நாடு முழுவதும் திடீரென ஏற்பட்ட மின்சாரத் தடையைத் தொடர்ந்து, நொராச்சோலை லக்விஜய நிலக்கரி மின் நிலையத்தில் இயங்கிக்கொண்டிருந்த மூன்று மின் உற்பத்தி அலகுகளும் முற்றிலுமாக செயலிழந்துள்ளதாக மின் நிலைய நிர்வாகம் உறுதிப்படுத்தியுள்ளது.
தேசிய மின் கட்டமைப்பில் ஏற்பட்ட திடீர் தொழில்நுட்பக் கோளாறு மற்றும் கட்டமைப்பின் அதிர்வெண் (Frequency) ஒரே நேரத்தில் வீழ்ச்சியடைந்ததன் காரணமாக, தானியங்கி பாதுகாப்பு நடவடிக்கையாக மின் நிலையத்தின் இயக்கம் ஒரே நேரத்தில் இவ்வாறு தடைபட்டுள்ளதாக அதிகாரிகள் சுட்டிக்காட்டுகின்றனர்.
இந்த திடீர் செயலிழப்புடன், நொராச்சோலை மின் நிலையம் மூலம் தேசிய மின் கட்டமைப்பிற்கு வழங்கப்பட்டு வந்த முழு மின் திறனும் தற்போது துண்டிக்கப்பட்டுள்ளது.
நீர்மின் நிலையங்கள் அல்லது டீசல் மின் நிலையங்களைப் போலன்றி, நிலக்கரி மின் நிலையமொன்று கட்டமைப்பிலிருந்து துண்டிக்கப்பட்டவுடன் அதனை உடனடியாக மீண்டும் இயக்குவதற்கான தொழில்நுட்ப வசதி கிடையாது. உயர் வெப்பநிலையில் உள்ள கொதிகலன்கள் (Boilers) மற்றும் நீராவி விசையாழிகள் (Steam Turbines) முழுமையாகக் குளிரவடைய அனுமதிக்கப்பட்ட பின்னரே, மீண்டும் அழுத்தத்தை (Pressure) அதிகரித்து மின் கட்டமைப்பில் இணைக்கப்பட வேண்டும். இதற்கு பொதுவாக குறைந்தது 48 முதல் 72 மணிநேரம் வரை ஆகும் என மின் பொறியியலாளர்கள் சுட்டிக்காட்டுகின்றனர்.
நாட்டின் தினசரி மின் தேவையில் 40 சதவீதத்திற்கும் அதிகமான அடிப்படை மின் திறனை, தலா 300 மெகாவாட் திறன் கொண்ட 3 உற்பத்தி இயந்திரங்களைக் கொண்ட நொராச்சோலை லக்விஜய மின் நிலையம் வழங்கி வருகிறது. இதற்கு முன்பும் நாடு முழுவதும் மின்சாரத் தடை ஏற்படும் போதெல்லாம் இந்த மின் நிலையம் செயலிழந்ததுடன், அதனை இயல்பு நிலைக்குக் கொண்டுவரும் வரை கட்டமைப்பில் ஏற்படும் 900 மெகாவாட் மாபெரும் மின் பற்றாக்குறையைச் சமாளிப்பது அதிகாரிகளுக்கு பெரும் சவாலாக இருந்துள்ளது.
