தலைவர் தொடர்ந்தும் உள்ளே இருக்கும் நிலையில் மீண்டும் களத்தில் இறங்குகிறது பொதுஜன பெரமுன – இம்முறை அரசாங்கத்தின் குறைகளை கிராம மக்களுக்கு கொண்டு செல்லும் வேலைதிட்டம்

கொழும்பில் இருந்து தொடங்குகிறது ஸ்ரீலங்கா பொதுஜன பெரமுனவின் கிராமிய அளவிலான மக்கள் சந்திப்பு!
ஸ்ரீலங்கா பொதுஜன பெரமுன (SLPP) கட்சி திங்கட்கிழமை (2) முதல் நாடு முழுவதும் கிராமிய அளவிலான மக்கள் சந்திப்புகளை நடத்தவுள்ளது. கொழும்பு மாவட்டத்தில் இந்த வேலைத்திட்டம் முதற்கட்டமாக தொடங்கப்படும் என கட்சியின் செயல்பாட்டுத் தலைவர் ஜோன்ஸ்டன் பெர்னாண்டோ அறிவித்துள்ளார்.
ஸ்ரீலங்கா பொதுஜன பெரமுனவின் தேசிய அமைப்பாளர் நாமல் ராஜபக்ஷவின் வழிகாட்டலில் இந்த நடவடிக்கை ஏற்பாடு செய்யப்பட்டுள்ளது. இதன்கீழ், வாரத்தில் ஐந்து நாட்கள் கட்சியின் கிளைகள் மற்றும் கிராமப்புற மக்களுடன் கலந்துரையாடல்கள் நடைபெறும்.
கொழும்பு மாவட்டத்தில் நடைபெற்ற தொகுதி அமைப்பாளர்களின் கூட்டத்தில் உரையாற்றிய ஜோன்ஸ்டன் பெர்னாண்டோ, அரசாங்கத்தின் நிறைவேற்றப்படாத தேர்தல் வாக்குறுதிகள் மற்றும் ஊழல்கள் குறித்து மக்களுக்கு தெளிவுபடுத்துவதே இந்த முயற்சியின் முக்கிய நோக்கம் எனக் குறிப்பிட்டார்.
சமீபத்தில் சர்ச்சையை ஏற்படுத்திய 323 கொள்கலன்கள் விடுவிக்கப்பட்ட விவகாரம், நிலக்கரி கொள்முதலில் இடம்பெற்றதாகக் கூறப்படும் முறைகேடுகள், மத்திய வங்கி கணினி அமைப்பில் ஊடுருவப்பட்டதாகக் கூறப்படும் சம்பவம் மற்றும் தவறான கணக்குகளுக்கு பணம் அனுப்பப்பட்ட விவகாரம் ஆகியவற்றை மக்களிடம் கொண்டு சேர்க்குமாறு அவர் அமைப்பாளர்களுக்கு அறிவுறுத்தினார்.
அத்தியாவசியப் பொருட்கள், சுகாதாரப் பொருட்கள் மற்றும் பாடசாலை உபகரணங்களுக்கான வரிகளைக் குறைப்பதாக அரசாங்கம் வழங்கிய வாக்குறுதிகளை மக்களுக்கு நினைவூட்டுமாறும் அவர் கேட்டுக் கொண்டார்.
இந்த பொருட்களுக்கான வரிகளை நீக்குவதாகக் கூறிய வாக்குறுதிகளை நிறைவேற்ற தற்போதைய நிர்வாகம் தவறிவிட்டதாக அவர் குற்றம் சாட்டினார்.
தனது அடித்தள அரசியல் செயல்பாடுகளை பலப்படுத்தும் நோக்கில், இந்த மக்கள் சந்திப்புகளை நாடு தழுவிய ரீதியில் நடத்த ஸ்ரீலங்கா பொதுஜன பெரமுன திட்டமிட்டுள்ளது.