விபத்தின் போது முன்னாள் சபாநாயகர் அசோக ரன்வல மதுபோதையில் இருக்கவில்லை – வாகனம் சரியாக பராமரிக்கப்டாததால்ஏற்பட்ட பிரேக் செயலிழப்பு தான் விபத்துக்கு காரணம் ;  அமைச்சர் விஜித ஹேரத் விளக்கம்

அசோக ரன்வல விபத்து விவகாரம்:  அமைச்சர் விஜித ஹேரத் விளக்கம்

டிசம்பர் 11 அன்று ஒரு சிறுவன் உட்பட மூவர் காயமடைந்த வீதி விபத்து தொடர்பாக, தேசிய மக்கள் சக்தியின் (NPP) நாடாளுமன்ற உறுப்பினரும் முன்னாள் சபாநாயகருமான அசோக ரன்வலவுக்கு ஆதரவாக சிரேஷ்ட அரசாங்க அமைச்சர்   கருத்து தெரிவித்தார். 

இந்த விவகாரத்தில் அரசியல் தலையீடுகள் அல்லது அவர் மதுபோதையில் இருந்தார் என்ற குற்றச்சாட்டுகளை அமைச்சர் நிராகரித்தார்.

சப்புகஸ்கந்த பகுதியில் இடம்பெற்ற இந்த விபத்துக்கு வாகனத்தில் ஏற்பட்ட இயந்திரக் கோளாறு, குறிப்பாக பிரேக் செயலிழப்பு (Brake failure) தான் காரணம் என்று அமைச்சர் விஜித ஹேரத் செய்தியாளர்களிடம் தெரிவித்தார்.  

மோட்டார் போக்குவரத்துத் திணைக்களத்தின் வாகன ஆய்வறிக்கையின்படி, ரன்வலவின் ஜீப் வண்டியில் பிரேக் அமைப்பில் கோளாறு இருந்ததை பொலிஸார் செவ்வாய்க்கிழமை உறுதிப்படுத்தினர்.  

அத்துடன் அந்த வாகனம் சரியாக பராமரிக்கப்படவில்லை என்பதும் கண்டறியப்பட்டுள்ளது.

இந்த விபத்து தெனிமுல்ல சந்திப்பில் இரவு 7:30 மணியளவில் நிகழ்ந்தது. ஹேரத்தின் கூற்றுப்படி, வாகனம் முதலில் மோட்டார் சைக்கிளில் வந்த சிறுவன் மீது மோதியது.

பின்னர் 25 வயதுடைய பெண், அவரது 55 வயது தாய் மற்றும் 6 மாதக் குழந்தை இருந்த கார் மீது மோதியது.

“மோட்டார் சைக்கிளில் இருந்த இளைஞனின் உயிரைக் காப்பாற்றுவதற்காக நாடாளுமன்ற உறுப்பினர் ரன்வல உடனடியாக வாகனத்தை ஒரு பக்கமாகத் திருப்பினார்,” என்று கூறிய அமைச்சர், ரன்வலவின் இந்த நடவடிக்கை ஒரு பெரிய அசம்பாவிதத்தைத் தடுத்திருக்கலாம் என்றும் குறிப்பிட்டார்.

காயமடைந்த குழந்தை லேடி ரிட்ஜ்வே (LRH) சிறுவர் வைத்தியசாலையில் அனுமதிக்கப்பட்ட நிலையில், மற்றைய இரு பெண்களும் ரன்வலவும் கொழும்பு தேசிய வைத்தியசாலையில் சிகிச்சை பெற்றனர்.

விபத்தின் போது ரன்வல மதுபோதையில் இருந்தார் அல்லது விசாரணைகளில் அரசாங்கம் தலையிடுகிறது என்ற சமூக ஊடகத் தகவல்களை ஹேரத் வன்மையாக மறுத்தார்.

சம்பவ இடத்தில் அவருக்கு ‘சுவாசப் பரிசோதனை’ (Breathalyzer test) செய்யப்படவில்லை—இது தொடர்பில் தற்போது பொலிஸ் மா அதிபரினால் உள்வாரி விசாரணை நடத்தப்படுகிறது—எனினும் 24 மணி நேரத்திற்குள் இரத்தம் மற்றும் சிறுநீர் மாதிரிகள் எடுக்கப்பட்டதாக ஹேரத் தெரிவித்தார்.

“விபத்து நடந்த நேரத்தில் தான் மதுபோதையில் இருக்கவில்லை என்று ரன்வலவே கூறியுள்ளார்,” என்று குறிப்பிட்ட ஹேரத், “முடிவுகள் நீதிமன்றத்தில் சமர்ப்பிக்கப்படும், மது அருந்தப்பட்டதா என்பது அதில் தெளிவாகத் தெரியும். 

இவ்வாறான முடிவுகளை மாற்றவோ அல்லது மறைக்கவோ முடியாது” என்றார்.
கவனக்குறைவாக வாகனம் செலுத்தியமை மற்றும் விபத்தைத் தடுக்கத் தவறியமை ஆகிய குற்றச்சாட்டின் கீழ் ரன்வல டிசம்பர் 12 அன்று கைது செய்யப்பட்டார். 

பின்னர் மாளிகாகந்த நீதவான் நீதிமன்றத்தினால் அவர் 200,000 ரூபா ரொக்கப் பிணையில் விடுவிக்கப்பட்டார்.
கூடுதல் குற்றச்சாட்டுகள் சுமத்தப்படுமா என்பதைத் தீர்மானிப்பதற்கு முன், அரசாங்க இரசாயன பகுப்பாய்வுத் திணைக்களத்தின் இறுதி மருத்துவ அறிக்கையை எதிர்பார்த்துக் காத்திருப்பதாக பொலிஸ் ஊடகப் பேச்சாளர் ஏ.எஸ்.பி. எஃப்.யு. வூட்லர் புதன்கிழமை தெரிவித்தார்.

பொலிஸ் விசாரணை முடிவடையும் வரை ரன்வலவுக்கு எதிராக எவ்வித ஒழுக்காற்று நடவடிக்கையும் எடுக்கப்போவதில்லை என ஆளும் தேசிய மக்கள் சக்தி தீர்மானித்துள்ளது.