ஒரு போத்தல் சாராயத்திற்கும் 1,000 அல்லது  2,000 ரூபா பணத்திற்கும் விற்பனைக்காகும் பொலிஸ் படையே எம்மிடம் உள்ளது ; இறுதிச் சடங்கில் பொலிஸாரை கடுமையாக விமர்சித்த பௌத்த தேரர்

ஹோமாகம பொலிஸ் காவலில் இருந்தபோது உயிரிழந்த இளைஞனின் இறுதிச் சடங்கில் கலந்துகொண்ட பௌத்த துறவி ஒருவர், அந்த பொலிஸ் நிலையத்தின் அத்துமீறல்கள் குறித்து அதிகாரிகளுக்கு ஒரு மாதத்திற்கு முன்பே தெரிவிக்கப்பட்டதாகக் குற்றம்சாட்டியுள்ளார்.

இறுதிச் சடங்கில் உரையாற்றிய அவர், ஹோமாகம பிரதேச செயலகத்தில் நடைபெற்ற ‘ஒன்றிணைந்த நாடு’ நிகழ்வில் கலந்து கொண்டபோது, அங்கிருந்த  பொறுப்புள்ள அமைச்சரிடம் ஹோமாகம பொலிஸ் அதிகாரிகளின் நடந்துகொள்ளும் முறை குறித்து கவனத்திற்கு கொண்டு சென்றதாகக் கூறினார்.

அப்போது, இந்தச் சம்பவத்துடன் தொடர்புடைய அதிகாரி உட்பட ஹோமாகம பொலிஸ் நிலைய அதிகாரிகளின் தவறான நடத்தைகள் பற்றி எடுத்துரைத்து, உடனடியாக நடவடிக்கை எடுக்குமாறு கேட்டுக்கொண்டதாக அவர் தெரிவித்தார்.

அந்த நிகழ்வின் போது பொலிஸ் நிலையப் பொறுப்பதிகாரியிடம் (OIC) இது குறித்து கேள்வி எழுப்பப்பட்டதாகவும், இது தொடர்பான தகவல்கள் கிடைத்துள்ளதை ஒப்புக்கொண்ட அதிகாரிகள், பிரச்சினைக்கு தீர்வு காண்பதாக உறுதியளித்ததாகவும் அவர் குறிப்பிட்டார்.

உயிரிழந்த இளைஞனின் நண்பர் ஒருவரும் இதே போன்ற சூழ்நிலையில் தாக்கப்பட்டு கைது செய்யப்பட்டதாக அவர் குற்றம்சாட்டினார். அத்துடன், ஹோமாகம பொலிஸாரால் ‘குருசிங்க’ என்ற அதிகாரியால் அப்பகுதி மக்கள் பலர் பல்வேறு சம்பவங்களில் தாக்கப்பட்டுள்ளதாகவும், இதனால் பலருக்கு எலும்பு முறிவுகள் ஏற்பட்டுள்ளதாகவும் அவர் கூறினார்.
சட்டம் ஒழுங்கைப் பேணுவதே பொலிஸாரின் பொறுப்பாகும் என்றும், பொதுமக்களைத் தாக்குவது அல்ல என்றும் அவர் சுட்டிக்காட்டினார். பொலிஸ் காவலில் ஏற்படும் உயிரிழப்புகளைத் தடுக்கத் தவறியதற்காக பொலிஸ் திணைக்களத்தையும் அரசாங்கத்தையும் கடுமையாக விமர்சித்த அவர், பொலிஸ் திணைக்களம் பட்சபாதமாகச் செயல்படுவதாகவும் குற்றம்சாட்டினார்.
வெலிக்கடை பொலிஸ் காவலில் பதுளையைச் சேர்ந்த இளைஞர் உயிரிழந்த சம்பவத்தைச் சுட்டிக்காட்டிய துறவி, உயிரிழந்த இஷார ஹர்ஷ குமார இந்த வரிசையில் முதலாவது நபரும் அல்ல, கடைசி நபரும் அல்ல என்று கூறினார்.

ஊடகங்கள் இந்தச் செய்தியை வெளியிட்டிராவிட்டால், அந்த இளைஞர் மாரடைப்பால் உயிரிழந்ததாகக் கூறி குடும்பத்தினரை நம்ப வைத்திருப்பார்கள் என்றும், திடீர் நோயினால் மரணம் ஏற்பட்டதாக பொலிஸ் ஊடகப் பேச்சாளர் தெரிவித்த கருத்தையும் அவர் கடுமையாக விமர்சித்தார்.

சில பொலிஸ் அதிகாரிகள் சிறிய லஞ்சங்களுக்காகத் தங்கள் நேர்மையை அடகு வைப்பதாகக் குற்றம்சாட்டிய அவர், “ஒரு போத்தல் சாராயத்திற்கும் ரூ. 1,000 அல்லது ரூ. 2,000 பணத்திற்கும் விற்பனைக்காகும் பொலிஸ் படையே நம்மிடம் உள்ளது” என்று தெரிவித்தார்.

பொலிஸ் திணைக்களம் மீது மக்களுக்கு இருக்கும் நம்பிக்கை குறித்து கேள்வி எழுப்பிய அவர், தவறுகளைச் சுட்டிக்காட்டியதற்காகத் தனக்கு ஏற்படக்கூடிய அச்சுறுத்தல்கள் குறித்தும் கவலை வெளியிட்டார்.
உயிரிழந்த இஷாரவின் குடும்பத்திற்கு நீதி கிடைக்க வேண்டும் எனக் கோரிய அவர், பொலிஸ் அத்துமீறல்கள் குறித்த குற்றச்சாட்டுகளுக்கு அதிகாரிகள் பொறுப்பேற்க வேண்டும் என்றும் வலியுறுத்தினார்.