இஸ்ரேல் காஸாவில் நடத்தும் தாக்குதலை இனப்படுகொலை எனவும், அரச பயங்கரவாதம் மற்றும் மனிதபிமான பேரவலம் என சஜித் பிரேமதாச பாராளுமன்றில் தெரிவிப்பு

இஸ்ரேலின் காசா மீதான தொடர்ச்சியான இராணுவத் தாக்குதல்களை “பாலஸ்தீன மக்களுக்கு எதிரான இனப்படுகொலை” என இலங்கை எதிர்க்கட்சித் தலைவர் சஜித் பிரேமதாச கடுமையாகக் கண்டித்துள்ளார். இது சர்வதேச சட்டங்களை மீறும் செயல் என்றும் அவர் குறிப்பிட்டார்.

நாடாளுமன்றத்தில் உரையாற்றிய சஜித் பிரேமதாச, இஸ்ரேலின் இராணுவ நடவடிக்கைகள், மருத்துவமனைகள் மீதான குண்டுவீச்சு, உணவு விநியோகத்திற்கு விதிக்கப்பட்ட தடைகள் ஆகியவை குழந்தைகள், தாய்மார் மற்றும் பொதுமக்களை இலக்கு வைத்து மேற்கொள்ளப்படும் “அரச பயங்கரவாதம்” என விமர்சித்தார். மனித உரிமைகளை ஆதரிக்கும் அனைவரும் இத்தகைய செயல்களை வன்மையாகக் கண்டிக்க வேண்டும் என்று அவர் வலியுறுத்தினார்.

இஸ்ரேல் ஐக்கிய நாடுகள் பொதுச் சபையின் 241 மற்றும் 338 தீர்மானங்களை மீறுவதாகவும், இரு-நாடு தீர்வை அழிக்கும் நோக்கில் காசா மீது தாக்குதல் நடத்துவதாகவும் பிரேமதாச குற்றம்சாட்டினார். பாலஸ்தீன மக்களின் பெரும் உயிரிழப்புகளுக்கு இரங்கல் தெரிவித்த அவர், இதனை ஒரு மனிதாபிமான பேரவலமாக வர்ணித்தார்.

1948ஆம் ஆண்டு தொடங்கி, 1956, 1967, 1973, 1978 ஆகிய ஆண்டுகளில் நடந்த போர்கள் உள்ளிட்ட இஸ்ரேல்-பாலஸ்தீன மோதலின் நீண்ட வரலாற்றை அவர் நினைவுகூர்ந்தார். உலகளாவிய ஒருமித்த கருத்தாக இரு-நாடு தீர்வு இருந்தபோதிலும், இஸ்ரேலின் செயல்கள் அமைதி முயற்சிகளை பின்னடையச் செய்துள்ளதாக அவர் கூறினார்.

“இது வெறுமனே அரசியல் பிரச்சினை அல்ல, இது ஒரு மனிதாபிமான நெருக்கடி. மனித உரிமைகளுக்காக தெளிவான நிலைப்பாட்டை எடுக்க பயப்படக் கூடாது,” என பிரேமதாச நாடாளுமன்றத்தில் தெரிவித்தார்.