பொரள்ளை பொது மயானத்தில் கடந்த 12ஆம் திகதி இடம்பெற்ற தகனக் கிரியைகள் தொடர்பாக பல முரண்பட்ட தகவல்கள் வெளியாகியுள்ளன. அன்றைய தினம் கொண்டு வரப்பட்ட சில உடல்களை தகனம் செய்வதற்காக ஜாவத்தை மயானத்திற்கு அனுப்பி வைக்க நடவடிக்கை எடுக்கப்பட்டிருந்தது.
மயான ஊழியர் ஒருவர் குறிப்பிடுகையில், தகன உலைகளை இயக்குவதற்குத் தேவையான எரிபொருள் (பாதுகாப்பான எரிவாயு) தட்டுப்பாடு காரணமாகவே உடல்களைப் பொறுப்பேற்க மறுத்து, வேறு இடங்களுக்கு அனுப்பி வைத்ததாகத் தெரிவித்தார்.
இருப்பினும், இது தொடர்பாக கொழும்பு மாநகர சபையின் சுகாதாரப் பிரிவின் உயர் அதிகாரி ஒருவரிடம் வினவியபோது, எரிவாயு தட்டுப்பாடு நிலவுவதாகக் கூறப்படும் செய்தி உண்மையற்றது என அவர் தெரிவித்தார்.
நேர ஒதுக்கீட்டில் ஏற்பட்ட நடைமுறைச் சிக்கல் காரணமாகவே உடல்கள் ஜாவத்தைக்கு அனுப்பப்பட்டதே தவிர, எரிபொருள் தட்டுப்பாட்டினால் அல்ல என அவர் வலியுறுத்தினார். மேலும், பொரள்ளை மயானத்திற்கு விசேட கொள்கலன்கள் மூலம் தொடர்ச்சியாக எரிவாயු விநியோகம் செய்யப்படுவதால், தகனக் கிரியைகளுக்கு எரிபொருள் தட்டுப்பாடு ஏற்பட வாய்ப்பில்லை என்றும் அந்த அதிகாரி விளக்கமளித்தார்.
