சஜித்தின் இன்றைய குற்றச்சாட்டுக்கள்

நிலக்கரி மோசடியால் ஏற்பட்டுள்ளதாகக் கூறப்படும் 18 பில்லியன் ரூபா நட்டத்தை நாட்டு மக்களே சுமக்க வேண்டிய நிலை ஏற்பட்டுள்ளதாகவும், கோதுமை மாவின் விலை அதிகரிப்பு தோட்டப்புற மக்களைப் பெரிதும் பாதிக்கும் எனவும் எதிர்க்கட்சித் தலைவர் சஜித் பிரேமதாச தெரிவித்துள்ளார்.



இன்று (21) நாடாளுமன்றத்தில் உரையாற்றிய அவர், தடையற்ற மின்சாரத்தை வழங்குவதாகக் கூறி ஆட்சிக்கு வந்த அரசாங்கம் தற்போது நாடளாவிய ரீதியில் மின்வெட்டுகளை அமுல்படுத்தி வருவதாகக் குற்றஞ்சாட்டினார்.



நுரைச்சோலை அனல் மின் உற்பத்தி நிலையத்தின் மூன்று அலகுகளும் தலா 300 மெகாவாட் வீதம் மொத்தமாக 900 மெகாவாட் மின்சாரத்தை உற்பத்தி செய்யும் திறன் கொண்டவை எனக் குறிப்பிட்ட அவர், தரமற்ற நிலக்கரி காரணமாக இந்த அலகுகள் பழுதடைந்துள்ளதாகவும் தெரிவித்தார். இதனால் ஏற்பட்டுள்ளதாகக் கூறப்படும் நட்டத்தை 81 இலட்சம் மின்சார நுகர்வோர் மீது சுமத்த வேண்டிய நிலை உருவாகியுள்ளதாகவும் அவர் சுட்டிக்காட்டினார்.



கோதுமை மாவின் விலை அதிகரிப்பு மக்களுக்கு மேலும் சுமை



நேற்று நள்ளிரவு முதல் கோதுமை மாவின் விலை 13 ரூபாவால் அதிகரிக்கப்பட்டுள்ளதாகத் தெரிவித்த சஜித் பிரேமதாச, இதனால் பாண் உள்ளிட்ட பேக்கரி உற்பத்திகளின் விலைகளும் அதிகரிக்கக்கூடும் எனக் குறிப்பிட்டார்.



இந்த விலை அதிகரிப்பு தோட்டப்புற மக்களின் வாழ்க்கைச் செலவில் மேலும் சுமையை ஏற்படுத்தும் என்றும், மக்களுக்கு நிவாரணம் வழங்குவதாகக் கூறும் அரசாங்கத்தின் செயற்பாடுகள் இதற்கு முரணாக உள்ளதாகவும் அவர் விமர்சித்தார்.



உணவுச் செலவுகள் அதிகரிப்பதால், பாடசாலை மாணவர்கள் உள்ளிட்ட குடும்ப உறுப்பினர்களின் ஏனைய அத்தியாவசியத் தேவைகளுக்காகச் செலவிடப்படும் தொகையும் குறைவடைவதாக அவர் தெரிவித்தார்.



ஓய்வூதியதாரர்களின் வாக்குறுதிகள் நிறைவேற்றப்படவில்லை



2020 முதல் 2024 வரையான காலப்பகுதியில் ஓய்வுபெற்றவர்களின் நிலுவைச் சம்பளம் மற்றும் கொடுப்பனவுகள் தொடர்பில் அரசாங்கம் உரிய நடவடிக்கை எடுக்கவில்லை என எதிர்க்கட்சித் தலைவர் குற்றஞ்சாட்டினார்.



சுமார் 154,000 ஓய்வூதியதாரர்களைப் பிரதிநிதித்துவப்படுத்தும் தரப்பினர் தமது கோரிக்கைகளை முன்வைத்து ஆர்ப்பாட்டத்தில் ஈடுபட்டதாகக் குறிப்பிட்ட அவர், தேர்தல் காலத்தில் வழங்கப்பட்ட வாக்குறுதிகள் நிறைவேற்றப்படவில்லை என்றும் தெரிவித்தார்.



வேலையற்ற பட்டதாரிகளின் பிரச்சினைக்கும் தீர்வில்லை



நாட்டில் சுமார் 80,000 வேலையற்ற பட்டதாரிகளும், 16,000 ஆசிரியர் அபிவிருத்தி உத்தியோகத்தர்களும் உள்ளதாகத் தெரிவித்த சஜித் பிரேமதாச, இவர்களை ஆசிரியர் சேவைக்குள் உள்வாங்குவதாக வழங்கப்பட்ட வாக்குறுதிகள் இன்னும் நிறைவேற்றப்படவில்லை எனக் கூறினார்.



பட்டதாரிகளுக்கு வேலைவாய்ப்புகளை வழங்குவதாகத் தேர்தல் விஞ்ஞாபனத்தில் குறிப்பிடப்பட்டிருந்த போதிலும், அதற்கான நடவடிக்கைகள் உரிய முறையில் முன்னெடுக்கப்படவில்லை என்றும் அவர் சுட்டிக்காட்டினார்.



சிறு மற்றும் நடுத்தர தொழில்முயற்சியாளர்களும் பாதிப்பு



நுண், சிறிய மற்றும் நடுத்தர அளவிலான தொழில்முயற்சியாளர்களுக்கு நிவாரணம் வழங்குவதற்காக ஒதுக்கப்பட்ட நிதி வங்கிகள் ஊடாக வழங்கப்படுவதால், கறுப்புப் பட்டியலில் உள்ள பல தொழில்முயற்சியாளர்களுக்கு அந்த நிவாரணங்கள் கிடைக்கவில்லை எனவும் எதிர்க்கட்சித் தலைவர் தெரிவித்தார்.



பல்வேறு பேரிடர்களால் பாதிக்கப்பட்ட தொழில்முயற்சியாளர்களும் கைத்தொழில் துறையினரும் உரிய நிதியுதவியைப் பெற முடியாத நிலை காணப்படுவதாக அவர் மேலும் குறிப்பிட்டார்.



மருத்துவத் துறைகள் மற்றும் பொருளாதார வாக்குறுதிகள் குறித்தும் விமர்சனம்



ஆயுர்வேதம், சித்தா, யூனானி மற்றும் ஹோமியோபதி மருத்துவத் துறைகளை முன்னேற்றுவதற்கு அரசாங்கம் போதிய நடவடிக்கைகளை எடுக்கவில்லை எனவும் சஜித் பிரேமதாச குற்றஞ்சாட்டினார்.



மேலும், எரிபொருள் விலையைக் குறைப்பது, மின்சாரக் கட்டணத்தை 33 சதவீதத்தால் குறைப்பது மற்றும் சர்வதேச நாணய நிதியத்துடனான ஒப்பந்தத்தை மாற்றியமைப்பது உள்ளிட்ட தேர்தல் வாக்குறுதிகளும் நிறைவேற்றப்படவில்லை என அவர் தெரிவித்தார்.



அரசாங்கம் மக்களுக்கு வழங்கிய வாக்குறுதிகளை நிறைவேற்றி, நீதியையும் நியாயத்தையும் நிலைநாட்ட வேண்டும் என வலியுறுத்திய எதிர்க்கட்சித் தலைவர், ஐக்கிய மக்கள் சக்தியும் ஐக்கிய மக்கள் கூட்டணியும் மக்களின் அரசியல், பொருளாதார, சமூக, கலாசார மற்றும் மத உரிமைகளைப் பாதுகாப்பதற்குத் தொடர்ந்து அர்ப்பணிப்புடன் செயற்படும் என்றும் தெரிவித்தார்.