கொழும்பில் பாடசாலை மாணவியை கடத்த முயற்சித்த நபரை தேடும் பொலிஸார் – தெரிந்தவர்கள் அறிவிக்குமாறும் வேண்டுகோள்

*கொழும்பில் பிரபல பெண்கள் பாடசாலை அருகே மாணவி கடத்தல் முயற்சி: பொலிஸார் விசாரணை*

கொழும்பில் உள்ள பிரபல பெண்கள் பாடசாலை ஒன்றின் அருகே சென்ற வியாழக்கிழமை மாணவி கடத்தல் முயற்சி ஒன்று பதிவாகியுள்ளதாக பொலிஸார் தெரிவித்துள்ளனர்.

இச்சம்பவம் தொடர்பாக பொலிஸார் விசாரணைகளை ஆரம்பித்துள்ளதுடன், பொதுமக்களின் உதவியையும் கோரியுள்ளனர்.

பொலிஸாரின் தகவலின்படி, தாய் ஒருவர் தனது மகளை பாடசாலையில் இருந்து அழைத்து வருவதற்காக தனது வாகனத்தில் வந்திருந்தார்.

அப்போது, வாகனம் நிறுத்தப்பட்டிருந்த நிலையில், அடையாளம் தெரியாத நபர் ஒருவர் வாகனத்தின் பின்புற இருக்கையில்  மாணவி அமர்ந்திருந்த இடத்தில் ஏறியுள்ளார்.

பின்னர், அந்த நபர் தாயிடம் வாகனத்தை முன்னோக்கி ஓட்டுமாறு கட்டளையிட்டுள்ளார்.

ஆனால், தாய் அதற்கு மறுத்து, தனது மகளை அந்த நபரிடமிருந்து பாதுகாப்பாக இழுத்து, வாகனத்திலிருந்து வெளியேறி உதவிக்காக கூச்சலிட்டுள்ளார்.

இதனையடுத்து, சந்தேக நபர் சம்பவ இடத்திலிருந்து தப்பியோடியுள்ளார்.

பொலிஸார் ஆய்வு செய்த பாதுகாப்பு கமரா காட்சிகளில், இதே நபர் ஏப்ரல் 29 மற்றும் 30 ஆம் திகதிகளில் பாடசாலை அருகே சுற்றித் திரிந்தது கண்டறியப்பட்டுள்ளது.

இந்த சம்பவம் தொடர்பாக தகவல் அறிந்தவர்கள் 011-2695411 என்ற தொலைபேசி இலக்கத்திற்கு அழைத்து பொலிஸாருக்கு தெரிவிக்குமாறு கோரப்பட்டுள்ளனர்.