2004 ஆம் ஆண்டு 23 வயது இளைஞரை கொன்ற குற்றத்தில் கைதான 11 பேரையும் குற்றவாளிகளாக இனங்கண்ட பதுளை மேல் நீதிமன்றம் தற்போது அவர்களுக்கு மரண தண்டனை விதித்து தீர்ப்பளித்தது.

பாலித ஆரியவன்ச

ஊவா மாகாணத்தின் பதுளை மேல் நீதிமன்றத்தில் விசாரிக்கப்பட்ட ஊவா பரணகம கலஹகம கொலை வழக்கில் 11 பிரதிவாதிகளுக்கு மேல் நீதிமன்ற நீதிபதி பிரசன்ன அல்விஸ், வெள்ளிக்கிழமை (31) மரண தண்டனை விதித்து தீர்ப்பளித்தார்.

2004 ஆம் ஆண்டு மே 29 ஆம் திகதி கலஹகமவில் உள்ள வாதுவையைச் சேர்ந்த பொன்சுகே பந்துல ஜெயவர்தன திசேரா என்ற 23 வயது திருமணமாகாத இளைஞரின் கொலை தொடர்பாக 13 பிரதிவாதிகள் மீது 11 குற்றச்சாட்டுகளின் கீழ் இந்த வழக்கு தாக்கல் செய்யப்பட்டது.

முதலாம் பிரதிவாதியான சேனக ரஞ்சித் பிரேமரத்ன வழக்கில் இருந்து விடுவித்து மேல் நீதிமன்ற நீதிபதி உத்தரவிட்டார்.

விசாரணையின் போது 7வது பிரதிவாதியான ஆர்.பி.கே. பத்திரன, விசாரணையின் போது இறந்துவிட்டார் என்றும், 12வது பிரதிவாதியான  இந்திக வெளிநாடு சென்றுவிட்டார் என்று விசாரணையின் போது தெரியவந்தது.

ரோஹண ஜகத், கயான் சமிந்த, பி.ஏ. நந்தகுமார, அசங்க செனவிரத்ன, சுனேத் சஜீவ ரூபசிங்க, டி.டபிள்யூ  சமந்தா, டபிள்யூ. ஏ.பி. பண்டார, பி. ஹேமந்த கமலாசிறி, தினேஷ் மஞ்சுள, ருக்மன் இந்திக (வெளிநாடு), மஞ்சுள ரத்நாயக்க ஆகிய 11 பேரையும் குற்றவாளிகளாக இனங்கண்ட பதுளை மேல் நீதிமன்றம் அவர்களுக்கு மரண தண்டனை விதித்து தீர்ப்பளித்தது.

முதல் பிரதிவாதி பாதுகாப்புப் படையைச் சேர்ந்தவர், இறந்தவரின் சகோதரியுடன் காதல் உறவை வளர்த்துக் கொண்டு, அவரை கொழும்புக்கு அழைத்துச் சென்றது தெரியவந்தது. அவர் திருமணமானவர் என்பது தெரியவந்த போது, இறந்தவரின் தந்தை சென்று அவரை மகள் வீட்டுக்கு அழைத்துச் சென்றார்.

இந்த சம்பவம் தொடர்பாக முதல் பிரதிவாதிக்கும் இறந்தவருக்கும் இடையே முன்பு மோதல் இருந்ததாகவும், பொலிஸாரை தொடர்பு கொண்டதாகவும் விசாரணையின் போது தெரியவந்தது.  எனினும், அன்று இரவு 8.30 மணியளவில், முதல் பிரதிவாதி ஒரு வேனில் ஒரு குழுவுடன் வந்துள்ளார். 

மண்வெட்டியால் தாக்கியுள்ளனர். இதன்போது ஒருவர் மரணமடைந்தார். அவரது தந்தை, சகோதரி மற்றும் மைத்துனரை குண்டாந்தடியால்  தாக்கியுள்ளனர்.

விசாரணையில் சாட்சியங்களில் இருந்து, பிரதிவாதிகள் தாங்கள் வந்த வேனில் தப்பிச் சென்ற போது, கொலையாளியின் மைத்துனரும்  பக்கத்து வீட்டுக்காரரும் ஒரு லாரியில் வேனை துரத்திச் சென்று, அதன் உரிமத் தகடு எண்ணைக் குறித்து வைத்து, பொலிஸில் முறைப்பாடு செய்தனர்.

விரைந்து செயற்பட்ட பொலிஸார் சந்தேக நபர்களை அன்றே கைது செய்தனர். தடயவியல் நிபுணர் டாக்டர் பிரியலால் விஜேரத்ன சமர்ப்பித்த பிரேத பரிசோதனை அறிக்கையில், தலையில் ஏற்பட்ட பலத்த காயங்கள் காரணமாக மரணம் நிகழ்ந்துள்ளதாக குறிப்பிடப்பட்டுள்ளது.

20 ஆண்டுகளுக்கும் மேலாக விசாரணையில் உள்ள இந்த வழக்கின் கோப்பு 75 பக்கங்களைக் கொண்டது என்பதும் குறிப்பிடத்தக்கது.