2.5 மில்லியன் டொலர் திறைசேரி கொள்ளையின் தவறு மத்திய வங்கியுடையதே… அரசாங்கத்துடையது அல்ல: பிரதி அமைச்சர் சதுரங்க அபேசிங்க

திறைசேரியிலிருந்து 2.5 மில்லியன் டொலர் காணாமல் போனமை, மத்திய வங்கியில் உள்ள நீண்டகால உள்நாட்டு கட்டுப்பாட்டுப் பலவீனங்களின் விளைவே என பிரதி அமைச்சர் சதுரங்க அபேசிங்க பாராளுமன்றத்தில் தெரிவித்தார்.

பாராளுமன்றத்தில் உரையாற்றிய பிரதி அமைச்சர், கடந்த நவம்பர் மாதம் மேற்கொள்ளப்பட்ட ஆறு கொடுப்பனவுகளில் இரண்டு நிராகரிக்கப்பட்ட சந்தர்ப்பத்தில், அது குறித்து சந்தேகம் கொண்டு முறைப்படியான விசாரணையை நடத்துவதற்கு மத்திய வங்கிக்கு சந்தர்ப்பம் இருந்ததாகச் சுட்டிக்காட்டினார்.

எனினும், அந்த நேரத்தில் அது குறித்து உரிய கவனம் செலுத்தாமையினாலேயே இந்த துரதிர்ஷ்டவசமான சூழ்நிலை ஏற்பட்டது என அவர் குறிப்பிட்டார்.

இந்த முறைமைப் பலவீனங்கள் தற்போதைய அரசாங்கம் ஆட்சிக்கு வந்த பின்னர் ஏற்பட்டவை அல்ல என்றும், பல வருடங்களாக நிலவி வரும் பிரச்சினைகள் என்றும் அமைச்சர் இங்கு வலியுறுத்தினார்.

குறிப்பாக, கணக்கு எண்களை மாற்றுவது போன்ற தகவல்களை உறுதிப்படுத்துவதற்கான முறைப்படியான நடைமுறை மத்திய வங்கியிடம் இருக்கவில்லை என்றும், இது நீண்டகாலமாக நிலவி வந்த ‘உள்நாட்டு கட்டுப்பாட்டுத் தோல்வி’ என்றும் அவர் சுட்டிக்காட்டினார்.

எவ்வாறாயினும், நிதியமைச்சு இச்சம்பவம் குறித்து அறிந்தவுடனேயே பல்வேறு தந்திரோபாயங்கள் மற்றும் புதிய நடவடிக்கைகள் ஊடாக செயற்பட்டதாகவும், இது குறித்து நிதிக் குழுவுக்கு தெளிவுபடுத்தப்பட்டுள்ளதாகவும் அவர் கூறினார்.

நாட்டின் பொருளாதாரம் தற்போது வலுவடைந்து வருவதாகவும், 2016 ஆம் ஆண்டிற்குப் பிறகு புதுப்பிக்கப்படாத முறைமைகளை நவீன தொழில்நுட்பம் மற்றும் டிஜிட்டல் மயமாக்கல் ஊடாக ஒழுங்குபடுத்த அரசாங்கம் நடவடிக்கை எடுத்து வருவதாகவும் பிரதி அமைச்சர் சதுரங்க அபேசிங்க மேலும் தெரிவித்தார்.