ஊடகவியலாளர் – ஏ சி பௌசுல் அலிம்
தேசிய மக்கள் சக்தியின் ஜனாதிபதி வேட்பாளர் அநுர குமார திசநாயக்கவின் வெற்றியை உறுதிப்படுத்தும் பொதுக்கூட்டம் கல்லொழுவையில் நேற்று நடைபெற்றது. இக்கூட்டத்தில் தேசிய மக்கள் சக்தியின் முக்கிய பிரமுகரான முனீர் முழபர் கலந்து கொண்டு, மக்கள் முன்னிலையில் உரையாற்றினார்.**
முனீர் முழபர், தனது உரையில், 2019 ஈஸ்டர் தாக்குதலின் போது மினுவாங்கொடை உள்ளிட்ட பல முஸ்லிம் பிரதேசங்களில் மக்கள் சந்தித்த பாதிப்புகளை நினைவுகூர்ந்தார். “அந்த நிகழ்வின்போது மினுவாங்கொடை ஜும்மா பள்ளிவாசலில் குண்டு வைக்கப்பட்டதோடு, நகரத்தில் முஸ்லிம் கடைகள் தீவைக்கப்பட்டு நாசமாக்கப்பட்டன,” என்று அவர் குறிப்பிட்டார்.
மேலும், அச்சம்பவத்தில் தொடர்புடையவர்கள் கைது செய்யப்பட்டபோது, தற்போது ஐக்கிய மக்கள் சக்தியில் இணைந்துள்ள ஸ்ரீலங்கா சுதந்திரக் கட்சியின் பாராளுமன்ற உறுப்பினர் தயா ஸ்ரீ ஜெயசேகர, தனது சட்டத்தரணி அதிகாரத்தால் அவர்களை விடுவித்ததை முஸ்லிம் சமூகத்தினர் மறக்கக்கூடாது என வலியுறுத்தினார்.
அதேபோல், கிழக்கு மாகாணத்தைச் சேர்ந்த முன்னாள் ஆளுநர் கிஸ்புல்லாஹ் தொடர்பில் அவர் கூறுகையில், “அவர் ஒரு அண்ட புளுகன், முஸ்லிம்களுக்கு அவப்பெயர் தேடித் தரக் கூடியவர் ” என்று முஸ்லிம் காங்கிரஸ் சாணக்கிய தலைவர் ரவூப் ஹக்கீம் சொன்னதை முனீர் மேற்கோளிட்டு, தற்போது அவர்கள் சஜித் பிரேமதாசாவுக்காக குரல் கொடுப்பது முஸ்லிம் சமூகத்துக்குள் குழப்பத்தை ஏற்படுத்துவதாகக் கூறினார். மேலும், வடக்கு மற்றும் கிழக்கு மாகாணங்களை ஒன்றாக இணைக்கும் முயற்சிகளை எதிர்த்து நீதிமன்றம் வரை சென்ற ஒரே தலைவராக அநுர குமார திசநாயக்க இருந்தார் என்று அவர் நினைவூட்டினார். “மீண்டும் தற்போது வடக்கு மற்றும் கிழக்கை இணைக்கப்படுவதை சஜித் பிரேமதாசா மறைமுகமாக இணக்கம் தெரிவித்துள்ளதாக தகவல்கள் கிடைத்திருக்கின்றன,” என்றும் அவர் கூறினார்.
மேலும் விளக்கங்களை மையமாகக் கொண்டு, தேசிய மக்கள் சக்தியின் ஜனாதிபதி வேட்பாளர் அநுர குமார திசநாயக்கவின் வெற்றி நாட்டின் நீண்டகால நலனுக்காக அவசியம் எனக் கூறி, தனது உரையை நிறைவு செய்தார்.
