தீவிரம் அடைந்து வரும் எல் நினோ நிலைமை, இந்தியப் பெருங்கடல் இருமுனை (Indian Ocean Dipole) மாற்றம் மற்றும் மத்திய கிழக்கில் நிலவும் நெருக்கடிகள் காரணமாக ஆசிய-பசுபிக் பிராந்தியம் தீவிரமான மற்றும் சிக்கலான ஆபத்துகளை எதிர்நோக்கியுள்ளதாக ஐக்கிய நாடுகள் சபையின் பல துணை அமைப்புகள் இணைந்து
வெளியிட்டுள்ள புதிய அறிக்கையில் தெரிவிக்கப்பட்டுள்ளது.
2026 ஆகஸ்ட் 28 ஆம் திகதியிட்ட இந்த அறிக்கையானது, இந்த சூழ்நிலைகளின் காரணமாக பிராந்தியத்தில் உணவு, எரிபொருள் மற்றும் உரங்களின் விலைகள் கடுமையாக உயரக்கூடும் என்று சுட்டிக்காட்டுகிறது.
ஐக்கிய நாடுகளின் உணவு மற்றும் விவசாய அமைப்பு (FAO), உலக உணவுத் திட்டம் (WFP), ஐ.நா பெண்கள் அமைப்பு (UN Women) மற்றும் உலக விண்கல் அமைப்பியல் நிறுவனம் (WMO) ஆகியவை இணைந்து தயாரித்த இந்த அறிக்கையின்படி, தற்போது நிலவும் எல் நினோ நிலைமை வரலாற்றிலேயே மிகக் கடுமையான காலநிலை மாற்றமாக உருவெடுக்கக்கூடும் என்றும், இதன் தாக்கம் 2027 ஆம் ஆண்டு வரை நீடிக்கக்கூடும் என்றும் தெரிவிக்கப்பட்டுள்ளது.
இதன் காரணமாக, இப்பிராந்தியத்தில் கூடுதலாக 8.2 மில்லியன் மக்கள் கடுமையான உணவுப் பாதுகாப்பின்மையை எதிர்கொள்வார்கள் என மதிப்பிடப்பட்டுள்ளது.
இந்த ஆபத்தான சூழ்நிலையில், இலங்கை ‘இரண்டாம் நிலை’ (Tier 2) ஆபத்து கொண்ட நாடாகப் பட்டியலிடப்பட்டுள்ளது. 2026 ஒக்டோபர் மாதம் முதல் தொடங்கும் இரண்டாவது இடைக்கால பருவமழை மற்றும் வடகிழக்கு பருவமழையுடன் இலங்கையில் வழக்கத்தை விட அதிக மழைவீழ்ச்சி பதிவாக வாய்ப்புள்ளதாக அறிக்கை சுட்டிக்காட்டுகிறது.
இது நாட்டின் முக்கிய நெல் உற்பத்தி பருவமான ‘மகா பருவம்’ (Maha Season) உடன் ஒத்துப்போவதால், கடுமையான மழை மற்றும் வெள்ளப் பெருக்கு காரணமாக பயிர்ச்செய்கை நடவடிக்கைகள் மற்றும் அறுவடை கடுமையாகப் பாதிக்கப்படலாம்.
மேலும், மத்திய கிழக்கு நெருக்கடி காரணமாக இலங்கையில் எரிபொருள் விலைகள் நெருக்கடிக்கு முந்தைய காலத்துடன் ஒப்பிடும்போது 40% க்கும் மேல் அதிகமாகவே நீடிப்பதாலும், உரம் இறக்குமதியைச் சார்ந்திருக்க வேண்டியுள்ளதாலும் விவசாய உற்பத்திச் செலவு மேலும் அதிகரிக்கக்கூடும் என அறிக்கை வலியுறுத்துகிறது.
இந்த நெருக்கடியான சூழ்நிலையினால் பெண்களும் சிறுமிகளும் மிகவும் பாதிக்கப்படக்கூடிய சூழல் உருவாகலாம் என்றும் அறிக்கை குறிப்பிட்டுள்ளது. உணவுப் பொருட்கள் விலை உயர்வாலும், நீர் பற்றாக்குறையாலும் ஏற்படும் பொருளாதார அழுத்தங்கள் காரணமாக குடும்பங்களுக்குள் வன்முறைகள் அதிகரிக்கும் அபாயம் உள்ளது.
சாத்தியமான பாதிப்புகளைக் குறைப்பதற்கு தேசிய அளவில் உடனடித் தயார்நிலையும் முன் நடவடிக்கைகளும் அவசியம் என ஐக்கிய நாடுகள் சபை சுட்டிக்காட்டியுள்ளதுடன், காலநிலை முன்னறிவிப்புகளைத் தொடர்ந்து அவதானிக்குமாறும், விவசாய உள்ளீடுகளை நிர்வகிப்பதற்கான முறையான வேலைத்திட்டத்தை உருவாக்குமாறும் பிராந்திய அரசாங்கங்களைக் கேட்டுக்கொண்டுள்ளது.
