பொருளாதார ரீதியில் நலிவடைந்து மற்றும் சீரழிந்திருந்த ஒரு நாட்டைப் பொறுப்பேற்ற தற்போதைய அரசாங்கம், பொதுமக்கள் மீது எந்தவொரு கூடுதல் பொருளாதாரச் சுமையையும் சுமத்தாமல் நாட்டை ஸ்திரமான நிலைக்குக் கொண்டு வந்துள்ளது சுகாதார மற்றும் ஊடகத்துறை அமைச்சர் டொக்டர் நளிந்த ஜெயதிஸ்த தெரிவித்துள்ளார்.
ஊடகங்களுக்குக் கருத்துத் தெரிவிக்கும் போதே அமைச்சர் இதனைக் குறிப்பிட்டார். 2024 ஆம் ஆண்டு செப்டம்பருக்கு முன்னர் இலங்கையின் பொருளாதாரம் மிக ஆபத்தான கட்டத்தில்தான் இருந்தது என்பதை அவர் சுட்டிக்காட்டினார்.
கடந்த நவம்பர் மாதம் ஏற்பட்ட வெள்ளப்பெருக்கு நிலைமை காரணமாக நாட்டின் சனத்தொகையில் 11 வீதமானோர் பாதிக்கப்பட்டுள்ள போதிலும், மத்திய கிழக்கில் நிலவும் நெருக்கடியான சூழலிலும் அரசாங்கம் மிகப் பிரயோகமாகப் பொருளாதாரத்தைக் கையாண்டு வருவதாக அவர் தெரிவித்தார்.
பயங்கரவாதத் தடைச் சட்டத்தை நீக்குமாறு பலரும் கோரிக்கை விடுத்த போதிலும், அது ஒரே பேனா முனையில் (ஒரே கையெழுத்தில்) செய்யக் கூடிய எளிய காரியம் அல்ல என்பதை அமைச்சர் இதன்போது வலியுறுத்தினார்.
“சட்டங்களை மீளாய்வு செய்வதும் சட்டங்களை நீக்குவதும் மிகவும் சிக்கலான ஒரு செயலாகும். பயங்கரவாதத் தடைச் சட்டத்தை நீக்கும் நடவடிக்கைகள் தற்போது இறுதிக்கட்டத்தில் உள்ளன. நாங்கள் வாக்களித்தபடியே அதனை நிறைவேற்றுவோம்” என்று அவர் கூறினார்.
பயங்கரவாதத் தடைச் சட்டம் நீக்கப்பட்டதன் பின்னர் ஏற்படும் சட்டரீதியான வெற்றிடத்தை நிரப்புவதற்காக ‘ஒழுங்கமைக்கப்பட்ட குற்றங்களைத் தடுக்கும் சட்டம்’ என்ற புதிய சட்டமூலம் தயாரிக்கப்பட்டு வருவதாகவும் அமைச்சர் தெரிவித்தார்.
முன்னாள் நீதி அமைச்சரொருவரின் புதல்வர் பாதாள உலகத் தலைவர் ஒருவருடன் மேற்கொண்ட கொடுக்கல்வாங்கல்கள் தொடர்பில் விளக்கமறியலில் வைக்கப்பட்டுள்ளமை குறித்துக் கருத்துத் தெரிவிக்கும் போதே, இவ்வாறான ஒழுங்கமைக்கப்பட்ட குற்றங்களையும் ஊழல்வாதிகளையும் ஒடுக்குவதற்கு வலுவானதொரு சட்டக் கட்டமைப்பு அவசியமென்பதை அவர் சுட்டிக்காட்டினார்.
கடந்த அரசாங்கங்கள் பல்வேறு வாக்குறுதிகளை வழங்கிய போதிலும் அவற்றை நடைமுறைப்படுத்துவதில் தோல்வியடைந்தனவென்றும், தற்போதைய அரசாங்கம் மக்களின் உரிமைகளைப் பாதுகாத்து மிகவும் நடைமுறை ரீதியாக முன்நோக்கிச் செல்வதாகவும் அமைச்சர் நளிந்த ஜெயதிஸ்த மேலும் தெரிவித்தார்.
