*சீனாவின் முன்னணி மின்சார வாகன உற்பத்தியாளர் BYD, மின்சார மற்றும் பிளக்-இன் ஹைப்ரிட் வாகனங்களின் விலையை 10% முதல் 30% வரை குறைத்ததாக வெளிநாட்டு ஊடகங்கள் செய்தி வெளியிட்டுள்ளன.*
கடந்த வெள்ளிக்கிழமை, BYD நிறுவனம் அறிவித்தபடி, இந்த தள்ளுபடி வரும் ஜூன் மாத இறுதி வரை நடைமுறையில் இருக்கும். இது, பேட்டரி மூலம் இயங்கும் மற்றும் பிளக்-இன் ஹைப்ரிட் வகைகளைச் சேர்ந்த 22 மாடல் வாகனங்களுக்கு 10% முதல் 30% வரை தள்ளுபடியை உள்ளடக்கியதாகும்.
இந்த தள்ளுபடிகள் முக்கியமாக 150,000 யுவான் (அமெரிக்க டாலர் 20,820) மதிப்பிற்கு குறைவான மாடல்களுக்கு பொருந்தும் என வெளிநாட்டு ஊடகங்கள் தெரிவிக்கின்றன.
இந்த தள்ளுபடியில் உள்ளடக்கப்பட்ட மிக உயர்ந்த விலை மாடலாக Xia multipurpose வாகனம் உள்ளது, இதற்கு சுமார் 13% தள்ளுபடி வழங்கப்பட்டுள்ளது. இதன் விலை 200,000 யுவானுக்கு மேல் உள்ளதாக குறிப்பிடப்பட்டுள்ளது.
உதாரணமாக, இந்த தள்ளுபடி அறிவிப்பிற்கு பிறகு, சீன சந்தையில் BYD Seagull வாகனத்தின் விலை இலங்கை மதிப்பில் சுமார் 23 லட்சம் ரூபாவாகவும், BYD Sealion 05 வாகனம் சுமார் 20 லட்சம் ரூபாவாகவும் இருக்கும்.
எனினும், இலங்கையில் இந்த விலைகள் பொருந்தாது. இலங்கையில் நடைமுறையில் உள்ள வரிச் சட்டங்களின்படி, இந்த வாகனங்களின் விலை இவ்வளவு குறைவாக இருக்குமா என்பது சந்தேகத்திற்கிடமாக உள்ளது.
இந்த தள்ளுபடி அறிவிப்பிற்கு காரணமாக, BYD நிறுவனம் இந்த ஆண்டு இறுதிக்குள் தனது வாகன விற்பனையை 5.5 மில்லியன் அலகுகளாக உயர்த்த இலக்கு வைத்துள்ளதாக வெளிநாட்டு ஊடகங்கள் தெரிவிக்கின்றன. இது கடந்த ஆண்டை ஒப்பிடுகையில் 30% அதிகமான விற்பனை இலக்காகும்.
