மனிதநேயம், அர்ப்பணிப்பு மற்றும் அமைதியான தலைமையின் மகத்தான வெற்றி🔸 அனோஜனின் வாழ்வு மீட்டெடுக்கப்பட்ட கதை 🔹சவுதி அரேபியாவின் ஷரீஆ சட்டத்தின் ஊடாக கிடைக்கப்பெற்ற இராஜதந்திர வெற்றி

*மனிதநேயம், அர்ப்பணிப்பு மற்றும் அமைதியான தலைமையின் மகத்தான வெற்றி:* *அனோஜனின் வாழ்வு மீட்டெடுக்கப்பட்ட கதை*

ஒரு நாடு அல்லது சமுதாயம் மிகக் கடுமையான சவால்களையும் நெருக்கடியையும் எதிர்நோக்கும் தருணங்களில், உண்மையான தலைமைத்துவம் என்பது ஊடகக் கூச்சல்களிலோ அல்லது விளம்பர அரசியலிலோ வெளிப்படுவதில்லை, மாறாக, அது அமைதியான, சுயநலமற்ற செயல்களின் மூலமே நிரூபிக்கப்படுகிறது.

சவூதி அரேபியாவில் மரண தண்டனையை எதிர்நோக்கியிருந்த இலங்கையரான அனோஜன் அவர்களின் உயிரைக் காப்பாற்ற முன்னெடுக்கப்பட்ட வெற்றிகரமான முயற்சி, தேசப்பற்றும், தொழிற்துறை ஆளுமையும், மனிதநேயக் கடமையும் ஒன்று சேரும்போது எத்தகைய மகத்தான சாதனையையும் செய்ய முடியும் என்பதற்குச் சிறந்த சான்றாகும்.

*சட்டப் போராட்டமும் சவால்களும் -*
வழக்கின் ஆரம்பகட்ட சட்ட நடவடிக்கைகளில் ஏற்பட்ட கடுமையான நடைமுறைத் தவறு காரணமாக,  சவுதி அரசனின் மன்னிப்பைப் (kings pardon) பெற முடியாத ஒரு சட்டப் பிரிவின் கீழ் அனோஜனின் வழக்கு தொடரப்பட்டிருந்தது.  இதை எடுத்து மேல் முறையீட்டு நீதிமன்றத்தின் இத்தகையதொரு இறுக்கமான தீர்ப்பை மாற்றியமைப்பது என்பது சாதாரண விஷயமல்ல. அதற்குச் சவூதி சட்ட அமைப்பைப் பற்றிய ஆழமான புரிதலும், உன்னிப்பான மூலோபாயமும், சடைவில்லாத சட்டப் போராட்டமும் தேவையாக இருந்தது.

இத்தகைய இமயமலை போன்ற சவாலை எதிர்கொள்ளவே நாட்டின் முன்னணி சட்ட வல்லுநர்கள் கொண்ட குழு ஒன்று முன்வந்தது. சவூதி நாட்டின் முன்னணி சட்ட நிறுவனத்துடன் இணைந்து, இரவு பகல் பாராது உழைத்த இக்குழுவினர், ஒரு சிறு தவறு கூட அனோஜனின் வாழ்க்கையை முடிவுக்குக் கொண்டுவந்துவிடும் என்பதால், ஒவ்வொரு ஆவணத்தையும் மிகத் துல்லியமாக மறுபரிசீலனை செய்தனர். மேல்முறையீட்டு நீதிமன்றத்தின் தீர்ப்பிற்கு எதிராக சவூதி அரேபியாவின் உச்ச நீதிமன்றத்தில் அவர்கள் சமர்ப்பித்த வலுவான மேல்முறையீடானது, இறுதியாக நீதிமன்றத்தின் கருணையைப் பெற்று, நீதிமன்றத்தின் ஊடாகவே ஒரு மனித உயிரைக் காப்பாற்றுவதற்கு வழி வகுத்தது.

இந்த வெற்றி அனோஜனின் குடும்பத்திற்கு மட்டுமன்றி, இனம், மத வேறுபாடுகளுக்கு அப்பால் ஒட்டுமொத்த இலங்கை சமூகத்திற்கும் மாபெரும் நிம்மதியையும் பெருமையையும் தேடித்தந்துள்ளது.

**மலையக சமூகத்திற்கான நன்றிக்கடனும் தேசிய அடையாளமும் -**
இந்த மனிதநேயப் பணியின் முன்னணியில் நின்று வழிநடத்தியவர்  கௌரவ பாராளுமன்ற உறுப்பினரும்  ஜனாதிபதி சட்டத்தரணியுமான பைசர் முஸ்தபா ஆவார் என்பதனை தெரிவித்துக்கொள்வதில் எனக்கு ஒரு கடப்பாடு உண்டு. நாட்டிற்கும் ஒரு சக குடிமகனுக்கும் உண்மையான உதவி தேவைப்பட்ட நேரத்தில், எவ்வித ஊடக விளம்பரங்களையோ அரசியல் லாபங்களையோ எதிர்பார்க்காமல், தனது சொந்தச் செலவில் சவூதி அரேபியாவுக்குப் பயணம் மேற்கொண்டு அனோஜனுக்காக நேரில் முன்னிலையானார்.

மலையக தமிழ் மக்களின் அளப்பரிய ஆதரவோடும் நம்பிக்கையோடும் தேசிய அரசியலில் காலடி எடுத்து  வைத்த ஜனாதிபதி சட்டத்தரணி பைசர் முஸ்தபா அவர்கள்,  இரண்டு தசாப்தங்கள் கடந்தும் அம்மக்களுக்குத் தான் என்றும் நன்றியுள்ளவனாக இருப்பதை இச்செயலின் மூலம் மீண்டுமொருமுறை  நிரூபித்துள்ளார்.

இன்றைய காலகட்டத்தில் விளம்பரத்திற்காக மட்டுமே இயங்கும் அரசியல்வாதிகளுக்கு மத்தியில், இவரது அமைதியான அர்ப்பணிப்பு உண்மையான மக்கள் சேவை என்பது விளம்பரங்களில் இல்லை, அது சமூகத்திற்குச் செய்யும் நன்மைகளிலேயே உள்ளது என்பதை உணர்த்துகிறது.

*கூட்டு முயற்சியும் தலைசிறந்த ஆளுமைகளின் பங்களிப்பும்-*

இந்த வரலாற்றுச் சிறப்புமிக்க வெற்றி என்பது திறமையான சட்ட வல்லுநர்கள், அரசாங்க அதிகாரிகள் மற்றும் இராஜதந்திரிகளின் கூட்டு முயற்சியால் மட்டுமே சாத்தியமானது.

  *ஜனாதிபதி சட்டத்தரணி பைசர் முஸ்தபா:* இந்த மனிதநேயப் போராட்டத்தை முன்னின்று நடத்தி, தனது சொந்தப் பணத்தை செலவழித்து சவூதியில் நேரில் முன்னிலையாகி வாதிட்டவர்.

  *ஜனாதிபதி சட்டத்தரணி உபுல் குமாரப்பெரும:* பைசர் முஸ்தபா அவர்களுடன் கைகோர்த்து, தானும் தனது சொந்தச் செலவிலேயே சவூதி அரேபியாவுக்குப் பயணம் மேற்கொண்டு, தனது சிறந்த சட்ட அறிவால் அனோஜனின் விடுதலைக்காக உறுதியுடன் போராடியவர்.

*அசாத் நவாவி (ஜனாதிபதி சட்டத்தரணி & மேலதிக சொலிசிட்டர் ஜெனரல்):* புத்தளத்தின் புகழ்பெற்ற பொதுப் பிரமுகரான  எம்.எச்.எம். நவாவி அவர்களின் புதல்வரான இவர், அரச அனுசரணையிலான தனது உத்தியோகபூர்வ விஜயத்தின் மூலம் இந்தச் சட்டப் போராட்டத்திற்குப் பலமான இராஜதந்திர மற்றும் சட்ட ஆதரவை வழங்கினார்.

  *சட்டத்தரணி ஹஃபீல் பாரிஸ்:* ஜனாதிபதி சட்டத்தரணி பைசர் முஸ்தபாவின் இளம் சுறுசுறுப்பான  உதவி சட்டத்தரணி இவர், சவூதி சட்ட நிறுவனத்துடன் இணைந்து மிகச் சிக்கலான ஆவணங்களை எவ்வித பிழையுமின்றித் தயாரிப்பதில் இரவு பகலாகத் தனது முழுமையான அர்ப்பணிப்பை வழங்கினார்.

  *தூதுவர் அமீர் அஜ்வத் (சவூதி அரேபியாவிற்கான இலங்கைத் தூதுவர்):* இலங்கைச் சட்டக் குழு வருகை தருவதற்கு முன்பிருந்தே தேவையான பூர்வாங்கப் பணிகளை நேர்த்தியாகச் செய்து, கடும் அழுத்தங்களுக்கு மத்தியிலும் சவூதி அதிகாரிகளுடனும் சட்ட நிறுவனங்களுடனும் இலங்கைத் தரப்பை ஒருங்கிணைத்துச் சிறப்பான முறையில் வழிநடத்தியவர்.

மற்றும் பாராளுமன்ற உறுப்பினர் பைஸர் முஸ்தபாவின் ஒருங்கிணைப்புச் செயலாளர் மொஹமட் ரியாஸ்தீன் சில்மி ஆகியோர் இடம்பெற்றிருந்தமை குறிப்பிடத்தக்கது.

*இலங்கை அரசாங்கம்:* இராஜதந்திர ரீதியிலான முழுமையான ஆதரவையும் பின்னணியையும் வழங்கி, உயர் மட்டச் பேச்சுவார்த்தைகள் தடையின்றி நகர வழிவகுத்த ஜனாதிபதி உட்பட அரசாங்கத்துக்கு மற்றும் இதற்காக குரல் கொடுத்த எதிர்கட்சித் தலைவர் உட்பட ஒட்டுமொத்த எதிர்க்கட்சிக்கும் எனது நன்றியை தெரிவித்துக் கொள்கின்றேன்.

*விளம்பரங்களுக்கு அப்பால், உண்மையான தேசப்பற்று -*
சமூக வலைத்தளங்களில் கருத்துக்களை மட்டும் பதிவிடும் தற்காலச் சூழலில், சொற்களை விடச் செயலே சிறந்தது என்பதை இக்குழுவினர் நிரூபித்துள்ளனர். தங்களது சொந்தப் பணம், நேரம் மற்றும் தொழில்முறைப் புகழைப் பணயம் வைத்துச் செயல்பட்ட இப் பிரமுகர்கள், ஒரு சக குடிமகனின் உயிர் ஆபத்தில் இருக்கும்போது இலங்கை மக்கள் இனம், மதம் கடந்து ஒன்றாக நிற்பார்கள் என்பதற்குச் சிறந்த முன்னுதாரணமாகத் திகழ்கின்றனர்.

சவூதி அரேபியாவில் பெறப்பட்ட இந்த அமைதியான வெற்றி என்பது மனிதநேயம், சகோதரத்துவம் மற்றும் இராஜதந்திரத்திற்கு கிடைத்த மாபெரும் வெற்றியாகும். விளம்பர வெளிச்சங்களின்றி அமைதியாகச் செயல்பட்டு அனோஜனின் உயிரைக் காப்பாற்றிய இந்த உண்மையான கதாநாயகர்களுக்கு ஒட்டுமொத்த இலங்கையும் தனது மனமார்ந்த நன்றிகளைத் தெரிவித்துக் கொள்கிறது.

வசீர் முக்தார்
முன்னாள் பி.ச உறுப்பினரும்
கண்டி மாவட்ட அரசியல் செயல்பாட்டாளரும்.