76 ஆண்டுகளாக இந்நாட்டின் ஆட்சி முறைமையில் குவிந்து கிடக்கும் பிரச்சினைகளை 22 மாதங்கள் போன்ற குறுகிய காலத்தில் தீர்ப்பார் என எதிர்பார்க்க முடியாது என்று தோட்டப் பயிர்கள் மற்றும் சமூக உள்கட்டமைப்பு வசதிகள் அமைச்சர் சமந்த வித்யாரத்ன கூறுகிறார்.
பதுளை மாவட்ட மாநாட்டில் உரையாற்றுகையிலேயே அமைச்சர் இதனைத் தெரிவித்தார்.
தற்போது இலங்கை வரலாற்றிலேயே மிகச் சிறிய அமைச்சரவையினாலேயே ஆட்சி செய்யப்படுவதாகவும், ஜனாதிபதி உட்பட அதில் 23 உறுப்பினர்கள் மட்டுமே உள்ளதாகவும் அவர் சுட்டிக்காட்டினார். “ஒருவேளை சகோதரர் அனுர குமார திசாநாயக்க ஜனாதிபதியாக வராமல் இருந்திருந்தால், இன்றைக்கு அமைச்சரவையில் எத்தனை பேர் இருந்திருப்பார்கள்?” என்றும் அவர் அங்கு கேள்வி எழுப்பினார்.
மக்களுக்கு நிவாரணங்களும் சலுகைகளும் கிடைக்கும் போது அவர்கள் அது குறித்து மகிழ்ச்சியடைகிறார்கள், ஆனால் மற்றொரு தரப்பினர் அது குறித்து பொறாமையுடனும் வெறுப்புடனும் இருப்பதாக அமைச்சர் குறிப்பிட்டார்.
குறிப்பாக, இந்நாட்டை ஆண்ட தோல்வியடைந்த ஆட்சியாளர்களும் குற்றவாளிகளும் தற்போதைய அரசியல் மாற்றத்தைக் கண்டு பெரும் அதிர்ச்சியடைந்துள்ளதாகவும் அவர் மேலும் வலியுறுத்தினார்.
ஏழு தசாப்தங்களுக்கும் மேலாக உருவான நெருக்கடிகளைத் தீர்ப்பதற்கு நேரம் தேவை என்றும், தற்போதைய அரசாங்கம் அதற்காக முறைப்படி நடவடிக்கை எடுத்து வருவதாகவும் அமைச்சர் சமந்த வித்யாரத்ன மேலும் தெரிவித்தார்.
