கோலிக்குண்டுகள், தொண்டையில் சிக்கி மூச்சுத்திணறல் ஆபத்தை ஏற்படுத்தக்கூடும் என்ற அச்சத்தால் கொழும்பு மாநகர சபையினால் கடைகளில் இருந்து 12,000 கோலி சோடா போத்தல்கள் பறிமுதல் செய்யப் பட்டன
கொழும்பு மாநகர சபையினால் (CMC) ‘கோலி சோடா’ எனப்படும் பிரபல மென்பானத்தின் சுமார் 12,000 பாட்டில்கள் பறிமுதல் செய்யப்பட்டுள்ளன.
இந்த பாட்டில்களின் மூடிகளில் உள்ள சிறிய கோலிக்குண்டுகள், சிறுவர்களுக்கும் பெரியவர்களுக்கும் தொண்டையில் சிக்கி மூச்சுத்திணறல் ஆபத்தை ஏற்படுத்தக்கூடும் என்ற அச்சத்தாலேயே இந்நடவடிக்கை எடுக்கப்பட்டுள்ளது.
பாதுகாப்பற்ற முறையில் பொதி செய்யப்பட்டிருந்ததால், பொது சுகாதார பரிசோதகர்கள் சோதனைகளை மேற்கொண்டு இந்த பாட்டில்களை பறிமுதல் செய்ததாக கொழும்பு மேயர் வ்ராய் கெலி பல்தசார் தெரிவித்தார்.
இவ்வாறான பாட்டில்களில் உள்ள சிறிய கோலிக்குண்டுகள் சிறுவர்கள் மற்றும் பெரியவர்களின் தொண்டையில் சிக்கி மூச்சுத்திணறல் ஏற்பட்ட சம்பவங்கள் பதிவாகியுள்ளதாக மேயர் சுட்டிக்காட்டினார்.
உணவு பாதுகாப்பு விதிகளை மீறியமைக்காக சட்ட நடவடிக்கை எடுக்கப்பட்டு, 109 குற்றச்சாட்டுகளை உள்ளடக்கிய மூன்று நீதிமன்ற வழக்குகள் தாக்கல் செய்யப்பட்டதாக அவர் கூறினார்.
நீதிமன்றம் மொத்தம் 351,000 ரூபாய் அபராதம் விதித்ததுடன், பறிமுதல் செய்யப்பட்ட சரக்குகளை அழிக்குமாறும் உத்தரவிட்டது.
பொதுமக்களின் பாதுகாப்பை உறுதி செய்ய பாடுபட்ட கொழும்பு மாநகர சபை சுகாதார திணைக்களம் மற்றும் பொது சுகாதார பரிசோதகர்களுக்கு பால்தஜார் தனது நன்றியை தெரிவித்துக் கொண்டார்.
இவ்வாறான நடவடிக்கைகளின் வெற்றியை, பறிமுதல் செய்யப்பட்ட பாட்டில்களின் எண்ணிக்கை அல்லது விதிக்கப்பட்ட அபராதத் தொகையை வைத்து மட்டும் மதிப்பிடக்கூடாது என்றும், இவற்றின் மூலம் தவிர்க்கப்பட்ட விபத்துகளின் அடிப்படையிலேயே பார்க்க வேண்டும் என்றும் அவர் வலியுறுத்தினார்.
ஆபத்தான சம்பவங்கள் நடந்த பிறகு நடவடிக்கை எடுப்பதை விட, அவை நடப்பதற்கு முன்பே தடுப்பது மிகவும் முக்கியமானது என்றும் மேயர் மேலும் தெரிவித்தார்.
