ஐக்கிய தேசியக் கட்சியின் (UNP) தேசிய இளைஞர் முன்னணியின் ‘Smart UNP’ பிரிவினால் ஏற்பாடு செய்யப்பட்டுள்ள “ரணிலுடன் வாசிப்போம்” (Read with Ranil) எனும் புதிய தேசிய இளைஞர் விழிப்புணர்வுத் திட்டம் அடுத்த மாதம் கொழும்பில் ஆரம்பிக்கப்படவுள்ளது.
ஏற்பாட்டாளர்களின் கூற்றுப்படி, இந்தத் திட்டத்தின் முதலாவது அமர்வு “தற்போதைய உலக ஒழுங்கு” (The Current World Order) எனும் தலைப்பில் 2026 மார்ச் 19 அன்று மாலை 5.30 மணிக்கு கொழும்பில் நடைபெறவுள்ளது.
ஆட்சிமுறை, பொருளாதார சீர்திருத்தம், ஜனநாயக நிறுவனங்கள் மற்றும் தேசிய தலைமைத்துவம் குறித்த கட்டமைக்கப்பட்ட கலந்துரையாடல்கள் மற்றும் சிந்தனைகளில் ஈடுபடுவதற்கு இலங்கை இளைஞர்களுக்கு வாய்ப்பளிக்கும் வகையில் இந்தத் திட்டம் வடிவமைக்கப்பட்டுள்ளதாக ஐக்கிய தேசியக் கட்சியின் பிரதிப் பொதுச்செயலாளர் ஹரின் பெர்னாண்டோ தெரிவித்தார்.
முன்னாள் ஜனாதிபதியும் ஐக்கிய தேசியக் கட்சியின் தலைவருமான ரணில் விக்கிரமசிங்கவின் பல தசாப்தகால தலைமைத்துவம், கொள்கை அனுபவம் மற்றும் தேசத்தைக் கட்டியெழுப்பும் நுண்ணறிவுகளைப் பெற இத்திட்டம் பங்கேற்பாளர்களுக்கு வழிவகுக்கும் என்று அவர் கூறினார்.
“கட்டமைக்கப்பட்ட வாசிப்பு, கலந்துரையாடல் மற்றும் சிந்தனை மூலம், ஆட்சிமுறை, பொருளாதார சீர்திருத்தம், ஜனநாயக நிறுவனங்கள் மற்றும் தேசிய தலைமைத்துவத்தின் பொறுப்புகளை ஆராய பங்கேற்பாளர்கள் ஊக்குவிக்கப்படுகிறார்கள்,” என பெர்னாண்டோ குறிப்பிட்டார்.
“ரணிலுடன் வாசிப்போம்” என்பது வெறும் கலந்துரையாடல் தளம் மட்டுமல்ல, இலங்கையின் எதிர்காலத்திற்கு அர்த்தமுள்ள பங்களிப்பை வழங்கக்கூடிய தகவலறிந்த, சிந்தனைமிக்க மற்றும் பொறுப்புள்ள இளம் தலைவர்களை உருவாக்குவதை நோக்கமாகக் கொண்ட ஒரு தலைமைத்துவ மேம்பாட்டுப் பாதையாகும் என்றும் அவர் சுட்டிக்காட்டினார்.
பங்கேற்பாளர்கள் வழிகாட்டப்பட்ட வாசிப்பு அமர்வுகளில் கலந்துகொள்வதைத் தொடர்ந்து, நான்கு முக்கிய தூண்களின் கீழ் கொள்கை மற்றும் ஆட்சிமுறை குறித்த கலந்துரையாடல்களில் ஈடுபடுவர். இதற்காக நேரில் கலந்துகொள்ள மட்டுப்படுத்தப்பட்ட இடங்களே ஒதுக்கப்பட்டுள்ள நிலையில், அவை வருகை தருபவர்களின் அடிப்படையில் வழங்கப்படும். ஏனையோர் இணையவழியில் இணைய முடியும்.
ஆர்வமுள்ள விண்ணப்பதாரர்கள் அதிகாரப்பூர்வ இணைப்பின் மூலம் தமது சுயவிபரக்கோவையை (CV) சமர்ப்பிக்குமாறு கேட்டுக்கொள்ளப்பட்டுள்ளதோடு, தெரிவுசெய்யப்படுபவர்கள் தொடர்பு கொள்ளப்படுவார்கள். தேசிய கொள்கை விவாதங்களில் இளைஞர்களின் ஈடுபாட்டை வலுப்படுத்துவதற்காக ஐக்கிய தேசியக் கட்சியின் தேசிய இளைஞர் முன்னணியின் ‘Smart UNP’ பிரிவினால் இந்தத் திட்டம் ஏற்பாடு செய்யப்பட்டுள்ளது.
