எதிர்க்கட்சித் தலைவர் சஜித் பிரேமதாச தலைமையில் 2026 இலங்கை சிறுத்தை தினம் சனிக்கிழமை (01) கொழும்பில் நடைபெறவுள்ளதுடன், அழியும் ஆபத்திலுள்ள இச்சிலிர்ப் உயிரினத்தைப் பாதுகாக்கும் முயற்சிகள் குறித்து விவாதிக்க வனவிலங்கு பாதுகாவலர்கள், ஆராய்ச்சியாளர்கள், கொள்கை வகுப்பாளர்கள், அரச நிறுவனங்கள், சிவில் சமூகக் குழுக்கள் மற்றும் இளைஞர் பிரதிநிதிகள் ஒன்று கூடவுள்ளனர்.
இந்நிகழ்வு பிற்பகல் 2.00 மணி முதல் பிற்பகல் 5.00 மணி வரை கொழும்பு 07, சர் மார்கஸ் பெர்னாண்டோ மாவத்தை, இலக்கம் 30 இல் நடைபெறும்.
இலங்கைக்கு மட்டுமே உரித்தானதும், சுற்றுச்சூழல் சமநிலையைப் பேணுவதில் முக்கிய வேட்டையாடும் உயிரினமாகவும் கருதப்படும் இலங்கை சிறுத்தையை (Panthera pardus kotiya) பாதுகாப்பதற்கான தேசிய முயற்சிகளை வலுப்படுத்துவதை இந்தத் திட்டம் நோக்கமாகக் கொண்டுள்ளது.
இலங்கை சிறுத்தைகளின் நீண்டகால வாழ்வை உறுதி செய்வதை நோக்கமாகக் கொண்ட அறிவியல் ஆராய்ச்சி, பாதுகாப்பு உத்திகள் மற்றும் பங்குதாரர்களின் ஒத்துழைப்பு ஆகியவற்றுக்கான விவாதங்களின் களமாக இந்நிகழ்வு அமையும் என எதிர்பார்க்கப்படுகிறது.
அறிவியல் வல்லுநர்கள் மற்றும் வனவிலங்கு நிபுணர்களுடனான உரையாடல்கள் மூலம் மாணவர்கள் மற்றும் இளம் பாதுகாப்புத் தலைவர்களை ஈடுபடுத்துவதில் சிறப்பு கவனம் செலுத்தப்படும்.
இலங்கை சிறுத்தையைப் பாதுகாப்பது என்பது வனவிலங்கு பாதுகாப்புப் பிரச்சினை மட்டுமல்ல, அது சுற்றுச்சூழல் அமைப்புகளைப் பாதுகாப்பதற்கும், இயற்கை பாரம்பரியத்தைப் பேணுவதற்கும், நிலையான வளர்ச்சியை மேம்படுத்துவதற்கும் பங்களிக்கும் ஒரு தேசியப் பொறுப்பாகும் என்று சஜித் கூறினார்.
அரசு முகவர் நிலையங்கள், பல்கலைக்கழகங்கள், ஆராய்ச்சி நிறுவனங்கள், பாதுகாப்பு அமைப்புகள், கார்ப்பரேட் துறை, இராஜதந்திர தூதரகங்கள், ஊடகங்கள் மற்றும் இளைஞர் குழுக்களின் பிரதிநிதிகள் இந்நிகழ்வில் கலந்து கொள்வார்கள் என எதிர்பார்க்கப்படுகிறது.
