🔸புத்தளத்துக்கும் இத்தாலிய நகரமொன்றுக்கும் இடையே நட்புறவு ஏற்படுத்த முன்மொழிவு

*புத்தளத்துக்கும் இத்தாலிய நகரமொன்றுக்கும் இடையே நட்புறவு ஏற்படுத்த முன்மொழிவு*

புத்தளம் – இத்தாலியில் உள்ள முக்கியமான நகரமொன்றுடன் புத்தளம் நகரை இணைத்து, இரு நகரங்களுக்கும் இடையே விளையாட்டு, கலாசாரம் மற்றும் பாரம்பரியம் உள்ளிட்ட துறைகளில் அனுபவங்களையும் ஒத்துழைப்பையும் பரிமாறிக்கொள்ளும் வகையில் உடன்படிக்கை ஒன்றை ஏற்படுத்துவதற்கான பிரேரணையை தூய தேசத்திற்கான கட்சியின் தலைவர் மற்றும் புத்தளம் மாநகர சபை உறுப்பினர் இஷாம் மரிக்கார் முன்வைத்துள்ளார்.

சர்வதேச அமைப்புகள் மற்றும் வெளிநாட்டு நிறுவனங்களுடன் தொடர்புகளை ஏற்படுத்தி இலங்கையில் பல்வேறு சமூக மற்றும் அபிவிருத்தி நடவடிக்கைகளை முன்னெடுத்து வரும் இஷாம் மரிக்கார், அதன் தொடர்ச்சியாக புத்தளத்திற்கும் இத்தாலிய நகரமொன்றுக்கும் இடையில் City-to-City Partnership / Sister City உறவை ஏற்படுத்துவதற்கான நடவடிக்கைகளை முன்னெடுத்துள்ளதாக தெரிவிக்கப்படுகிறது.

இந்த ஒத்துழைப்பின் ஊடாக புத்தளம் மற்றும் இத்தாலிய நகரம் ஆகியவற்றுக்கு இடையில் விளையாட்டு, கலாசாரம், பாரம்பரியம், இளைஞர் செயற்பாடுகள் மற்றும் நகர அபிவிருத்தி தொடர்பான அனுபவங்களைப் பகிர்ந்து கொள்வது உள்ளிட்ட பல்வேறு வாய்ப்புகளை உருவாக்க எதிர்பார்க்கப்படுகிறது.

இத்தொடர்பை உத்தியோகபூர்வமாக முன்னெடுப்பதற்காக மாநகர சபையின் அனுமதியைப் பெறும் நோக்கில் குறித்த பிரேரணை சபையில் சமர்ப்பிக்கப்பட்டுள்ளது.

இது நடைமுறைக்கு வந்தால், புத்தளம் நகரத்திற்கு சர்வதேச நகரங்களுடன் நேரடி தொடர்புகளை உருவாக்குவதற்கான புதிய வாய்ப்பாக அமையும் என எதிர்பார்க்கப்படுகிறது.