இஸ்ரேலுடனான உறவுகளை இலங்கை திடீரென முறித்தால், பொருளாதாரம் சரியும் – சவுதி, சீனா, ரஷ்யா போன்ற நாடுகளைப் போல, பாலஸ்தீனத்தை ஆதரித்தாலும், இராஜதந்திர மற்றும் பொருளாதார நோக்கங்களுக்காக இஸ்ரேலுடன் உறவுகளைத் தொடர்வோம் ; அமைச்சர் பிமல் விளக்கம்
*இலங்கை – இஸ்ரேல் பொருளாதார உறவுகள் குறித்து அமைச்சர் பிமல் விளக்கம்*
இஸ்ரேல் ஆக்கிரமிப்பில் உள்ள பாலஸ்தீன பிரதேசங்களுக்கு இலங்கை தொழிலாளர்களை அனுப்ப மாட்டோம் என அமைச்சர் பிமல் ரத்நாயக்க தெரிவித்தார்.
நிருபர்களிடம் பேசிய அமைச்சர், இஸ்ரேலுடன் இராஜதந்திர மற்றும் பொருளாதார உறவுகளை பேணும் பல நாடுகளைப் போலவே, இலங்கையும் தனது பொருளாதார நலன்களுக்காக தொழிலாளர்களை அனுப்புவது உள்ளிட்ட உறவுகளைத் தொடர வேண்டும் என்றார்.
“இஸ்ரேலுடனான உறவுகளை இலங்கை திடீரென முறித்தால், பொருளாதாரம் சரியும். இஸ்ரேலில் தற்போது பணியாற்றும் இலங்கை தொழிலாளர்கள் வேலையை இழக்க நேரிடும். இதை எம்மால் செய்ய முடியாது. சவுதி அரேபியா, சீனா, ரஷ்யா போன்ற நாடுகளைப் போல, பாலஸ்தீனத்தை ஆதரித்தாலும், இராஜதந்திர மற்றும் பொருளாதார நோக்கங்களுக்காக இஸ்ரேலுடன் உறவுகளைத் தொடர்வோம்,” என்று அவர் கூறினார்.
பாலஸ்தீன மோதல் காரணமாக இஸ்ரேலுடனான இராஜதந்திர மற்றும் பொருளாதார உறவுகளை முடிவுக்கு கொண்டுவர முடியாது என்பது இலங்கையின் பொருளாதாரத்திற்கு பாதிப்பை ஏற்படுத்தும் என அமைச்சர் விளக்கினார்.
“நாம் சுதந்திரமான பாலஸ்
தீன அரசையும், சுதந்திரமான இஸ்ரேல் அரசையும் நம்புகிறோம். இலங்கை இவற்றை இரு தனித்தனி அரசுகளாக கருதுகிறது. எனவே, இஸ்ரேலுடன் அரசியல் மற்றும் பொருளாதார உறவுகளைத் தொடர வேண்டியிருக்கும்,” என்று அவர் மேலும் தெரிவித்தார்.
இலங்கை சுதந்திர பாலஸ்தீன அரசுக்கு உறுதியாக ஆதரவளிப்பதாகவும், இஸ்ரேலின் தாக்குதல்களால் அப்பாவி உயிர்கள் பலியாவதை வன்மையாகக் கண்டிப்பதாகவும் அமைச்சர் பிமல் ரத்நாயக்க மீண்டும் வலியுறுத்தினார்.
பாலஸ்தீனத்தின் மீதான தாக்குதல்கள் காரணமாக இஸ்ரேலுக்கு தொழிலாளர்களை அனுப்புவதை இலங்கை நிறுத்த வேண்டும் என்று நாடாளுமன்ற உறுப்பினர் ரவூப் ஹக்கீம் அண்மையில் தெரிவித்த கருத்துக்கு பதிலளிக்கும் விதமாக அமைச்சர் இந்த கருத்துகளை வெளியிட்டார்.
