சவூதியில் இலங்கையர்களின் பாதுகாப்பு குறித்து கவலை – ரியாத், தம்மாம் நேரடி வானூர்தி சேவைகள் நவம்பர் 1 வரை இடைநிறுத்தம்!

சவூதி அரேபியாவில் பொதுமக்கள் உட்கட்டமைப்புகள் மற்றும் எரிசக்தி நிலையங்கள் மீதான தாக்குதல்கள் அதிகரித்துள்ள நிலையில், அங்கு பணிபுரியும் இலங்கைத் தொழிலாளர்கள் மற்றும் உம்ரா யாத்திரிகர்களின் பாதுகாப்பு குறித்து கவலைகள் எழுந்துள்ளன.

இந்நிலையில், சவூதி அரேபியாவின் ரியாத் மற்றும் தம்மாம் நகரங்களில் அண்மைய சம்பவங்களால் இலங்கையர்கள் எவரும் பாதிக்கப்பட்டதாகத் தகவல் கிடைக்கவில்லை என இலங்கை வெளிவிவகார அமைச்சு தெரிவித்துள்ளது. எனினும், அங்கு நிலவும் பாதுகாப்புச் சூழல் காரணமாக, இலங்கைப் பணியாளர்கள் மற்றும் யாத்திரிகர்களின் பாதுகாப்பு தொடர்பில் அவதானம் செலுத்த வேண்டிய நிலை ஏற்பட்டுள்ளது.

பிராந்தியப் பாதுகாப்பு நிலைமையைக் கருத்திற்கொண்டு, கொழும்பு – ரியாத் மற்றும் கொழும்பு – தம்மாம் இடையிலான அனைத்து நேரடி வானூர்தி சேவைகளையும் நவம்பர் 1ஆம் திகதி வரை தற்காலிகமாக இடைநிறுத்தியுள்ளதாக ஸ்ரீலங்கன் எயார்லைன்ஸ் அறிவித்துள்ளது.

இதற்கிடையில், சவூதி அரேபியாவுக்குச் செல்லத் திட்டமிடும் உம்ரா யாத்திரிகர்கள் மற்றும் பயண ஏற்பாட்டாளர்கள் தேவையான முன்னெச்சரிக்கை நடவடிக்கைகளை மேற்கொள்ளுமாறு இலங்கை ஹஜ் குழு அறிவுறுத்தியுள்ளது. வானூர்தி பயணங்களில் இடையூறுகள் ஏற்படக்கூடிய சாத்தியம் உள்ளதால், யாத்திரிகர்களின் பாதுகாப்பையும் அவசரகாலத் திரும்பும் பயண ஏற்பாடுகளையும் உறுதிப்படுத்துமாறும் வலியுறுத்தப்பட்டுள்ளது.

சவூதி அரேபியாவில் தற்போது தங்கியுள்ள இலங்கை உம்ரா யாத்திரிகர்களின் எண்ணிக்கை குறித்த புதுப்பிக்கப்பட்ட உத்தியோகபூர்வத் தரவுகள் பொதுவெளியில் இல்லை எனத் தெரிவிக்கப்பட்டுள்ளது. ஹஜ் யாத்திரையைப் போலன்றி, உம்ரா யாத்திரையை ஆண்டு முழுவதும் மேற்கொள்ள முடியும் என்பதால், அதற்கான பயணங்கள் பெரும்பாலும் தனியார் பயண ஏற்பாட்டாளர்கள் ஊடாக ஒழுங்கமைக்கப்படுகின்றன.

யாத்திரிகர்கள் சவூதி அரேபியாவில் சிக்கிக்கொள்ளும் நிலை ஏற்பட்டால், அவர்களைப் பாதுகாப்பாக நாட்டுக்குத் திருப்பி அழைத்து வருவதற்கான ஏற்பாடுகளைப் பயண நிறுவனங்கள் முன்கூட்டியே மேற்கொள்ள வேண்டும் என ஹஜ் மற்றும் உம்ரா குழுத் தலைவர் ரியாஸ் மிஹுலர் வலியுறுத்தியுள்ளார்.

மேலும், ஜித்தா ஊடான வானூர்தி பயணங்களில் இடையூறுகள் ஏற்படக்கூடிய சாத்தியம் குறித்தும் இலங்கைப் பிரஜைகள் அவதானமாக இருக்குமாறு ஜித்தாவிலுள்ள இலங்கைத் துணைத் தூதரகம் அறிவுறுத்தியுள்ளது. சவூதி அரேபியாவில் பணிபுரியும் இலங்கையர்கள் மற்றும் அங்கு பயணம் மேற்கொள்ளும் யாத்திரிகர்கள், உத்தியோகபூர்வ அறிவிப்புகளைப் பின்பற்றி தமது பாதுகாப்பை உறுதிப்படுத்திக்கொள்ளுமாறு அறிவுறுத்தப்படுகின்றனர்.