இந்த அரசாங்கம் விடுதலைப்புலிகள் தொடர்பான பாடலை பாடிய கிளிநொச்சி இளைஞரை கைது செய்துள்ளது – ஆனால் இதனை பயன்படுத்தும் NPP அரசியல்வாதிகளை கைது செய்வதில்லை
பயங்கரவாதத் தடைச் சட்டத்தை (PTA) அமல்படுத்துவதில் அரசாங்கம் இரட்டை நிலப்பாட்டைக் கொண்டிருப்பதாக ஸ்ரீலங்கா பொதுஜன பெரமுனவின் (SLPP) நாடாளுமன்ற உறுப்பினர் நாமல் ராஜபக்ஷ குற்றம் சாட்டியுள்ளார்.
கிளிநொச்சியைச் சேர்ந்த இளம் கலைஞர் ஒருவர், எல்.டி.டி.ஈ (LTTE) தொடர்பான உள்ளடக்கத்தைக் கொண்ட ராப் (rap) பாடல் ஒன்றை வெளியிட்டமைக்காகக் கைது செய்யப்பட்டதைத் தொடர்ந்து அவர் இந்தக் குற்றச்சாட்டை முன்வைத்துள்ளார்.
இந்த நடவடிக்கை “தற்போதைய அரசாங்கத்தின் கீழ் நிலவும் இரட்டை நிலப்பாடு குறித்து கடுமையான கவலைகளை எழுப்புகிறது” என்று கூறியுள்ள ராஜபக்ஷ, அண்மையில் நடைபெற்ற உள்ளூராட்சி மன்றத் தேர்தல் பிரச்சாரத்தின் போது தேசிய மக்கள் சக்தியின் (NPP) அரசியல்வாதிகள் எவ்வித விளைவுகளுமின்றி இதுபோன்ற எல்.டி.டி.ஈ கருப்பொருள் கொண்ட பாடல்களைப் பயன்படுத்தியதாகக் குறிப்பிட்டுள்ளார்.
“யாழ்ப்பாண மாவட்ட தேசிய மக்கள் சக்தி நாடாளுமன்ற உறுப்பினர் ஒருவர் அரசியல் நலனுக்காக இத்தகைய பாடல்களை சமூக ஊடகங்களில் பகிரங்கமாகப் பகிர்ந்ததாகக் கூறப்படுகிறது. அப்போது பொலிஸார் எங்கே இருந்தார்கள்?
பயங்கரவாதத் தடைச் சட்டம் எங்கே இருந்தது?” என்று அவர் கேள்வி எழுப்பியுள்ளார்.
எல்.டி.டி.ஈ இன்னும் தடைசெய்யப்பட்ட ஒரு பயங்கரவாத அமைப்பு என்பதையும், அதனை எவரும் மகிமைப்படுத்துவதை தான் ஆதரிக்கவில்லை என்பதையும் வலியுறுத்திய அதேவேளை, பொறுப்புக்கூறல் என்பது அனைவருக்கும் சமமாகப் பயன்படுத்தப்பட வேண்டும் என்று ராஜபக்ஷ வாதிட்டார்.
“அரசியல்வாதிகளுக்கு ஒரு விதியும், சாதாரண இளைஞர்களுக்கு மற்றொரு விதியும் இருப்பது ஒரு ஜனநாயக சமூகத்தில் ஏற்றுக்கொள்ள முடியாதது” என்று அவர் X தளத்தில் பதிவிட்டுள்ளார்.
இவ்வாறான நடவடிக்கைகள் சட்டவிரோதமானவை என அரசாங்கம் நம்பினால், சட்டம் அமலாக்கம் சீரானதாக இருக்க வேண்டும்; இல்லையெனில், இந்தக் கைது நடவடிக்கையானது அதிகாரத்தைத் தெரிவுசெய்து தவறாகப் பயன்படுத்துவதாகவே பார்க்கப்படும் என்றும் அவர் எச்சரித்துள்ளார்.
