VIDEO > ஞானசார தேரர் தன் சிறைவாசம் குறித்து மிகக் கடுமையான மன உளைச்சலில் இருந்ததுடன் அவரிடம் இருந்த வி**ஷத்தையும் குடிக்க பார்த்தார் –  நான் தான் சமாதானப்படுத்தினேன் ; விடுதலைக்காக கையெழுத்து சேகரிக்கும் தித்தகல்ல ஆனந்தசிரி தேரர்

பொதுபல சேனா அமைப்பின் பொதுச்செயலாளரான கலகொடஅத்தே ஞானசார தேரரை விடுவிக்கோரி பிரச்சாரத்தை முன்னெடுத்து வரும் பௌத்த துறவி ஒருவர், சிறையில் உள்ள ஞானசார தேரர் மிகுந்த மன உளைச்சலில் இருப்பதாகவும், விஷம் அருந்தி தற்கொலை செய்து கொள்ளப்போவதாக அச்சுறுத்தியதாகவும் தெரிவித்துள்ளார்.

ஞானசார தேரருக்கு ஜனாதிபதியின் பொதுமன்னிப்பைப் பெற்றுத்தருவதற்கான முயற்சிகள் குறித்து உரையாடிய நேர்காணல் ஒன்றின் போதே, தித்தகல்ல ஆனந்தசிரி தேரர் இந்த அதிர்ச்சித் தகவலை வெளியிட்டார்.

ஆனந்தசிரி தேரர் கூறியதன் படி, ஞானசார தேரர் தனது சிறைவாசம் குறித்து கடுமையான மன உளைச்சலில் இருந்ததுடன், விஷம் அருந்தி உயிரை மாய்த்துக் கொள்வது குறித்தும் பேசியுள்ளார்.

“அவரிடம் விஷ பாட்டில் ஒன்று இருந்தது. அதைக்குடித்து இறந்துவிடப் போவதாகக் கூறினார்” என்று ஆனந்தசிரி தேரர் தெரிவித்துள்ளார்.

தான் தலையிட்டு ஞானசார தேரரை அந்த முடிவைக் கைவிடுமாறு சமாதானப்படுத்தியதாகவும், அதன் பின்னர் அந்த விஷ பாட்டில் தூக்கி வீசப்பட்டதாகவும் அந்தத் துறவி கூறினார்.

மேலும், பொடுபல சேனா அமைப்பின் காலத்தில் இருந்தே தானும் ஞானசார தேரரும் கடுமையான கருத்து வேறுபாடுகளில் ஈடுபட்டிருந்ததாக ஆனந்தசிரி தேரர் வெளிப்படுத்தினார்.

இருப்பினும், ஞானசார தேரரின் மனநிலை மற்றும் அவர் சிறையிலடைக்கப்பட்ட சூழ்நிலைகளை அறிந்த பின்னர் அவருக்கு ஆதரவளிக்க முடிவு செய்ததாக அவர் கூறினார்.

ஞானசார தேரருக்கு ஜனாதிபதி மன்னிப்பு வழங்குமாறு ஜனாதிபதி அனுர குமார திஸாநாயக்கவிடம் கோரிக்கை விடுத்து கையெழுத்து சேகரிக்கும் பிரச்சாரத்தை இந்தத் துறவி தற்போது தலைமை தாங்கி நடத்தி வருகிறார்.

ஏற்கனவே 2,25,000க்கும் அதிகமான கையெழுத்துக்கள் சேகரிக்கப்பட்டுள்ளதாகக் கூறிய அவர், பிரச்சாரத்தைக் கைவிடுமாறு அழுத்தங்கள் கொடுக்கப்பட்ட போதிலும் இந்த நடவடிக்கை தொடரும் என்றார்.

இந்த பிரச்சாரத்தை கைவிடுவதற்காக தமக்கு அச்சுறுத்தல்களும், நிதி உதவிக்கான சலுகைகளும் வந்ததாக குற்றம் சாட்டிய ஆனந்தசிரி தேரர், சம்பந்தப்பட்ட அதிகாரிகளிடம் மனு சமர்ப்பிக்கப்படும் வரை தமது போராட்டம் தொடரும் எனத் திட்டவட்டமாகத் தெரிவித்தார்.

video > https://youtu.be/V9NqLS7T_ks