அனோஜனின் கருத்து சவுதி சட்டப்படி மிகவும் தீவிரமானது.. மன்னிப்பு கிடைப்பது நிச்சயமில்லை.. இங்கு போராட்டம் நடத்தினால் அவரை மேலும் சிக்கலில் தள்ளும்..

இஸ்லாம் மார்க்கத்தை அவமதிக்கும் வகையில் முகநூலில் (Facebook) பதிவிட்டதாகக் கூறி, சவுதி அரேபியாவில் மரண தண்டனை விதிக்கப்பட்டுள்ள இலங்கை வாலிபரான சிவராசா அனோஜனுக்கு பொதுமன்னிப்பு வழங்கி உயிர்ப்பிச்சை அளிக்குமாறு சர்வதேச மனித உரிமைகள் அமைப்பு கொழும்பிலுள்ள சவுதி தூதரகத்தின் ஊடாக சவுதி அரசரிடம் அதிகாரப்பூர்வ கோரிக்கை ஒன்றை சமர்ப்பித்துள்ளது.

தன்னை உடனடியாகக் காப்பாற்ற நடவடிக்கை எடுக்குமாறு அனோஜன் கடந்த இரண்டு நாட்களில் தனது குடும்பத்தினரைத் தொடர்புகொண்டு மன்றாடிக் கேட்டுக்கொண்டுள்ளதுடன், அவரை விடுவிப்பதற்காக அரசியல் கட்சிகள் உட்பட பல தரப்பினரும் தற்போது பல்வேறு நடவடிக்கைகளை மேற்கொண்டு வருகின்றனர்.

சவுதி தூதரகத்தில் கடிதத்தைக் கையளித்த பின்னர் ஊடகங்களுக்குக் கருத்துத் தெரிவித்த சர்வதேச மனித உரிமைகள் அமைப்பின் இயக்குநர் சுபாஷன சுபவிக்ரம, அனோஜன் வெளியிட்டுள்ளதாகக் கூறப்படும் கருத்து அந்நாட்டு சட்டத்தின் கீழ் மிகவும் தீவிரமானது என்பதால், அவருக்கு மன்னிப்பு கிடைக்குமா என்பதை உறுதியாகக் கூற முடியாது எனத் தெரிவித்தார். இருப்பினும், அவரது மரண தண்டனையைக் குறைத்து ஏதேனும் நிவாரணம் வழங்குமாறு சவுதி அரசரிடம் தாழ்மையுடன் கேட்டுக்கொண்டதாக அவர் கூறினார்.

இந்த இக்கட்டான சூழ்நிலையை அரசியல் லாபத்திற்காகப் பயன்படுத்தி இங்கு ஆர்ப்பாட்டங்களை நடத்துவதையோ அல்லது உணர்ச்சிவசப்பட்ட கருத்துக்களை வெளியிடுவதையோ தவிர்க்க வேண்டும் என வலியுறுத்திய சுபவிக்ரம, இத்தகைய செயல்களால் நிர்க்கதியாக உள்ள இளைஞனின் உயிருக்கு மேலும் ஆபத்து ஏற்படும் எனச் சுட்டிக்காட்டினார்.

சவுதி அரேபியாவில் அந்நாட்டுச் சட்டம் மிகவும் கடுமையான முறையில் நடைமுறைப்படுத்தப்படுவதை நினைவுகூர்ந்த அவர், வெளியுறவு அமைச்சு முறையான ஒரு வேலைத்திட்டத்தின் மூலம் இராஜதந்திர மட்டத்தில் மட்டுமே இதில் தலையிட வேண்டும் என்றும், கடந்த காலங்களைப் போலவே இராஜதந்திர பேச்சுவார்த்தைகள் மூலமே அரசாங்கத்தால் நிவாரணம் பெறக்கூடிய வாய்ப்பு அதிகமாக உள்ளது என்றும் மேலும் தெரிவித்தார்.