 100,000 டொலர் மானியத்தில் மேலும் 15 மின்சார முச்சக்கர வண்டிகள் கொள்வனவு செய்யப்படவுள்ளன. 2018 ஆம் ஆண்டிற்குப் பிறகு வாகனம் எதனையும் கொள்வனவு செய்யாத தபால் திணைக்களத்திற்கு, மேலதிகமாக 21 கேப் வாகனங்களை ஒதுக்க அரசாங்கம் தீர்மானித்துள்ளது.
உட்கட்டமைப்பு மற்றும் கட்டிட அபிவிருத்தி
புதிய தபால் நிலையங்களை நிர்மாணிப்பதற்காக 2025 ஆம் ஆண்டின் தொடக்கத்தில் அரசாங்கம் ரூபா 600 மில்லியனை ஒதுக்கியிருந்தது. இதன் கீழ் தம்புள்ளை பிரதேச தபால் பரிமாற்ற நிலையம் உட்பட 14 இடங்களில் கட்டுமானப் பணிகள் ஆரம்பிக்கப்பட்டுள்ளன. நுவரெலியா ‘யுனிக் வியூ’ (Unique View) சுற்றுலா விடுதி மற்றும் உத்தியோகபூர்வ வாசஸ்தலங்கள் போன்ற இடங்களிலும் அபிவிருத்திப் பணிகள் தொடங்கப்பட்டுள்ளன.
கடந்த ஆண்டில் புதிய பொலன்னறுவை தபால் நிலையம் பொதுமக்களிடம் கையளிக்கப்பட்டதுடன், தபால் தலைமையகம், மத்திய தபால் பரிமாற்ற நிலையம், மட்டக்களப்பு தபால் வளாகம் உள்ளிட்ட முக்கிய இடங்களில் சூரிய சக்தி (Solar Panel) கட்டமைப்பு நிறுவப்பட்டு மின்சார வசதிகள் மேம்படுத்தப்பட்டுள்ளன.