இலங்கையும் எதிர்க்கட்சி இல்லாத (ஒற்றைக் கட்சி) ஆட்சியை நோக்கிச் செல்லும்.. உலகில் அப்படியான நாடுகள் உள்ளன.. – மாலிமா பாராளுமன்ற உறுப்பினர்

மக்களின் அடிப்படைப் பிரச்சினைகளுக்கு நிலையான தீர்வுகளை வழங்கிய பின்னர், நாட்டின் அரசியல் களத்தில் ஏனைய அரசியல் கட்சிகளின் தேவை எழாது என்றும், அதற்கமைய நாடு ஒற்றைக் கட்சி ஆட்சியை நோக்கிச் செல்லும் என்றும் தேசிய மக்கள் சக்தியின் (மாலிமா) பாராளுமன்ற உறுப்பினர் லக்ஷ்மன் நிபுணஆரச்சி தெரிவித்தார்.

மக்கள் சந்திப்பொன்றில் உரையாற்றியபோதே பாராளுமன்ற உறுப்பினர் இந்த சர்ச்சைக்குரிய கருத்தை வெளியிட்டுள்ளார்.

22வது அரசியலமைப்புத் திருத்தத்தின் மூலம் இவ்வாறான ஒற்றைக் கட்சி ஆட்சிக்கு வழிவகுக்கும் என முன்வைக்கப்படும் குற்றச்சாட்டுகள் முற்றிலும் உண்மைக்குப் புறம்பானவை என்றும் அவர் சுட்டிக்காட்டினார்.

உலகின் சில நாடுகளில் நடைமுறையிலுள்ள ஆட்சி முறைகளை உதாரணம் காட்டிப் பேசிய அவர், அந்நாடுகளில் ஒரே குழுவினர் தொடர்ச்சியாக அதிகாரத்தில் இருந்து வருவதாகவும், வேறு எந்தத் தரப்பினரும் தேர்தலில் போட்டியிடக்கூட முயற்சி செய்வதில்லை என்றும் கூறினார்.

“எங்களது துறைமுக கூட்டுறவுச் சங்கத் தேர்தலிலும் இதுதான் நடக்கிறது. அங்கு வேறு யாரும் வாக்கு கேட்பதில்லை, நாங்கள் மட்டுமே கேட்கிறோம். மக்களின் பிரச்சினைகளைச் சரியாகத் தீர்த்து வைத்தால் பிறகு எதற்கு வேறு கட்சிகள்? இதை எழுதி வைத்துக்கொள்ளுங்கள்,” என அவர் வலியுறுத்தினார்.

தற்போதைய அரசியல் கலாசாரத்தில் மாற்றத்தை எதிர்பார்க்கும் இக்காலகட்டத்தில், பாராளுமன்ற உறுப்பினர் வெளியிட்ட இந்த அறிக்கை அரசியல் களத்தில் பெரும் விவாதத்தை ஏற்படுத்தியுள்ளது.