மன்னார் கடையில் வாங்கிய வடையில் வெட்டுக்கிளி – வாடிக்கையாளர் அதிர்ச்சி – சுகாதார அதிகாரிகள் தொடர்ச்சியான கண்காணிப்பு நடவடிக்கைகளை முன்னெடுக்க வேண்டும் எனவும் கோரிக்கை

மன்னார் மாந்தை மேற்கு சுகாதார வைத்திய அதிகாரி பணிமனைக்கு உட்பட்ட மூன்றாம் பிட்டி பகுதியில் உள்ள பிரபல உணவகம் ஒன்றில் வாங்கப்பட்ட வடையில் வெட்டுக்கிளி ஒன்று காணப்பட்ட சம்பவம் அப்பகுதி மக்களிடையே பெரும் அதிர்ச்சியையும் கவலையையும் ஏற்படுத்தியுள்ளது..

குறித்த உணவகத்தில் வடைகளை வாங்கிச் சாப்பிடுவதற்கு முற்பட்ட வேளையிலேயே, வடைக்குள் வெட்டுக்கிளி ஒன்று இறுகிய நிலையில் இருந்தமை கண்டறியப்பட்டுள்ளது.

மன்னார் நகர் பகுதியில் வாங்கிய முட்டை ரொட்டியில் இரும்புக் கம்பித் துண்டு ஒன்று கண்டெடுக்கப்பட்ட சம்பவம் பெரும் பரபரப்பை ஏற்படுத்தியிருந்த நிலையில், அடுத்த சில நாட்களுக்குள் மற்றொரு உணவுப் பொருளில் வெட்டுக்கிளி காணப்பட்டுள்ளமை மக்களிடையே கடும் கொதிப்பை ஏற்படுத்தியுள்ளது.

இதையடுத்து, மாந்தை மேற்கு பொது சுகாதார வைத்திய அதிகாரி பணிமனையினர் உடனடியாக இது தொடர்பில் தீவிர விசாரணைகளை மேற்கொண்டு விரைவான நடவடிக்கைகளை எடுக்க வேண்டும் எனப் பொதுமக்கள் கோரிக்கை விடுத்துள்ளனர்.

மேலும், மன்னார் மாவட்டத்தில் உள்ள அனைத்து உணவகங்களின் உணவுத் தரம் மற்றும் சுகாதார நிலைமைகள் குறித்துச் சம்பந்தப்பட்ட அதிகாரிகள் தொடர்ச்சியான கண்காணிப்பு நடவடிக்கைகளை முன்னெடுக்க வேண்டும் என்றும் வலியுறுத்தப்பட்டுள்ளது.

எஸ்.ஆர்.லெம்பேட்