வடமேல் மாகாண சபை கட்டிடத்தை இலக்கு வைத்து சயனைட் நச்சு குண்டுத் தாக்குதல் நடத்தப்படவுள்ளதாகக் கிடைத்த தகவல் அடிப்படையற்றது என உறுதிப்படுத்தப்பட்டுள்ளது.
நேற்று (03) மின்னஞ்சல் ஊடாகக் கிடைத்த இந்த எச்சரிக்கை காரணமாக அப்பகுதியில் பெரும் பதற்ற நிலை ஏற்பட்ட போதிலும், மேற்கொள்ளப்பட்ட விசாரணைகளில் அத்தகைய ஆபத்து எதுவும் இல்லை என்பது தெரியவந்துள்ளது.
பொதுவான மின்னஞ்சல் முகவரியொன்றின் ஊடாக தமிழ் மொழியில் கிடைத்த இந்தச் செய்தியில், முற்பகல் 11.50 மணியளவில் ‘ரமீஷா ஹுசைன்’ (Ramisha Hussain) என்ற பெயரிலான கணக்கிலிருந்து அனுப்பப்பட்ட ‘RDX’ வகை குண்டு வெடிப்பு நிகழவுள்ளதாகக் குறிப்பிடப்பட்டிருந்தது.
இந்த அவசர நிலையை அடுத்து பாதுகாப்புப் பிரிவினர் மேற்கொண்ட நடவடிக்கைகள் வருமாறு:
• மாகாண சபையில் பணியாற்றிய அனைத்து அதிகாரிகள் மற்றும் ஊழியர்கள் உடனடியாக கட்டிடத்திலிருந்து வெளியேற்றப்பட்டனர்.
• சிரேஷ்ட பொலிஸ் அத்தியட்சகர் திஸ்ஸ விதானகே அவர்களின் அறிவுறுத்தலின் பேரில், குருநாகல் பொலிஸாரும் பொலிஸ் விசேட அதிரடிப்படையினரும் (STF) இணைந்து விசேட தேடுதல் நடவடிக்கையொன்றை முன்னெடுத்தனர்.
• சோதனை நடவடிக்கைகளுக்காக பொலிஸ் மோப்ப நாய்களும் ஈடுபடுத்தப்பட்டதுடன், முழு வளாகமும் பலத்த சோதனைக்கு உட்படுத்தப்பட்டது.
பொலிஸார் தெரிவித்துள்ளமைக்கு அமைய, குறித்த வளாகத்திற்குள் சந்தேகத்திற்கிடமான எந்தவொரு உபகரணங்களோ அல்லது பொருட்களோ கண்டெடுக்கப்படவில்லை. இதற்கு முன்னரும் இவ்வாறான பல போலி அச்சுறுத்தல்கள் பதிவாகியிருந்த நிலையில், குற்றப் புலனாய்வுத் திணைக்களத்தின் கணினி குற்றப் புலனாய்வுப் பிரிவினரால் மேற்கொள்ளப்பட்ட விசாரணைகளில் அவை பொய்யான தகவல்கள் என ஏற்கனவே உறுதிப்படுத்தப்பட்டிருந்தமை குறிப்பிடத்தக்கது.
