சவூதி அரசாங்கத்தினால் வழங்கப்படும் ”பேசா விசா” முறையைத் தவறாகப் பயன்படுத்தி, ஹஜ் குழுவின் தலைவர் மற்றும் ஏனைய சில உறுப்பினர்கள் தமது மனைவியரை இம்முறை ஹஜ் யாத்திரையில் ஈடுபடுத்த நடவடிக்கை எடுத்துள்ளது அம்பலம்

சவூதி அரசாங்கத்தினால் தன்னார்வ ஹஜ் யாத்ரீகர்களுக்கு வழங்கப்படும் ‘பேசா விசா’ (Free Movement Pass) முறையைத் தவறாகப் பயன்படுத்தி, ஹஜ் குழுவின் தலைவர் மற்றும் ஏனைய சில உறுப்பினர்கள் தமது மனைவியரை இம்முறை ஹஜ் யாத்திரையில் ஈடுபடுத்த நடவடிக்கை எடுத்துள்ளதாக யாத்ரீகர்கள் குற்றம் சுமத்துகின்றனர்.
இதற்காக ஹஜ் குழு உறுப்பினர்கள் போலித் தகவல்களைச் சமர்ப்பித்து அரசியல் அனுமதியையும் பெற்றுள்ளதாக அவர்கள் கூறுகின்றனர்.

இதன் காரணமாக, பேசா விசா கிடைக்காமையினால் தன்னார்வ ஏற்பாட்டாளர்கள் குழுவொன்று கடும் அநீதிக்குள்ளாகியுள்ளதாகவும் அவர்கள் குறிப்பிடுகின்றனர்.
ஹஜ் குழு உறுப்பினர்கள் இவ்வாறு தமது மனைவியரை அழைத்துச் செல்வது ஒரு மோசடியாகும் என்றும், அவ்வாறு செல்லும் பெண்களுக்கு நோய் ஏற்பட்டால் அவர்களால் யாத்திரையில் ஈடுபட முடியாது எனவும், அது ஒரு மதச் சட்டமாகும் எனவும் யாத்ரீகர்கள் தெரிவிக்கின்றனர்.
சவூதி அரசாங்கத்தினால் இம்முறையும் இலங்கைக்கு 35 பேசா விசாக்கள் (Free Movement Pass) வழங்கப்பட்டுள்ள நிலையில், ஹஜ் குழு உறுப்பினர்கள் அதில் சிலவற்றை இவ்வாறு தவறாகப் பயன்படுத்தியுள்ளதாக யாத்ரீகர்கள் கூறுகின்றனர்.

இந்த பேசா விசாக்கள் ஹஜ் நடவடிக்கைகளை ஏற்பாடு செய்யும் முகவர்களுக்கு மாத்திரம் உரியதல்ல எனவும், ஹஜ் பயணத்தின் போது முகவர்களினால் மேற்கொள்ளப்படும் பணிகள் மற்றும் சேவைகளை ஒழுங்குபடுத்துவதற்கு ஹஜ் குழு திணைக்களத்திற்கு அமைச்சர்கள் பங்குபற்ற வேண்டும் எனவும் போலித் தர்க்கங்களை முன்வைத்து, இதற்கு முன்னரும் முன்னாள் அமைச்சர்கள் தமக்கு விருப்பமான முறையில் இந்த விசாக்களைப் பகிர்ந்து கொள்வதை வழக்கமாகக் கொண்டிருந்ததாக அவர்கள் கூறுகின்றனர்.

சில முன்னாள் அமைச்சர்கள் அந்த ஹஜ் பயணத்திற்குத் தேவையான மேலதிக செலவுப் பணத்தைக் கூட ஹஜ் நிதியத்திலிருந்து பயன்படுத்தியதாகக் கூறப்படுகிறது.
இந்த பேசா விசாவிற்காக 35,000 ரூபாவிற்கும் குறைவான ஒரு சிறிய தொகையைச் செயலாக்கக் கட்டணமாகச் செலுத்தினால் போதுமானது என்பதாலும், வேறு எந்தச் செலவும் இல்லாததாலும் அதிகாரிகள் இந்த விசாவைத் தவறாகப் பயன்படுத்த நடவடிக்கை எடுக்கின்றனர்.

சாதாரணமாக ஹஜ் யாத்திரை செய்வதற்கு சுமார் 20 இலட்சம் ரூபா செலவாகும் நிலையில், இவர்கள் தமது மனைவியரை இவ்வாறு இலவசமாக யாத்திரைக்கு அழைத்துச் செல்வதாக யாத்ரீகர்கள் தெரிவித்தனர்.
கடந்த நவம்பர் மாதம் 5ஆம் திகதி ஊடகவியலாளர் சந்திப்பொன்றை நடத்திய ஹஜ் குழு, இவ்வருடம் கண்டிப்பாக 35 பேசா விசாக்களும் முகவர்களுக்கு மாத்திரமே வழங்கப்படும் எனவும், அவை ஹஜ் நடவடிக்கைகளை ஏற்பாடு செய்யும் முகவர்களுக்காக வழங்கப்படும் எனவும் வலியுறுத்தியிருந்தது.

அவ்வாறு கூறிய போதிலும், குழு உறுப்பினர்கள் தமது மனைவியரை பேசா விசா மூலம் ஹஜ்ஜிற்கு அழைத்துச் செல்வது பெரும் முரண்பாட்டை ஏற்படுத்தியுள்ளது.
மேலும், ஹஜ் குழுவினால் இவ்வருடம் தெரிவு செய்யப்பட்ட சவூதி விநியோகஸ்தர் நிறுவனம், பேசா விசாவிற்காக விசேட மினா கூடாரம் ஒன்றை அமைப்பதற்கு முன்னெப்போதும் இல்லாத வகையில் பணம் செலுத்துமாறு வற்புறுத்தியுள்ளது.

இது சாதாரணமாக ஹஜ் செல்லும் ஒருவருக்கு ஏற்படும் செலவில் பாதி எனச் சொல்லப்படுகிறது.

அத்துடன், இந்த பேசா விசாவைப் பெறுபவர்கள் கடந்த நவம்பர் மாதம் சவூதியில் நடைபெற்ற கட்டாயப் பயிற்சித் திட்டத்தில் பங்குபற்றியவர்களாக இருக்க வேண்டும் என ஹஜ் குழுத் தலைவர் குறிப்பிட்டிருந்தார்.

எவ்வாறாயினும், அவர்களின் மனைவியர் எப்போது சவூதி சென்றார்கள், எப்போது அந்தப் பயிற்சியில் பங்குபற்றினார்கள் என்ற கேள்விகளை எழுப்பி, ஹஜ் குழு உறுப்பினர்களின் நம்பகத்தன்மை மற்றும் பொறுப்புக்கூறல் குறித்து யாத்ரீகர்கள் கேள்வி எழுப்புகின்றனர்.  தகவல் ; லங்கா தீப பத்திரிகை