ஒரு அரிசி மணியைக் கூட வெளிநாட்டிலிருந்து இறக்குமதி செய்ய வேண்டிய அவசியமில்லை.. நாம் அரிசியில் தன்னிறைவு அடைந்துள்ளோம்…

இலங்கையில் பொதுப் பயன்பாட்டிற்காக வெளிநாடுகளிலிருந்து ஒரு அரிசி மணியைக் கூட இறக்குமதி செய்ய வேண்டிய அவசியம் தற்போது இல்லை என்றும், இலங்கை தற்போது அரிசி உற்பத்தியில் முழுமையாகத் தன்னிறைவு பெற்ற நிலையை அடைந்துள்ளது என்றும் விவசாய, கால்நடை, காணி மற்றும் நீர்ப்பாசன அமைச்சர் கே. டி. லால் காந்த தெரிவித்துள்ளார்.

குடா ஓயா நீர்ப்பாசனத் திட்டத்தை மக்களிடம் கையளிக்கும் நிகழ்வில் கலந்துகொண்டு உரையாற்றும் போதே அமைச்சர் இதனைக் குறிப்பிட்டார்.

அங்கு தொடர்ந்து உரையாற்றிய அமைச்சர், ஜாஸ்மின் (Jasmine), ஒட்டும் அரிசி (Sticky Rice) மற்றும் பாஸ்மதி போன்ற சிறப்பு வகை அரிசிகள் மட்டுமே சிறிய அளவில் தொடர்ந்து நாட்டிற்கு இறக்குமதி செய்யப்படுவதாகச் சுட்டிக்காட்டினார். இவை நாட்டில் உள்ள வெளிநாட்டு தூதரகங்களின் அதிகாரிகளின் பயன்பாட்டிற்காகவும், குறிப்பிட்ட நுகர்வோரின் தேவைகளைப் பூர்த்தி செய்வதற்காகவும் மட்டுமே இறக்குமதி செய்யப்படுகின்றன.

அவ்வகை அரிசிகள் உள்நாட்டில் உற்பத்தி செய்யப்படாததால், அந்தத் தேவைகளுக்காகச் சிறிய அளவிலான இறக்குமதி தொடர்ந்து மேற்கொள்ளப்பட வேண்டியுள்ளதாக அவர் தெரிவித்தார்.

இருப்பினும், நாட்டின் மக்களின் அன்றாட உணவுப் பயன்பாட்டிற்காக வெளிநாடுகளிலிருந்து அரிசி இறக்குமதி செய்ய வேண்டிய அவசியம் தற்போது இல்லை என வலியுறுத்திய அமைச்சர், உள்நாட்டு அரிசித் தேவையை முழுமையாக நாட்டிற்குள்ளேயே பூர்த்தி செய்யக்கூடிய வகையில் நாடு தன்னிறைவு அடைந்துள்ளதாகவும், நீர்ப்பாசன மற்றும் விவசாயத் திட்டங்கள் செயற்திறன் மிக்கதாக மாறியுள்ளதன் மூலம் அந்த உற்பத்தித்திறன் மேலும் உறுதிப்படுத்தப்பட்டுள்ளதாகவும் தெரிவித்தார்.