இந்த வார இறுதியில் எரிபொருள் விலைகள் அதிகரிக்கப்படலாம்: சிலோன் பெட்ரோலியக் கூட்டுத்தாபன வட்டாரங்கள் தகவல்

இலங்கையில் இந்த வார இறுதியில் எரிபொருள் விலைகள் அதிகரிக்கப்பட வாய்ப்புள்ளதாக இலங்கை கனிம எண்ணெய் கூட்டுத்தாபன (CPC) வட்டாரங்கள் தெரிவிக்கின்றன.

எரிபொருள் விலை அதிகரிப்பின் லாபத்தை அரசாங்கம் பெற்றுக்கொள்ளும் நோக்கில், இன்று (21) மற்றும் நாளை (22) ஆகிய தினங்களில் எரிபொருள் விநியோகத்தை நிறுத்தி வைக்க கனிம எண்ணெய் கூட்டுத்தாபனம் கடந்த 20ஆம் திகதி தீர்மானித்திருந்ததாக எரிபொருள் நிரப்பு நிலைய உரிமையாளர்கள் தெரிவிக்கின்றனர்.

எவ்வாறாயினும், அந்தத் தீர்மானம் பின்னர் மாற்றப்பட்டதாகவும் அவர்கள் குறிப்பிட்டுள்ளனர்.

இதேவேளை, மொத்த சேமிப்பு முனையத்திலிருந்து எரிபொருள் விநியோகிக்கப்படுவதில்லை என வெளியாகும் செய்திகள் முற்றிலும் உண்மைக்குப் புறம்பானவை என இலங்கை கனிம எண்ணெய் கூட்டுத்தாபனம் வலியுறுத்தியுள்ளது.

நாடளாவிய ரீதியில் உள்ள எரிபொருள் நிரப்பு நிலையங்களுக்குத் தடையின்றி எரிபொருள் விநியோகம் முன்னெடுக்கப்பட்டு வருவதாகக் கூட்டுத்தாபனத்தின் மேலாளர் பணிப்பாளர் மயூர நெத்திகுமார தெரிவித்தார். மேலும்,

வரும் நாட்களிலும் QR குறியீட்டிற்கு அமைய ஒற்றை மற்றும் இரட்டை (Odd/Even) முறைமையின் கீழ் எரிபொருள் விநியோகிக்கப்படும் என்றும் அவர் மேலும் குறிப்பிட்டார்.

மத்திய கிழக்கில் நிலவும் போர்ச் சூழல் காரணமாக உலக சந்தையில் கச்சா எண்ணெய் விலை கடுமையாக உயர்ந்துள்ளது. கடந்த பெப்ரவரி மாத இறுதியில் 70 முதல் 75 டொலர்களுக்கு இடைப்பட்ட மட்டத்தில் காணப்பட்ட ஒரு பீப்பாய் கச்சா எண்ணெயின் விலை, தற்போது 112 முதல் 115 டொலர்கள் வரை அதிகரித்துள்ளது.

போர்ச் சூழல் காரணமாகக் காப்புறுதிச் செலவுகள் மற்றும் கப்பல் கட்டணங்கள் உள்ளிட்ட ஒட்டுமொத்த இறக்குமதிச் செலவும் சுமார் 50% இனால் அதிகரித்துள்ளது.

இந்த நிலைமையைக் கருத்திற் கொண்டு, அரசாங்கத்தினால் கடந்த 9ஆம் திகதி நள்ளிரவு முதல் எரிபொருள் விலைகளை அதிகரிக்க நடவடிக்கை எடுக்கப்பட்டிருந்தமை குறிப்பிடத்தக்கது.CN