இலங்கைக்கு நிலக்கரி செய்யும் ஒப்பந்தம் இந்தியாவில் போலி மதுபானக் கடத்தலுடன் தொடர்புடைய சரத் சந்திரா ரெட்டிக்கு !
இலங்கைக்கு நிலக்கரி இறக்குமதி செய்யும் ஒப்பந்தம், இந்தியாவில் மதுபானக் கடத்தலுடன் தொடர்புடைய மற்றும் அரசியல் கட்சிகளுக்கு லஞ்சம் வழங்கிய நபர் ஒருவருக்குச் சொந்தமான நிறுவனத்திற்கு வழங்கப்பட்டுள்ளதாக முன்னாள் அமைச்சர் பாடலி சம்பிக்க ரணவக்க விசேட கருத்தரங்கு ஒன்றில் உரையாற்றும்போது வெளிப்படுத்தியுள்ளார்.
இந்த நிலக்கரி கொடுக்கல் வாங்கலுக்குப் பின்னால் இருப்பவர் சரத் ரெட்டி என்பவர் என்றும், அவர் 2021-2022 காலப்பகுதியில் டெல்லியில் போலி மதுபான விற்பனை மோசடியில் ஈடுபட்டு குற்றவாளியாகக் காணப்பட்டவர் என்றும் ரணவக்க சுட்டிக்காட்டினார்.
அத்துடன், இந்தியாவின் அரசியல் கட்சிகளுக்கு “தேர்தல் பத்திரங்கள்” (Electoral Bonds) ஊடாக 5 கோடி இந்திய ரூபாய்களை லஞ்சமாக வழங்கிய, ரணவக்கவினால் “டெல்லியின் கசிப்பு சுல்தான்” என வர்ணிக்கப்படும் ஒருவருக்கே இந்த ஒப்பந்தம் வழங்கப்பட்டுள்ளதாக அவர் குற்றம் சுமத்தினார்.
இந்த ஒப்பந்தத்தின் மூலம் சம்பந்தப்பட்ட நபருக்கு மிகப்பெரிய லாபம் கிடைப்பதாக முன்னாள் அமைச்சர் இங்கு வெளிப்படுத்தினார்.
அவர் சுட்டிக்காட்டியுள்ளபடி:
• முறையான தரத்தைக் கொண்ட 6150 ரக நிலக்கரிக்கு பதிலாக, 5500-5600 ரக நிலக்கரியை இறக்குமதி செய்வதன் மூலம் ஒவ்வொரு தொன்னிலிருந்தும் சுமார் 30 டொலர் லாபம் ஈட்டப்படுகிறது.
• இதன் மூலம் அவர் இதுவரை ஈட்டியுள்ள மொத்த லாபம் சுமார் 450 கோடி ரூபாய் என ரணவக்க குறிப்பிட்டார்.
இவ்வாறு ஈட்டப்படும் கறுப்புப் பணம், எதிர்காலத்தில் அரசியல் நடவடிக்கைகளுக்காக, அதாவது “கிராமங்களுக்கு விநியோகிக்கப்படும் கிரெடிட் கார்டுகள்” போன்றவற்றுக்காக பயன்படுத்தப்படுமா என ரணவக்க கேள்வி எழுப்பினார்.
இந்த நிதி மோசடி குறித்து தான் தொடர்ந்து ஆராய்ந்து வருவதாகவும், இதற்குப் பின்னால் இருப்பவர்கள் யார் என்பது தனக்குத் தெரியும் என்பதால், அவர்கள் இதிலிருந்து தப்பிக்க இடமளிக்கப் போவதில்லை என்றும் அவர் மேலும் வலியுறுத்தினார்.
