தமது நாட்டின் மீது மீது ஈரான் கிளஸ்டர் (கொத்து) வெடிமருந்துகள் பொருத்தப்பட்ட ஏவுகணை தாக்குதல்களை மேற்கோள்வதாகவும், இது போர்க்குற்றம் எனவும் இஸ்ரேல் குற்றம் சாட்டுகிறது

பிப்ரவரி 28 முதல் இஸ்லாமிய குடியரசிற்கு எதிராக ‘இஸ்ரேல்’ மற்றும் அமெரிக்கா மேற்கொண்டு வரும் இராணுவ நடவடிக்கைக்குப் பதிலடியாக, ‘இஸ்ரேல்’ மீது ஈரான் நடத்திய தாக்குதல்களில் கிளஸ்டர் (கொத்து) வெடிமருந்துகள் பொருத்தப்பட்ட ஏவுகணைகளை பயன்படுத்தியதாக ‘இஸ்ரேல்’ இராணுவம் வெள்ளிக்கிழமை குற்றம் சாட்டியது.

இந்த ஆயுதங்கள் பயன்படுத்தப்பட்டதாகக் கூறப்படும் துல்லியமான இடம் அல்லது நேரத்தை இராணுவம் குறிப்பிடவில்லை.

இருப்பினும், வியாழக்கிழமை இரவு மத்திய ‘இஸ்ரேலில்’ படமாக்கப்பட்ட வீடியோ காட்சிகளில், பிரகாசமான புள்ளிகள் தரையை நோக்கி இறங்குவதைக் காணமுடிந்ததாக ஏஎஃப்பி (AFP) செய்தி நிறுவனம் தெரிவித்துள்ளது.

இந்தக் காட்சிகளை ஆய்வு செய்த வெடிமருந்து நிபுணர் ஒருவர், அந்தப் படங்கள் கிளஸ்டர் வெடிமருந்துகளைக் கொண்ட ஒரு ஏவுகணை வெடிப்பதைக் காட்டுவதாகத் தெரிவித்துள்ளதாக ஏஎஃப்பி குறிப்பிட்டுள்ளது.

ஈரானியப் படைகள் பல சந்தர்ப்பங்களில் கிளஸ்டர் வெடிமருந்துகளைப் பயன்படுத்தியுள்ளதாக ‘இஸ்ரேல்’ இராணுவ செய்தித் தொடர்பாளர் நடவ் ஷோஷானி செய்தியாளர்களிடம் தெரிவித்தார். “அவர்கள் கிளஸ்டர் வெடிமருந்துகளைப் பயன்படுத்துகின்றனர். பல சம்பவங்களில் அவர்கள் அவற்றை ஒரே நேரத்தில் பயன்படுத்தியுள்ளனர், மேலும் அவற்றை சிவிலியன்களுக்கு எதிராகப் பயன்படுத்துவது ஒரு போர்க்குற்றமாகும்.

நாங்கள் நிலைமையை உன்னிப்பாகக் கண்காணித்து வருகிறோம்,” என்று அவர் கூறினார்.

ஈரானோ அல்லது ‘இஸ்ரேலோ’ 2008 ஆம் ஆண்டு கிளஸ்டர் வெடிமருந்துகள் மீதான உடன்படிக்கையில் கையெழுத்திடவில்லை. இந்த உடன்படிக்கை அத்தகைய ஆயுதங்களைப் பயன்படுத்துதல், உற்பத்தி செய்தல், கையிருப்பில் வைத்திருத்தல் மற்றும் பரிமாற்றம் செய்வதைத் தடை செய்கிறது.

தனித்தனியாக, ‘இஸ்ரேல்’ காவல்துறை கிளஸ்டர் குண்டுகளால் ஏற்படும் அபாயங்கள் குறித்து குடியிருப்பாளர்களுக்கு எச்சரிக்கை விடுத்து வீடியோ செய்தியை வெளியிட்டது. போரின் போது ஏவுகணைகள், ட்ரோன்கள் மற்றும் ஷெல் தாக்குதல்களால் அச்சுறுத்தல்கள் இருந்தாலும், கிளஸ்டர் வெடிமருந்துகள் குறைவாக அறியப்பட்ட ஆனால் அதிக ஆபத்தான அபாயத்தைக் குறிக்கின்றன என்று வெடிபொருள் அகற்றும் தொழில்நுட்ப வல்லுநர் ஒருவர் விளக்கினார்.

கிளஸ்டர் குண்டுகளைக் கொண்ட ஏவுகணை ‘இஸ்ரேலை’ நோக்கி ஏவப்பட்டதாக இந்த வார தொடக்கத்தில் காவல்துறை தெரிவித்தது, இருப்பினும் அதன் துல்லியமான இடம் அல்லது நேரத்தை அதிகாரிகள் வெளிப்படுத்தவில்லை.

ஈரானில் இருந்து ஏவப்பட்டதாகக் கூறப்படும் ஒரு ஏவுகணையின் சிதறல்களை வெடிபொருள் நிபுணர்கள் ஆய்வு செய்ததாகவும், அது கிளஸ்டர் வெடிமருந்துகளுடன் தொடர்புடைய இராணுவக் கூறு என்பதை உறுதிப்படுத்தியதாகவும் காவல்துறை ஒரு அறிக்கையில் தெரிவித்துள்ளது.

கிளஸ்டர் வெடிமருந்துகள் ஒரு பரந்த பகுதியில் ஏராளமான சிறிய வெடிபொருட்களை வெளியிடுகின்றன. இவற்றில் சில வெடிபொருட்கள் தாக்கத்தின் போது வெடிக்கத் தவறிவிடுகின்றன, இது சிவிலியன்களுக்கு நீண்டகால ஆபத்தை ஏற்படுத்துகிறது.
‘இஸ்ரேலில்’ உள்ள இராணுவத் தணிக்கை விதிகள், இராணுவ அல்லது பாதுகாப்பு வசதிகளுக்கு ஏற்படும் சேதங்களை படமாக்கவோ அல்லது அது குறித்து செய்திகளை வெளியிடவோ ஊடகவியலாளர்களுக்குத் தடை விதிக்கின்றன.

சிவிலியன் பகுதிகளில் ஏற்படும் சேதங்கள் குறித்த செய்திகள் அனுமதிக்கப்படுகின்றன, ஆனால் துல்லியமான இடங்களை வெளிப்படுத்த நிருபர்களுக்கு அனுமதி இல்லை.

ஜூன் மாதம் ஈரான் மற்றும் ‘இஸ்ரேல்’ இடையே நடந்த 12 நாள் போரின் போது, ‘இஸ்ரேலில்’ உள்ள சிவிலியன் பகுதிகளில் ஈரான் கிளஸ்டர் வெடிமருந்துகளை வீசியதாக அம்னஸ்டி இன்டர்நேஷனல் குற்றம் சாட்டியதுடன், இச்செயலை “சர்வதேச மனிதாபிமான சட்டத்தின் அப்பட்டமான மீறல்” என்று விவரித்தது.