தரமற்ற நிலக்கரி: காணக்காய்வு அறிக்கையில் பல குற்றச்சாட்டுகள்.. உரிமம் ரத்து செய்யப்பட்ட ஆய்வகத்தில் தர அறிக்கை பெறப்பட்டதும் அம்பலம்..

2025-2026 காலப்பகுதிக்காக நுரைச்சோலை லක්விஜய மின் உற்பத்தி நிலையத்திற்கு நிலக்கரி கொள்வனவு செய்யும் நடைமுறையில் பாரிய முறைகேடுகள் மற்றும் ஊழல்கள் இடம்பெற்றுள்ளதாக தேசிய கணக்காய்வாளர் அலுவலகம் வெளியிட்டுள்ள விசேட அறிக்கை ஒன்றில் வெளிப்படுத்தப்பட்டுள்ளது.

பொது நிறுவனங்களுக்கான குழு (COPE) விடுத்த கோரிக்கைக்கு அமைய கணக்காய்வாளர் நாயகம் இந்த விசாரணையை நடத்தியுள்ளார்.

அந்த அறிக்கையின்படி, நிலக்கரி கொள்வனவுக்காக விலைமனு கோரப்பட்ட சந்தர்ப்பத்தில், முறையான பதிவை நிறைவு செய்யாத மூன்று விநியோகஸ்தர்களுக்கு விலைமனுக்களை சமர்ப்பிக்க வாய்ப்பு வழங்கப்பட்டுள்ளது. குறிப்பாக, இந்த கொள்வனவுக்காகத் தெரிவு செய்யப்பட்ட நிறுவனமும் விலைமனு கோரப்பட்ட தினத்தில் தனது பதிவை உறுதிப்படுத்தியிருக்கவில்லை என்பது தணிக்கையில் கண்டறியப்பட்டுள்ளது.

கொள்வனவு செய்யப்படும் நிலக்கரியின் தரத்தைப் பரிசோதிக்க விற்பனையாளரால் நியமிக்கப்பட்ட ‘MitrasK South Africa’ நிறுவனத்திற்கு அதற்கான முறையான அங்கீகாரம் இருக்கவில்லை என அறிக்கை சுட்டிக்காட்டுகிறது. இதன் காரணமாக, தர அறிக்கைகளை வழங்கும் பொறுப்பை ஏற்ற இந்தோனேசிய நிறுவனமொன்றின் அனுமதிப்பத்திரம் 2025 டிசம்பரில் காலாவதியாகியிருந்ததுடன், 2026 மார்ச் வரை அது புதுப்பிக்கப்பட்டதற்கான சான்றுகள் இல்லை. இருப்பினும், தகுதியற்ற அந்த நிறுவனம் வழங்கிய அறிக்கைகளின் அடிப்படையில் 12 கப்பல் நிலக்கரி தொகுதிகள் பொறுப்பேற்கப்பட்டுள்ளன.

லங்கா நிலக்கரி நிறுவனம் 2025 நவம்பர் முதல் டிசம்பர் வரையிலான 40 நாட்களில் எந்தவொரு நிலக்கரி கப்பலையும் நாட்டிற்கு கொண்டு வரத் தவறியுள்ளதாக கணக்காய்வாளர் நாயகம் சுட்டிக்காட்டியுள்ளார். இதனால் கடந்த மார்ச் 18ஆம் திகதி அவசர கொள்வனவு மூலம் நிலக்கரி வாங்க நேரிட்டது. இதில் தெரிவு செய்யப்பட்ட ‘தரஞ்சட் ரிசோர்ஸ்’ என்ற தனியார் நிறுவனம், இதற்கு முன்னர் தேவையான வெப்ப சக்தியைக் கொண்ட நிலக்கரியை வழங்கத் தவறியதால் நிராகரிக்கப்பட்ட ஒரு நிறுவனம் என்பதும் வெளிப்பட்டுள்ளது.

இந்த முறைகேடுகள் மற்றும் நிலக்கரி தட்டுப்பாடு காரணமாக, நுரைச்சோலை மின் உற்பத்தி நிலையத்தின் நடவடிக்கைகளை முன்னெடுத்துச் செல்வதில் சிக்கல் ஏற்படும் என தணிக்கை அறிக்கை எச்சரித்துள்ளது. இது நாட்டின் தொடர்ச்சியான மின்சார விநியோகத்தைப் பாதிக்கும் என கணக்காய்வாளர் நாயகம் குறிப்பிட்டுள்ளார்.

நிலக்கரி தரமானதாக இல்லாத காரணத்தால் ஏற்பட்டுள்ள நஷ்டம் சுமார் 224 கோடி ரூபாவாகும். முதல் கப்பலில் 16 கோடி, இரண்டாவது கப்பலில் 9 கோடி, மூன்றாவது கப்பலில் 31 கோடி, நான்காவது கப்பலில் 15 கோடி, ஐந்தாவது கப்பலில் 18 கோடி, ஆறாவது கப்பலில் 30 கோடி, ஏழாவது கப்பலில் 24 கோடி, எட்டாவது மற்றும் பத்தாவது கப்பல்களில் தலா 39 கோடி ரூபாவிற்கும் அதிகமான நஷ்டம் ஏற்பட்டுள்ளதாக அறிக்கை கூறுகிறது.

இந்த நிலக்கரியைப் பயன்படுத்தி 300 மெகாவாட் முழு கொள்ளளவைப் பெற முடியாது என்பதால், மாற்று வழிகளில் மின்சாரத்தைப் பெற வேண்டிய நிலை ஏற்படும். இதற்காக மதிப்பிடப்பட்டுள்ள மேலதிக மின்சக்தி அளவு 76,354,087 கிலோவாட் மணிநேரம் (kWh) என அந்த அறிக்கையில் தெரிவிக்கப்பட்டுள்ளது.