வான்வெளித் தாக்குதலும் உலகளாவிய விமர்சனமும் : சவூதி அரேபியா தன்னை எப்படிப்பாதுகாத்துக் கொள்கிறது?

வான்வெளித்தாக்குதலும் உலகளாவிய விமர்சனமும் : சவூதி அரேபியா தன்னை எப்படிப்பாதுகாத்துக் கொள்கிறது?

(எழுத்து : வை.அறபாத்)

மத்திய கிழக்கு பிராந்தியத்தின் புவிசார் அரசியலில் சவூதி அரேபியா மிக முக்கியமானதொரு வல்லரசாகத் திகழ்கிறது.

உலகளாவிய எரிசக்தி சந்தையின் மையமாக விளங்கும் அந்நாடு, தனது இறையாண்மையைப் பாதுகாத்துக்கொள்ளவும், பிராந்திய இஸ்திரத்தன்மையை நிலைநிறுத்துவதற்கும் ஒரே நேரத்தில் இரண்டு முனைகளில் செயலாற்ற வேண்டிய கட்டாயத்திலுள்ளது.

அதில் ஒன்று நேரடியான பௌதீக மோதல்களை எதிர்கொள்ளும் ஆயுத மற்றும் வான்வழிப் பாதுகாப்புத் தற்காப்பாகும். மற்றொன்று சர்வதேச அரங்கில் எழும் அரசியல் மற்றும் கருத்தியல் ரீதியான விமர்சனங்களைச்சமாளிக்கும் தற்காப்பாகும்.

சவூதி அரேபியாவிற்கெதிராகத் தொடுக்கப்படும் இத்தகைய ஆயுத மோதல்களும், சோதனைகளும் உண்மையில் அந்நாட்டை மேலும் பலப்படுத்துவதற்கான வரலாற்று வாய்ப்புகளாகவே அமைகின்றன.

இக்கட்டான இத்தகைய சூழ்நிலைகளைக்கையாளும் போதெல்லாம், அதிநவீன தொழிநுட்பங்கள் மற்றும் நவீன பாதுகாப்பு வழிமுறைகளைக்கையாண்டு சவூதி தனது பாதுகாப்பு எல்லைகளை மேலும் பலப்படுத்தி வருகிறது.

இவ்விரு விவகாரங்களிலும் சவூதி அரேபியா கையாண்டுவரும் வியூகங்கள் மற்றும் அதற்கான ஆதரவுச்சூழல்கள் கீழே விரிவாக ஆராயப்படுகின்றன.

ஆயுத ரீதியான யுத்தம் மற்றும் வான்வழிப்பாதுகாப்பு வியூகம்

சவூதி அரேபியாவின் எல்லைப்பாதுகாப்பு என்பது எப்போதும் உன்னிப்பாகக்கவனிக்கப்பட வேண்டிய ஒரு தீவிர களமாகும்.

குறிப்பாக, யேமன் நாட்டின் ஹூதி கிளர்ச்சியாளர்களிடமிருந்து தொடர்ச்சியான தாக்குதல்கள் வந்து கொண்டிருக்கின்றன. நாட்டின் பிரதான எண்ணெய் ஆலைகள், சர்வதேச விமான நிலையங்கள் மற்றும் முக்கிய நகரங்களைக் குறிவைத்து தாக்குதல்கள் நடத்தப்பட்டு வருகின்றன.

சமீபத்தில், கிழக்கு மாகாணத்தில் அமைந்துள்ள சவூதி அராம்கோ நிறுவனத்தின் பிரதான ஷாய்பா (Shaybah) எண்ணெய் வயலைக்குறிவைத்து வந்த ட்ரோனை சவூதி வான் பாதுகாப்புப்படைகள் இடைமறித்து அழித்தன.

ஆயினும், வான்வெளியில் இடைமறிக்கப்பட்ட அந்த ட்ரோனின் சிதறிய பாகங்கள் விழுந்ததில், அங்கு ஒப்பந்ததாரருக்குச்சொந்தமான வாகனம் தீப்பற்றி எரிந்தது. இவ்விபத்தில் பிலிப்பைன்ஸ் மற்றும் நேபாள நாட்டைச்சேர்ந்த இருவர் உயிரிழந்தனர். மேலும் பாகிஸ்தான் மற்றும் இந்தியாவைச்சேர்ந்த தலா ஒருவர் காயமடைந்தனர்.

எனினும், எண்ணெய் வயலின் பிரதான செயலாக்க நிலையங்கள் மற்றும் உற்பத்தி நடவடிக்கைகள் எதவித பாதிப்புமின்றி தொடர்ச்சியாக இயங்கி வருவதாக எரிசக்தி அமைச்சகம் உறுதிப்படுத்தியுள்ளது.

இதேபோல், தம்மாம் நகரிலுள்ள கிங் ஃபஹத் சர்வதேச விமான நிலையம் மீது நடத்தப்பட்ட தாக்குதலில் ஒருவர் உயிரிழந்தார் மற்றும் 8 பேர் காயமடைந்தனர்.

சவூதி சிவில் விமானப்போக்குவரத்து பொது ஆணையம் (GACA) இத்தாக்குதலை உறுதிப்படுத்தியுள்ளதுடன், சேதமடைந்த சொத்துகளை மதிப்பிடும் பணிகளையும் காயமடைந்தவர்களுக்கு அவசர மருத்துவ சிகிச்சைகளையும் தீவிரப்படுத்தியுள்ளது.

இத்தகைய தொடர் அச்சுறுத்தல்கள் குறித்து சவூதி அரேபியாவின் மூத்த அறிஞர்கள் கவுன்சில் வெளியிட்ட அதிகாரப்பூர்வ அறிக்கையில், பொதுமக்களின் கட்டமைப்புகள் மீதான தாக்குதல்களையும், புனித மக்கா மற்றும் மதீனா நகரங்களை இலக்கு வைத்து நடத்தப்படும் சதிச்செயல்களையும் பயங்கரவாதமென கடுமையாகக் கண்டித்துள்ளது.

மேலும், புனித மசூதிகளுக்குச்செல்லும் வழிபாட்டாளர்களின் பாதுகாப்பும் நாட்டின் இறையாண்மையும் தான் மிக முக்கியமானதென வலியுறுத்தியுள்ள அக்கவுன்சில், சவூதி வான்பாதுகாப்புப்படைகளின் விழிப்புணர்வும் ஆயுதப்படைகளின் திறனும் எதிரிகளின் தாக்குதல் முயற்சிகளைத் தொடர்ந்து வெற்றிகரமாக முறியடித்து வருவதைப் பாராட்டியுள்ளது.

இந்த நேரடி அச்சுறுத்தல்களையும் வான்வழித் தாக்குதல்களையும் எதிர்கொள்ள சவூதி அரேபியா அமெரிக்காவிடமிருந்து பெற்ற பேட்ரியாட் (Patriot PAC-3) மற்றும் அதிநவீன தாட் (THAAD) ஏவுகணைத் தடுப்பு அமைப்புகளைப் பெருமளவில் பயன்படுத்தி வருகிறது.

எதிரிகளின் வான்வழித்தாக்குதல்களையும் வெடிகுண்டுகள் தாங்கிய ஆளில்லா விமானங்களையும் வானிலேயே துல்லியமாக இடைமறித்து அழிப்பதில் இந்த அமைப்புகள் முக்கியப் பங்கு வகிக்கின்றன.

இதைத்தொடர்ந்து, நாட்டின் பாதுகாப்பை மேலும் பலப்படுத்தும் வகையில், சவூதி அரேபியாவின் உள்துறை அமைச்சர் இளவரசர் அப்துல் அசீஸ் பின் சவூத் பின் நாயிஃப், ரியாத்தில் அதிநவீன கட்டளை மற்றும் கட்டுப்பாட்டு மையம் மற்றும் பாதுகாப்பு ட்ரோன் அமைப்புகளைத்திறந்து வைத்துள்ளார்.

செயற்கை நுண்ணறிவு (AI) தொழிநுட்பம் பொருத்தப்பட்ட இந்த ட்ரோன்கள் களக்கண்காணிப்புப் பணிகளை மேற்கொள்வதோடு, பாதுகாப்பு நடவடிக்கைகளை விரைவாக ஒருங்கிணைக்க உதவுகின்றன. புதிய கட்டளை மற்றும் கட்டுப்பாட்டு மையத்தில் 7 சிறப்புப்பிரிவுகள் செயற்படுவதுடன், நாடு முழுவதுமுள்ள 13 கட்டளை மையங்களுடன் இது இணைக்கப்பட்டுள்ளது.

மெக்கா பாதுகாப்பு கூட்டணி :

பிராந்தியப்பாதுகாப்பை அடுத்த கட்டத்திற்கு நகற்றும் விதமாக, சவூதி அரேபியா, பாகிஸ்தான் மற்றும் துருக்கி உள்ளிட்ட இஸ்லாமிய நாடுகளுக்கிடையே வலுவான பாதுகாப்பு ஒத்துழைப்புகள் முன்னெடுக்கப்பட்டு வருகின்றன.

நேட்டோ அமைப்பின் விதிமுறைகளைப்போன்று, உறுப்பு நாடுகள் எதற்காவது வெளிநாட்டுத்தாக்குதல் வந்தால் அவற்றை இணைந்து எதிர்கொள்வதற்கான தற்காப்புக்கூட்டமைப்புகள் பிராந்திய இஸ்திரத்தன்மைக்குப் பெருமளவில் உதவுகின்றன.

அணு ஆயுத பலங்கொண்ட பாகிஸ்தானும், பாதுகாப்புத்துறையில் முன்னேறிவரும் துருக்கியும் சவூதியுடன் கைகோர்த்து உளவுத்தகவல்களைப் பகிரவும், கூட்டுப்பாதுகாப்பு நடவடிக்கைகளை மேற்கொள்ளவும் இக்கூட்டாண்மை வழிவகுத்துள்ளது.

வெளிநாடுகளையே ஆயுத இறக்குமதிக்காக முழுமையாக நம்பியிருக்கும் நிலையை மாற்ற, ‘விஷன் 2030’ திட்டத்தின்கீழ் சவூதி பாதுகாப்புத்தொழில் நிறுவனம் (SAMI) உருவாக்கப்பட்டது.

இதன் மூலம் நாட்டின் இராணுவத் தேவைகளில் பாதியை உள்நாட்டிலேயே தயாரிக்கும் பாதுகாப்புத் தொழிற்சாலைகள் மற்றும் தொழிநுட்பக் கூட்டமைப்புகள் தீவிரப்படுத்தப்பட்டுள்ளன.

அத்துடன், பிராந்தியத்தில் தொடரும் போர்களைத் தவிர்க்க ஐநா சபையின் அனுசரணையில் போர்நிறுத்த முன்னெடுப்புகளிலும் இராஜதந்திர வழிகளிலும் நாடு கவனஞ்செலுத்துகிறது.

கருத்தியல் ரீதியான யுத்தம் மற்றும் அரசியல் பாதுகாப்பு வியூகம்

பௌதீக எல்லைகளைப் பாதுகாப்பது ஒருபுறமிருக்க, பிராந்திய அரசியல் நகர்வுகள் குறித்து மேற்கத்திய நாடுகளும் சர்வதேச ஊடகங்களும் சவூதி அரேபியா மீது தொடர்ச்சியான விமர்சனங்களை முன்வைத்து வந்துள்ளன. சில நாடுகளும் அமைப்புகளும் தங்களது அரசியல் நோக்கங்களுக்காகச் சவூதி மீது இத்தகைய கருத்தியல் தாக்குதல்களைத் தொடுத்து வருகின்றன. இந்த அரசியல் மற்றும் கருத்தியல் யுத்தத்தை அந்நாடு இராஜதந்திர வழிகளில் வெற்றிகரமாக எதிர்கொள்கிறது.

வரலாற்றில் எழும் இத்தகைய சோதனைகளும் சோதனைக் காலங்களும், குறைகளைக் களைந்து தங்களைப் பக்குவப்படுத்திக் கொள்ளக் கிடைத்த ஆன்மீக வாய்ப்புகளாகும். ஆன்மீகத் தலைமைப் பீடங்களின் வழிகாட்டுதலோடும், ஆட்சியாளர்களின் சீரிய நோக்கத்தோடும் இத்தகைய தருணங்களை எதிர்கொண்டு, மார்க்க நெறிமுறைகளுக்குட்பட்டு தங்களைச் சீர்திருத்திக் கொள்ளும் நாடுகள் இன்னும் பலமாக நிமிர்ந்து நிற்கும். இறை அருளுக்குரிய இந்தப் புனித பிரதேசமும், அதன் ஆட்சியாளர்களின் விவேகமான முன்னெடுப்புகளும் நாட்டைச் செழிப்பான மற்றும் பாதுகாப்பான எதிர்காலத்தை நோக்கி வெற்றிகரமாக அழைத்துச் செல்லும்.

நாட்டின் பொருளாதாரத்தை எண்ணெய் வருமானத்திலிருந்து விடுவித்து பன்முகப்படுத்தவும், நாட்டின் உட்கட்டமைப்பை நவீனப்படுத்தவும் ‘விஷன் 2030’ திட்டத்தின்கீழ் பல்வேறு வளர்ச்சிப் பணிகள் முன்னெடுக்கப்பட்டு வருகின்றன. அதேவேளையில், உள்நாட்டு மக்களின் கலாச்சார மற்றும் மத விழுமியங்களுக்கு மதிப்பளிக்கும் வகையிலும் நாட்டின் பிரதான பொருளாதார வளர்ச்சியை மட்டும் முன்னிறுத்தியும் சவூதி அரசு கவனமான நகர்வுகளை மேற்கொண்டு வருகிறது. இதன் மூலம் இஸ்லாமிய உலகின் ஆன்மீக மையமான தனது புனிதத் தலங்களைப் பாதுகாத்துக் கொள்ளும் அதேவேளையில், நவீன உலகத்திற்கு ஏற்ற பொருளாதார மற்றும் தொழில்நுட்ப வளர்ச்சியையும் தடையின்றி அடைந்து வருகிறது.

இதற்கிடையில், நாட்டின் உள்நாட்டுப் பாதுகாப்பையும் டிஜிட்டல் கட்டமைப்பையும் பலப்படுத்த சவூதி அரசு அதிநவீன சைபர் பாதுகாப்பு மையத்தையும் செயல்பாட்டுக்குக் கொண்டுவந்துள்ளது. இது தரவு மற்றும் தகவல்களைப் பாதுகாத்தல், கணினி வலைப்பின்னல்களில் உள்ள பாதுகாப்புக் குறைபாடுகளைக் கண்டறிதல் மற்றும் இணையவழி அச்சுறுத்தல்களை எதிர்கொள்ளுதல் போன்ற பணிகளை மேற்கொண்டு நாட்டின் தொழில்நுட்ப உட்கட்டமைப்பைப் பாதுகாக்கிறது. மேலும், பாதுகாப்புப் படையினருக்கான சேவைகள் Absher Interior செயலி மூலம் டிஜிட்டல் முறையில் வழங்கப்பட்டு நிர்வாகச் செயல்பாடுகள் எளிமைப்படுத்தப்பட்டுள்ளன.

எதற்கெடுத்தாலும் அமெரிக்கா மற்றும் மேற்கு நாடுகளை மட்டுமே நம்பியிருக்கும் நிலையை மாற்றி, சவூதி அரேபியா தனது வெளியுறவுக் கொள்கையைப் பல்பரிமாணப்படுத்தியுள்ளது. சீனா, ரஷ்யா, இந்தியா மற்றும் பிற முக்கிய நாடுகளுடன் ஆழமான பொருளாதார மற்றும் மூலோபாய உறவுகளை ஏற்படுத்தியுள்ளது. குறிப்பாக BRICS அமைப்பில் இணைந்ததும், சீனா மற்றும் பிராந்திய நாடுகளின் மத்தியஸ்தத்துடன் இராஜதந்திர உறவுகளைச் சீரமைத்துக் கொண்டதும், எந்த ஒரு பெரிய நாட்டின் அரசியல் அல்லது கருத்தியல் அழுத்தத்திற்கும் இனி சவூதி அரேபியா முழுமையாக அடிபணியாது என்பதை உலகிற்கு உணர்த்தியுள்ளது. இஸ்லாமிய உலகின் ஆன்மீக மையமான சவூதி அரேபியா, தனது இஸ்லாமிய அடையாளத்தைப் பாதுகாப்பதோடு, பொருளாதார ரீதியில் நட்பு நாடுகளுடன் சமநிலையான வணிக உறவைப் பேணி வருகிறது. இதன் மூலம் தன் மீது தொடுக்கப்படும் அரசியல் மற்றும் கருத்தியல் ரீதியான அழுத்தங்களை முறியடித்து, தனது தேசிய நலனை எவ்வித சமரசமுமின்றி நிலைநிறுத்துகிறது.

அல்லாஹ்வின் அருளோடும் பாதுகாப்போடும், சவூதி அரேபியாவின் ஆட்சியாளர்கள் நாட்டின் இறையாண்மையையும் பிராந்திய ஸ்திரத்தன்மையையும் பாதுகாப்பதற்காக மேற்கொண்டு வரும் இத்தகைய உறுதியான நடவடிக்கைகள் யாவும் பாராட்டுக்குரியவை. ஆயுத ரீதியான வான் பாதுகாப்பு, அதிநவீன தொழில்நுட்ப மையங்கள் மற்றும் இஸ்லாமிய நாடுகளின் கூட்டுறவுகள் மூலம் பௌதீக அச்சுறுத்தல்களைச் சமாளிப்பதோடு, கருத்தியல் ரீதியான சவால்களைத் தங்களின் தொலைநோக்குத் திட்டங்கள் மற்றும் நியாயமான இராஜதந்திர நகர்வுகள் மூலம் வெற்றிகரமாக எதிர்கொண்டு வருகின்றனர். சவூதி மக்களின் பாதுகாப்பும், நாட்டின் வளமான எதிர்காலமும் நிலைபெற்று, ஆட்சியாளர்களின் இத்தகைய சிறந்த முயற்சிகள் அனைத்தும் பரிபூரண வெற்றி பெற எல்லாம் வல்ல இறைவன் அருள் புரிவானாக.