இலங்கை மின்சார சபைக்கு (CEB) ரூ. 38.7 பில்லியன் நட்டம்..

கடந்த இரண்டு ஆண்டுகளில் அதிக நிகர இலாபத்தைப் பதிவு செய்த இலங்கை மின்சார சபை, 2025 ஆம் ஆண்டில் ரூ. 38.74 பில்லியன் பாரிய நிகர நட்டத்தைக் கண்டதாகப் பாராளுமன்றத்தில் வெளிப்படுத்தப்பட்டது.
இலங்கை மின்சார சபை 2023 ஆம் ஆண்டில் ரூ. 57.63 பில்லியனையும், 2024 ஆம் ஆண்டில் ரூ. 141.6 பில்லியனையும் நிகர இலாபமாக ஈட்டியிருந்தது. இருப்பினும், 2025 ஆம் ஆண்டில் மின்சார விற்பனை மூலம் மின்சார சபை ரூ. 422.21 பில்லியன் மொத்த வருவாயை ஈட்டிய போதிலும், அந்த ஆண்டின் மொத்தச் செலவு ரூ. 486.28 பில்லியன் வரை அதிகரித்ததன் காரணமாக இந்தப் பாரிய நட்டம் ஏற்பட்டுள்ளது.
பாராளுமன்ற உறுப்பினர் தயாசிறி ஜயசேகர முன்வைத்த கேள்விக்குப் பதிலளித்த எரிசக்தி அமைச்சர் அனுர கருணாதிலக்க இதனை உறுதிப்படுத்தினார்.
2025 ஜனவரி மாத நிலவரப்படி, ஒரு அலகு மின்சாரத்தை உற்பத்தி செய்வதற்கான சராசரிச் செலவு ரூ. 18.22 ஆக இருந்ததாக அமைச்சர் குறிப்பிட்டார்.
மின் கட்டணங்கள் குறைக்கப்பட்டதையடுத்து மின்சார சபையின் வருவாய் வேகமாகக் குறைந்ததாகவும், 2024 ஆம் ஆண்டுடன் ஒப்பிடும்போது ஏனைய வருமானங்களும் வீழ்ச்சியடைந்துள்ளதாகவும் அமைச்சர் சுட்டிக்காட்டினார்.
2025 ஆம் ஆண்டில் மின்சார விற்பனை அதிகரித்து நிதிச் செலவைக் குறைக்க முடிந்த போதிலும், மின் கட்டணக் குறைப்பு, மின்சாரத்தைக் கொள்முதல் செய்வதற்கான செலவு அதிகரிப்பு மற்றும் கூரைச் சூரியசக்தி (Rooftop Solar) உற்பத்தியாளர்களுக்கு வழங்கப்படும் கொடுப்பனவுகள் அதிகரிப்பு ஆகியவற்றின் முன்னிலையில் அந்த நன்மைகளைத் தாண்டி நட்டம் அதிகரித்துள்ளதாக அவர் மேலும் தெரிவித்தார்.
கடந்த மூன்று ஆண்டுகளில் மின் கட்டணங்கள் பலமுறை திருத்தப்பட்டதையும் அமைச்சர் நினைவு கூர்ந்தார்.
மேலும், 2024 அல்லது 2025 ஆம் ஆண்டுகளில் திறைசேரி மூலம் மின்சார சபைக்கு எவ்வித நிதி ஒதுக்கீடும் வழங்கப்படவில்லை என்றும், இலங்கை பெற்றோலியக் கூட்டுத்தாபனத்திற்குச் செலுத்த வேண்டிய நிலுவைத் தொகையை அடைப்பதற்காக 2023 ஆம் ஆண்டில் மட்டுமே திறைசேரி ரூ. 126.27 பில்லியன் மேலதிக முதலீட்டைச் செய்துள்ளதாகவும் அமைச்சர் கூறினார்.
சமீபகாலமாக மின்சார உற்பத்திக்காக இறக்குமதி செய்யப்பட்ட நிலக்கரித் தொகுதிகளின் தரம் தொடர்பாகவும் பாராளுமன்ற உறுப்பினர் தயாசிறி ஜயசேகர கேள்வி எழுப்பினார். 25 நிலக்கரி கப்பல் தொகுதிகளுக்குக் கட்டளையிடப்பட்ட போதிலும் 19 தொகுதிகள் மட்டுமே கிடைத்துள்ளதாகவும், அவை உரிய தரத்தில் இல்லை எனவும் உறுப்பினர் குற்றம் சாட்டினார். பின்னர் கொண்டுவரப்பட்ட ஐந்து கப்பல்களில் ஒன்றும் தரமற்றதாக இருந்ததாகவும், இதனால் ரூ. 17 பில்லியனுக்கும் அதிகமான நட்டம் ஏற்பட்டுள்ளதாகவும் கூறிய உறுப்பினர், முன்னாள் எரிசக்தி அமைச்சர் ஏற்படுத்திய இந்த நட்டத்தை பொதுமக்களிடமிருந்து அறவிடத் தயாராகிறார்களா எனக் கேள்வி எழுப்பினார்.
இதற்குப் பதிலளித்த அமைச்சர் கருணாதிலக்க, மின்சார சபையின் 2025 ஆம் ஆண்டு நட்டத்திற்குக் காரணம் செலவைப் பிரதிபலிக்கும் விலைச் சூத்திரத்தை விட மின் கட்டணங்கள் குறைந்த மட்டத்தில் இருந்ததே என்றும், நிலக்கரிப் பிரச்சினை 2026 ஆம் ஆண்டிலேயே எழுந்ததால் அது இந்த நட்டத்திற்குப் பொருந்தாது என்றும் தெளிவுபடுத்தினார்.
இருப்பினும், நிலக்கரிப் பிரச்சினையால் ஏற்பட்ட நட்டம் நுகர்வோர் மீது சுமத்தப்படாது என உறுதியளித்த அமைச்சர், அது தொடர்பாக ஏறத்தாழ ரூ. 18 பில்லியன் தொகை ஏற்கனவே தடுத்து வைக்கப்பட்டுள்ளதாகவும், உரிய சட்ட நடவடிக்கைகள் முடிந்த பின்னர் அந்த நட்டத்தை அறவிட நடவடிக்கை எடுக்கப்படும் என்றும் குறிப்பிட்டார்.



