சொகுசு வாகனம் ஒன்றில் வந்து, பொலிஸ் மா அதிபர் (IGP) மற்றும் பிரதம நீதியரசர் ஆகியோரின் உத்தியோகபூர்வ வீடுகள் அமைந்துள்ள வீதிகளில் வீடியோ பதிவு செய்த நபர் கைது

பொலிஸ் மா அதிபர் (IGP) மற்றும் பிரதம நீதியரசர் ஆகியோரின் உத்தியோகபூர்வ இல்லங்களைச் சுற்றியுள்ள வீதிகளைக் காணொளி பதிவு செய்த குற்றச்சாட்டில் 40 வயதுடைய நபர் ஒருவர் கறுவாத்தோட்டம் பொலிஸாரால் கைது செய்யப்பட்டுள்ளார்.

காணொளிகளைப் பதிவு செய்யப் பயன்படுத்தப்பட்டதாகக் கூறப்படும் கைப்பேசியையும் பொலிஸார் கைப்பற்றியுள்ளனர்.
பொலிஸாரின் கூற்றுப்படி, சந்தேகநபர் ஆடம்பர வாகனம் ஒன்றில் வந்து, பொலிஸ் மா அதிபரின் உத்தியோகபூர்வ இல்லத்தின் நுழைவாயிலுக்கு அருகில் காணொளி பதிவு செய்வதைக் கடமையிலிருந்த விசேட அதிரடிப்படை (STF) அதிகாரி ஒருவர் அவதானித்துள்ளார்.

குறித்த அதிரடிப்படை அதிகாரி, அப்பகுதியில் இருந்த போக்குவரத்துப் பொலிஸ் கொன்ஸ்டபிள் ஒருவருக்குத் தெரியப்படுத்தியதையடுத்து, அவர் கொழும்பு அவசரப் பிரிவுக்குத் தகவல் வழங்கியுள்ளார். அதனடிப்படையில் கறுவாத்தோட்டம் பொலிஸ் நிலையத்தைச் சேர்ந்த பொலிஸ் குழுவினர் சம்பவ இடத்திற்கு விரைந்து விசாரணைகளை மேற்கொண்டு சந்தேகநபரைக் கைது செய்தனர். 

சந்தேகநபரின் கைப்பேசியை முதற்கட்டப் பரிசோதனைக்கு உட்படுத்தியபோது, பொலிஸ் மா அதிபரின் உத்தியோகபூர்வ இல்லம் மற்றும் அதனைச் சுற்றியுள்ள வீதிகள், அதேபோன்று பிரதம நீதியரசரின் உத்தியோகபூர்வ இல்லம் மற்றும் அதன் சுற்றுவட்டாரப் பகுதிகளின் காணொளிகள் கண்டறியப்பட்டதாகப் பொலிஸார் தெரிவித்தனர். 

ஆரம்பக் விசாரணையின் போது, பொழுதுபோக்காகவே இந்தக் காணொளிகளைப் பதிவு செய்ததாகச் சந்தேகநபர் தெரிவித்துள்ளார். 

இருப்பினும், மேலதிக விசாரணைகளின் போது தனது வசிப்பிடம் மற்றும் ஏனைய விபரங்கள் குறித்து அவர் முரண்பாடான தகவல்களை வழங்கியதாகப் பொலிஸார் தெரிவித்தனர்.

கைது செய்யப்பட்டவர் அலுபோமுல்ல, அருக்கொட பகுதியைச் சேர்ந்த 40 வயதுடைய நபராவார். கறுவாத்தோட்டம் பொலிஸார் மேலதிக விசாரணைகளை மேற்கொண்டு வருகின்றனர்.