முன்னாள் கிழக்கு மாகாண ஆளுநர் எம்.எல்.ஏ.ஹிஸ்புல்லா ஜனாதிபதி ரணில் விக்ரமசிங்கவிற்கு ஆதரவு தெரிவிப்பதாக கூறிவிட்டு தற்போது காலை வாரிவிட்டதாக முன்னாள் வாழைச்சேனை காகித ஆலை தவிசாளர் மங்கள செனரத் தெரிவித்துள்ளார்.
கறுவாக்கேணி வாழைச்சேனையில் அமைந்துள்ள சுயேட்சை ஜனாதிபதி வேட்பாளர் தேர்தல் அலுவலகத்தில் நேற்று (16) இடம்பெற்ற ஊடக சந்திப்பொன்றின் போதே அவர் இவ்வாறு கருத்து தெரிவித்துள்ளார்.
அவர் இது தொடர்பாக கூறுகையில்,
பல்வேறுபட்ட அரசியல் சர்ச்சையில மாட்டிக் கொண்டு மாணவர்களின் கற்றலுக்கு பயன்படாது நீண்ட காலமாக மூடிக் கிடந்த புணானை எஸ்.எல்.ரி பல்கலைகழகம் எமது நாட்டின் ஜனாதிபதி ரணில் விக்ரமசிங்கவே அவரது நிலைமை அறிந்து மற்றும் மாணவர்களின் எதிர்கால கல்வி வளர்சி கருதி சம்பிரதாயபூர்வமாக திறந்து வைத்து அதன் நிர்வாகத்திடம் அண்மையில் கையளித்தார்.
அதற்கு நன்றி கடனாக தான் ஜனாதிபதிக்கு விஸ்வாசமாக இருப்பதாகவும் எதிர்கால தேர்தல் நடவடிக்கையின் போது ஜனாதிபதிக்கு நன்றி விஸ்வாசத்துடன் செயல்படப் போவதாகவும் தெரிவித்திருந்தார்.
ஆனால் தற்போது அந்நிலை மறந்து சஜித் பிரேமதாசவிற்கு ஆதரவு தெரிவித்து செயல்பட்டு வருகின்றார். இது அவரது நன்றி மறந்த செயலாகவே நான் கருதுகிறேன். ஏனென்றால் இப்பல்கலைக் கழகத்தை திறப்பதற்கு உள்ள தடைகள் தொடர்பாக முன் நின்று செயல்பட்டு ஜனாதிபதியின் கவனத்திற்கு தெரியப்படுத்தி செயல்பட்டவர்களில் நானும் ஒருவனாகும் அதனாலேயே நடந்த சம்பவம் தொடர்பாக அனைத்து விடயங்களும் நன்கு எனக்கு தெரியும் என்றார்.
இவ்வாறான அரசியல் சூழ்நிலையில் அமைதி காத்திருக்கவேண்டும். சஜித் பிரேமதாசவோ ரவூப் ஹக்கிமோ அவருக்கு இது தொடர்பாக எதுவித உதவியும் செய்யவில்லை. நான் அவருடன் கூட இருந்து இந்த உதவியை ஜனாதிபதி மூலமாக செய்து கொடுத்தேன். ஆகவே தான் இவ்விடயத்தை பகிரங்கமாக ஊடகங்கள் மூலம் தெரிவிக்கிறேன் என்றார்.
2005 இல் இருந்து எனக்கும் அவருக்கும் அரசியல் தொடர்பு உள்ளது, அதன் மூலமாகவே அவரை எனக்கு நன்கு தெரியும். குறித்த விடயம் தொடர்பாக என்னுடன் பேசினார். பல்வேறு பட்ட அமைச்சுப் பதவிகள் மற்றும் ஆளுநராக இருந்தும் என்னால் இப்பல்கலைக் கழகத்தை நடாத்த முடியாத இக்கட்டான சூழ்நிலையில் இருக்கிறேன் என கவலையுடன் அப்போது என்னிடம் கூறினார்.
இதனை நிறைவேற்றிக் கொடுத்ததன் பின்னர் நன்றி மறந்து விட்டார். ஜனாதிபதி அவருடன் பேசுவதற்கு தொடர்பு கொண்ட போதிலும் பேசுவதற்கு மறுப்பு தெரிவித்திருந்தார். இது ஒரு நல்ல செயலாக அவர் கருதுகிறாரா என கேள்வி எழுப்பினார்.
ஜனாதிபதி அவரது கையால் பல்கலைக் கழகத்தை திறந்து வைக்கவேண்டும் என்று கூறி அவராலேயே அதன் நிகழ்ச்சி நிரல் தயாரிக்கப்பட்டது. பல்கலைக் கழகம் திறக்கப்படும் வரை அவர் எம்முடன் இருந்தார். முன்பெல்லாம் அடிக்கடி தொலைபேசி அழைப்பு எடுப்பார். அன்பாக சுகம் விசாரிப்பார். பின்னர் அவரது தொடர்பு படிப்படியாக குறைந்தது. நெருக்கத்தை விலக்கிக் கொண்டு தோற்றத்தையும் மாற்றிக் பஞ்சோந்தி தனமாக செயல்படுகிறார்.
இவர் இவ்வாறு நடந்து கொண்ட விடயத்தை என்னால் ஏற்றுக்கொள்ள முடியவில்லை என அவர் கவலையுடன் மேலும் தெரிவித்தார்.
க.ருத்திரன்
