🚨 பிரேக்கிங் நியூஸ்: அமெரிக்க F-35 போர் விமானம் மீது ஈரான் தாக்குதல்!

மத்திய கிழக்கில் நிலைநிறுத்தப்பட்டுள்ள அமெரிக்காவின் F-35 போர் விமானம் ஒன்று, ஈரான் நடத்திய தாக்குதலில் பலத்த சேதமடைந்ததை அடுத்து, அங்குள்ள அமெரிக்க விமானப்படைத் தளத்தில் அவசரமாகத் தரையிறக்கப்பட்டதாகத் தெரிவிக்கப்படுகிறது.

ஈரானுடனான தற்போதைய மோதல் சூழலில், அமெரிக்க போர் விமானம் ஒன்று இலக்கு வைக்கப்பட்டு தாக்குதலுக்குள்ளான முதல் சந்தர்ப்பம் இது எனக் கருதப்படுகிறது.

ஈரானுக்கு மேலாக போர் நடவடிக்கையில் ஈடுபட்டிருந்த போதே, ஐந்தாம் தலைமுறை ‘ஸ்டெல்த்’ (Stealth) வகையைச் சேர்ந்த இந்த போர் விமானம் இச்சம்பவத்திற்கு முகம் கொடுத்ததாக அமெரிக்க மத்திய கட்டளைத் தலைமையகத்தின் ஊடகப் பேச்சாளர் கப்டன் டிம் ஹாக்கின்ஸ் தெரிவித்தார். தாக்குதலுக்குப் பின்னர் விமானம் பாதுகாப்பாகத் தரையிறக்கப்பட்டதோடு, அதன் விமானி நலமுடன் இருப்பதாகவும் அவர் உறுதிப்படுத்தினார்.

இச்சம்பவம் குறித்து தற்போது விசேட விசாரணைகள் ஆரம்பிக்கப்பட்டுள்ளன.

கடந்த பெப்ரவரி மாத இறுதியில் ஆரம்பமான இந்தப் போர்ச் சூழலில், அமெரிக்கா மற்றும் இஸ்ரேல் ஆகிய இரு நாடுகளுமே F-35 ரக விமானங்களை நடவடிக்கைகளுக்காகப் பயன்படுத்தி வருகின்றன. ஒரு விமானத்தின் பெறுமதி 100 மில்லியன் அமெரிக்க டாலர்களுக்கும் அதிகமாகும்.

ஈரானுக்கு எதிரான நடவடிக்கைகள் வெற்றியளித்துள்ளதாக அமெரிக்க உயர்மட்ட அதிகாரிகள் தெரிவித்து வரும் பின்னணியிலேயே இந்தத் தாக்குதல் பற்றிய தகவல் வெளியாகியுள்ளது.

அமெரிக்கா தீர்க்கமான வெற்றிகளைப் பெற்று வருவதாகவும், ஈரானின் வான் பாதுகாப்பு அமைப்புகள் முடக்கப்பட்டுள்ளதாகவும் அமெரிக்க பாதுகாப்புச் செயலாளர் பிட் ஹெக்செத் (Pete Hegseth) வியாழக்கிழமை காலை தெரிவித்திருந்தார்.

இச்சம்பவத்திற்கு இணையாக, மத்திய கிழக்கின் எரிசக்தி மையங்களை இலக்கு வைத்து நடத்தப்பட்ட தாக்குதல்கள் காரணமாக உலகச் சந்தையில் எண்ணெய் மற்றும் இயற்கை எரிவாயு விலை அதிகரித்துள்ளதாகவும் செய்திகள் தெரிவிக்கின்றன.

இம்மோதல்கள் காரணமாக அமெரிக்க விமானப்படைக்குச் சொந்தமான எரிபொருள் நிரப்பும் விமானம் ஒன்று ஈராக்கில் விபத்துக்குள்ளாகி அதில் இருந்த அறுவர் உயிரிழந்துள்ளனர். அத்துடன், தீ விபத்து காரணமாக அமெரிக்க விமானம் தாங்கி கப்பல் ஒன்று திருத்தப் பணிகளுக்காகப் போர் வலயத்திலிருந்து அகற்றப்பட்டுள்ளதாகவும் தெரிவிக்கப்படுகிறது.