தெற்காசிய நாடு ஒன்றிலிருந்தே கண்டி மாவட்டச் செயலகத்திற்கு வெடிகுண்டு மிரட்டல் ஈமெயில் வந்ததாக விசாரணைகளில் தெரியவந்தது

கண்டி மாவட்டச் செயலகத்திற்கு வெடிகுண்டு மிரட்டல் விடுத்து அதன் உத்தியோகபூர்வ மின்னஞ்சல் முகவரிக்கு இரண்டு மின்னஞ்சல்கள் அனுப்பப்பட்டுள்ளதாகவும், அவை தெற்காசிய நாடு ஒன்றிலிருந்து வந்தவை என்றும் விசாரணைகளில் தெரியவந்துள்ளதாகத் தெரிவிக்கப்படுகிறது. 

‘தினமின’ அரசாங்கப் பத்திரிகையின் செய்தியின்படி, கடந்த டிசம்பர் மாதமும் இதே போன்ற மின்னஞ்சல்கள் அதே நாட்டிலிருந்து அனுப்பப்பட்டதை விசாரணைகள் வெளிப்படுத்தியுள்ளன.

இந்தச் சம்பவம் தொடர்பில் குற்றப் புலனாய்வுத் திணைக்களம் (CID) தற்போது விசாரணைகளை ஆரம்பித்துள்ளது. 

மின்னஞ்சல்களில் ஒன்று டிசம்பர் 23ஆம் திகதி கிடைக்கப்பெற்ற போதிலும், டிசம்பர் 26ஆம் திகதி காலையிலேயே மாவட்டச் செயலாளர் அது குறித்துத் தகவலறிந்ததாகக் கூறப்படுகிறது.

மாவட்டச் செயலாளர் இந்திக உடவத்த, மத்திய மாகாண பிரதிப் பொலிஸ் மா அதிபர் சுதத் மாசிங்கவிடம் முறையிட்டதையடுத்து, வெடிகுண்டு செயலிழக்கச் செய்யும் பிரிவு, பொலிஸ் மோப்ப நாய் பிரிவு மற்றும் விசேட அதிரடிப்படையினர் உடனடியாகச் செயலக வளாகத்தில் சோதனைகளை மேற்கொண்டனர். 

வளாகத்திற்குள் நிறுத்தப்பட்டிருந்த அனைத்து வாகனங்களையும் சோதனையிட்ட பின்னர், அந்தத் தகவல் பொய்யானது என பொலிஸார் அறிவித்தனர். பின்னர், செயலகத்தில் வழமையான பணிகள் மீண்டும் ஆரம்பமான போது, மாலை 4.00 மணிக்குள் வெடிப்புச் சம்பவம் நிகழும் என எச்சரித்து மற்றொரு மின்னஞ்சல் உத்தியோகபூர்வ முகவரிக்கு அனுப்பப்பட்டது. 

இது குறித்து மீண்டும் பொலிஸாருக்குத் தெரிவிக்கப்பட்டதை அடுத்து, பல வெடிகுண்டு செயலிழக்கச் செய்யும் குழுக்கள் அங்கு வந்தன. இது ஊழியர்களிடையே அச்சத்தை ஏற்படுத்தியது. 

இதன் விளைவாக, பல ஊழியர்கள் அரை நாள் விடுமுறை எடுத்துக்கொண்டு வெளியேறியதால், சேவைகளைப் பெற வந்த பொதுமக்கள் கடும் சிரமத்திற்கு உள்ளாகினர்.

கிறிஸ்துமஸ் விடுமுறைக்குப் பின்னரும் வார இறுதிக்கு முன்னரும் அரச அலுவலகங்களுக்கு டிசம்பர் 26ஆம் திகதி மாத்திரமே வேலை நாளாக இருந்ததால், ஓட்டுநர் உரிமம் புதுப்பித்தல் போன்ற சேவைகளுக்காக வந்த பொதுமக்கள், சேவைகளைப் பெற்றுக்கொள்ள முடியாமல் பெரும் அசெளகரியங்களை எதிர்கொண்டதாகத் தெரிவித்தனர்.