இலங்கை மின்சார சபையை (CEB) மறுசீரமைப்பதற்காக 2024 ஆம் ஆண்டில் நிறுவப்பட்ட செயலகத்தின் பணிப்பாளர் நாயகமாகப் பணியாற்றிய புபுது நிரோஷன் ஹடிகல்ல, எதிர்வரும் ஜனவரி 15 முதல் நடைமுறைக்கு வரும் வகையில் தனது பதவியை இராஜினாமா செய்வதாக மின்சக்தி அமைச்சின் செயலாளருக்கு அறிவித்துள்ளார்.
அவரது பதவிக்காலம் முன்னதாக அமைச்சரினால் ரத்து செய்யப்பட்ட போதிலும், பின்னர் ஜனாதிபதியின் தலையீட்டின் பேரில் அடுத்த ஆண்டு ஜூன் மாதம் வரை நீடிக்கப்பட்டிருந்த நிலையில், இந்த இராஜினாமா இடம்பெற்றுள்ளமை குறிப்பிடத்தக்கது. இந்தத் தீர்மானமிக்க தருணத்தில் நிகழ்ந்துள்ள இராஜினாமா காரணமாக நிறுவனத்திற்குள் நிர்வாகச் சிக்கல்கள் உருவாகியுள்ளதாக ஊழியர்கள் சுட்டிக்காட்டுகின்றனர்.
தன்னார்வ ஓய்வுத் திட்டம் (VRS) மற்றும் ஊழியர்களின் கோரிக்கை
மறுசீரமைப்புச் செயற்பாட்டின் கீழ் அறிமுகப்படுத்தப்பட்ட தன்னார்வ ஓய்வுத் திட்டத்தைத் (VRS) தேர்ந்தெடுத்த 2,200 க்கும் மேற்பட்ட ஊழியர்களை உடனடியாகப் பணியிலிருந்து விடுவிக்குமாறு கோரி மின்சக்தி அமைச்சரிடம் கோரிக்கை விடுக்கப்பட்டுள்ளதாக ‘சண்டே டைம்ஸ்’ செய்தி வெளியிட்டுள்ளது. நிர்வாகத்தினால் தாங்கள் “கட்டாயமாக” பணியில் தடுத்து வைக்கப்பட்டுள்ளதாகத் தெரிவிக்கும் இந்த ஊழியர்களில், பெருமளவிலான நடுத்தர மட்டத்திலான தொழில் வல்லுநர்கள் உள்ளடங்குகின்றனர்.
மின்சார சபையை உற்பத்தி, கடத்துகை, கட்டமைப்பு இயக்கம் மற்றும் விநியோகம் என நான்கு சுயாதீன நிறுவனங்களாகப் பிரிக்கும் அரசாங்கத்தின் திட்டத்தின் கீழ், கடந்த ஆண்டு ஆகஸ்ட் 26 ஆம் திகதி அதிவிசேட வர்த்தமானி மூலம் இந்தத் தன்னார்வ ஓய்வுத் திட்டம் அறிவிக்கப்பட்டது.
சட்டத்தின்படி, புதிய நிறுவனங்களுடன் இணைவதா இல்லையா என்பதைத் தீர்மானிக்க ஊழியர்களுக்கு இரண்டு மாத கால அவகாசம் வழங்கப்பட்டது. இதன்படி, 2025 அக்டோபர் 27 ஆம் திகதியாகும் போது சுமார் 2,200 ஊழியர்கள் புதிய நிறுவனங்களுடன் இணையப் போவதில்லை என உத்தியோகபூர்வமாக அறிவித்துள்ளனர்.
ஊழியர்கள் எதிர்நோக்கும் பிரச்சினைகள்
அமைச்சருக்கு அனுப்பியுள்ள கடிதத்தில் ஊழியர்கள் பின்வரும் விடயங்களைச் சுட்டிக்காட்டியுள்ளனர்:
• விடுவிப்பு கோரிக்கை: தமக்கு கிடைக்க வேண்டிய ஓய்வூதிய நஷ்டஈட்டுத் தொகையை பின்னர் வழங்கினாலும் பரவாயில்லை, ஆனால் உடனடியாகப் பணியிலிருந்து விலக அனுமதி வழங்குவது அவசியமாகும்.
• வாய்ப்புகள் இழப்பு: இந்தத் தாமதம் காரணமாக தமக்குக் கிடைத்துள்ள வெளிநாட்டு வேலைவாய்ப்புகள், தனியார் துறை வேலைகள் மற்றும் சுயதொழில் வாய்ப்புகள் அற்றுப்போகின்றன.
• மன அழுத்தம்: “அமைப்பின் மீது நம்பிக்கை வைத்து வெளிநாடு செல்ல அல்லது தொழில்முனைவோராக மாறத் தீர்மானித்த இளம் தொழில் வல்லுநர்கள் தற்போது கடுமையான மன மற்றும் நிதி நெருக்கடிக்கு உள்ளாகியுள்ளனர். ஏற்கனவே வெளிநாடு சென்றுள்ள சில ஊழியர்கள், சேவையை கைவிட்டுச் சென்றவர்களாகக் கருதப்பட்டு அறிவித்தல் விடுக்கப்பட்டுள்ளதால், அவர்களின் ஓய்வூதிய உரிமைகளும் ஆபத்துக்குள்ளாகியுள்ளன” என அந்த கடிதத்தில் குறிப்பிடப்பட்டுள்ளது.
நிர்வாகத் தாமதம் மற்றும் சட்டச் சிக்கல்
மறுசீரமைப்புச் செயற்பாட்டின் சொத்துக்களை முழுமையாகப் பரிமாற்றுவதற்கான ‘குறிக்கப்பட்ட திகதியாக’ (Appointed Date) 2026 பெப்ரவரி 1 ஆம் திகதி நிர்ணயிக்கப்பட்டிருந்த போதிலும், அமைச்சர் இதுவரை அதனை வர்த்தமானி மூலம் அறிவிக்கவில்லை.
இதன் காரணமாக, புதிதாக நிறுவப்பட்ட நிறுவனங்களுக்கு சட்டபூர்வ அதிகாரம் இல்லை என்றும், ஊழியர்களை அவர்களின் விருப்பத்திற்கு மாறாகத் தடுத்து வைப்பதன் மூலம் நிறுவனத்தின் உற்பத்தித்திறன் வேகமாக வீழ்ச்சியடைந்து வருவதாகவும் அவர்கள் எச்சரிக்கின்றனர். தற்போது நிலவும் அநிச்சய நிலையை முடிவுக்குக் கொண்டு வந்து, 2026 பெப்ரவரி 1 அல்லது அதற்கு முன்னர் குறித்த திகதியை அறிவிக்குமாறும் ஊழியர்கள் கோரிக்கை விடுத்துள்ளனர்.
