அமெரிக்காவில் நடைபெற்ற இடைக்காலத் தேர்தலில் ஜனநாயகக் கட்சி பெற்ற மாபெரும் வெற்றியின் எதிரொலியாக, குடியரசுக் கட்சி சந்தித்த பின்னடைவைக் பொருட்படுத்தாமல் அமெரிக்க அதிபர் டொன டிரம்ப் கடுமையான விமர்சனப் பதிலடியைக் கொடுத்துள்ளார்.
வாக்குச் சீட்டில் தனது பெயர் அச்சிடப்பட்டிருந்தால், குடியரசுக் கட்சி ஒரு வரலாற்றுச் சிறப்புமிக்க வெற்றியைப் பெற்றிருக்கும் என்று கூறி அதிபர் டிரம்ப் தனது தோல்விக்கான காரணங்களைச் சமாளிக்க முயன்றுள்ளார்.
தனது ‘டிரூத் சோஷல்’ (Truth Social) சமூக வலைத்தளப் பக்கத்தில் பதிவிட்டுள்ள டிரம்ப், “வாக்குச் சீட்டில் என் பெயர் இல்லை. அப்படி இருந்திருந்தால் நாங்கள் நிச்சயமாக ஒரு மகத்தான வெற்றியைப் பெற்றிருப்போம்! இது குறித்து உங்கள் கவனத்திற்கு நன்றி,” என்று குறிப்பிட்டுள்ளார். இருப்பினும், தேர்தல் பிரச்சாரக் கூட்டங்களின் போது, வாக்காளர்கள் வாக்குச் சீட்டில் தன் பெயர் இருப்பதாக நினைத்து குடியரசுக் கட்சி வேட்பாளர்களுக்கு வாக்களிக்குமாறு டிரம்ப் தொடர்ந்து வலியுறுத்தியிருந்தார் என்பது குறிப்பிடத்தக்கது.
கூடுதலாக மற்றொரு பதிவில், எதிர்காலத்தில் தான் ஒரு ‘அரசியல் விமர்சகராக’ மாறி, குடியரசுக் கட்சி வேட்பாளர்களின் வெற்றி மற்றும் தோல்விகளுக்கான நல்ல மற்றும் கெட்ட காரணங்களை அலசி ஆராய்ந்து கருத்து வெளியிடப் போவதாக அதிபர் குறிப்பிட்டுள்ளார்.
மேலும் தனது கருத்துக்களைத் தொடர்ந்து வெளிப்படுத்தும் வகையில், “VETO” (நிராகரிப்பு அதிகாரம்) எனப் பொறிக்கப்பட்ட தனது புகழ்பெற்ற ‘MAGA’ தொப்பியொன்றின் புகைப்படத்தையும் டிரம்ப் சமூக வலைத்தளத்தில் வெளியிட்டுள்ளார். எதிர்வரும் இரண்டு ஆண்டுகளில் காங்கிரஸ் சபை மூலம் நிறைவேற்றப்படும் சட்டங்களைத் தடுத்து நிறுத்த, தமக்குரிய அதிபரின் மறுப்பு அதிகாரத்தை (Veto Power) கடுமையாகப் பயன்படுத்தப் போவதையே இது குறிப்பதாக ஆய்வாளர்கள் சுட்டிக் காட்டுகின்றனர்.
பிரதிநிதிகள் சபையின் அதிகாரம் ஜனநாயகக் கட்சியினரின் கைக்குச் சென்றுள்ளதால், டிரம்பின் எதிர்கால கொள்கைத் திட்டங்கள் கடுமையான தடைகளைச் சந்திக்க நேரிடும் என்றும், அவர் நிறைவேற்று உத்தரவுகள் மற்றும் மறுப்பு அதிகாரங்களை மட்டுமே நம்பியிருக்க வேண்டியிருக்கும் என்றும் கூறப்படுகிறது.
வெள்ளை மாளிகையின் உள்விவகாரங்களை மேற்கோள்க்காட்டி ‘பாக்ஸ் நியூஸ்’ (Fox News) வெளியிட்டுள்ள செய்தியில், இந்த தேர்தல் முடிவுகள் குறித்து வெள்ளை மாளிகை பீதியடையவில்லை என்று தெரிவிக்கப்பட்டுள்ளது. தேர்தலில் போட்டியிட்ட வேட்பாளர்களின் தனிப்பட்ட பலவீனங்களே இந்தத் தோல்விக்குக் காரணம் என்றும், வேட்பாளர்களை விட அதிபரே அவர்களுக்காக முன்வந்து தீவிரமாகப் பிரச்சாரத்தில் ஈடுபட்டதாகவும் வெள்ளை மாளிகையின் அதிகாரி ஒருவர் கூறியுள்ளார். மேலும், எவ்வாறான முடிவுகள் வந்தாலும் “தீவிர இடதுசாரிகளுக்கு” எதிராக டிரம்ப் நடத்தி வரும் போராட்டம் எக்காலத்திலும் ஓயாது என்றும் அந்த அதிகாரி மேலும் வலியுறுத்தியுள்ளார்.
சி.என்.என் (CNN) தரவு கணிப்புகளின்படி, அமெரிக்கப் பிரதிநிதிகள் சபையின் பெரும்பான்மை பலத்தைக் கைப்பற்றுவதில் ஜனநாயகக் கட்சி வெற்றிகண்டுள்ளது. இந்த வெற்றியின் மூலம், டொன டிரம்ப் தனது பதவிக்காலத்தின் கடைசி இரண்டு ஆண்டுகளில் தனது நிர்வாகத்திற்கு எதிராக விரிவான காங்கிரஸ் விசாரணைகள் மற்றும் கண்காணிப்புகளை முன்னெடுக்கும் அரிய அதிகாரத்தை ஜனநாயகக் கட்சியினர் பெற்றுள்ளனர். மேலும், இந்த வெற்றியின் மூலம் ஜனநாயகக் கட்சியின் தலைவர் ஹக்கீம் ஜெப்ரிஸ் (Hakeem Jeffries) அமெரிக்க வரலாற்றில் பிரதிநிதிகள் சபையின் முதல் கறுப்பின சபாநாயகராகப் பதவியேற்கும் வரலாற்றுச் சிறப்புமிக்க தருணமும் உருவாகியுள்ளது.
