இந்த அரசாங்கம் ஓகே.. சஜித் தரப்போ, அல்லது பொதுஜன பெரமுன தரப்போ ஆட்சிக்கு வந்தால் நாடு பழைய பாதைக்கே சென்று மீண்டும் ஒரு வீழ்ச்சியடையும் – நான் 15 வருடம் அரசியல் கட்சிகளுடன் பயணித்தத அனுபவத்தில் இதனை தெரிவிக்கிறேன்

(க. சிவலிங்கமூர்த்தி)

பீல்ட் மார்ஷல் சரத் பொன்சேகா, தற்போதைய அரசாங்கம் தனது முழுமையான ஐந்தாண்டு காலத்தையும் நிறைவு செய்யவேண்டும் என்பதில் தாம் உறுதியாக இருப்பதாக தெரிவித்துள்ளார். அரசாங்கத்தை கவிழ்க்கும் எந்த முயற்சிக்கும் தாம் ஆதரவு வழங்கப்போவதில்லை என்றும் அவர் குறிப்பிட்டுள்ளார்.

தற்போதைய அரசியல் நிலைமைகள் குறித்து கருத்து தெரிவிக்கும் போதே அவர் இவ்வாறு கூறினார்.

அவர் கூறியதாவது:

தற்போதைய அரசாங்கம் கவிழ்க்கப்பட்டால், மீண்டும் பழைய அரசியல் சக்திகளே—சஜித் பிரேமதாச தலைமையிலான எதிர்க்கட்சித் தரப்போ அல்லது பொதுஜன பெரமுன தரப்போ—ஆட்சிக்கு வர வாய்ப்பு உள்ளது என்று அவர் குறிப்பிட்டார். இவர்கள் மீண்டும் ஒன்றிணைந்து ஆட்சிக்கு வந்தால் நாடு மீண்டும் பழைய பாதைக்கே செல்லும் என்றும், அது மீண்டும் ஒரு வீழ்ச்சியான நிலையை உருவாக்கும் என்றும் அவர் எச்சரித்தார்.

கடந்த 15 ஆண்டுகள் தாம் இந்த அரசியல் கட்சிகளுடன் பயணித்ததாகவும், அந்த அனுபவத்தின் மூலம் அவர்களின் உண்மை நிலை, திறன் மற்றும் நேர்மை குறித்து தெளிவாகப் புரிந்துகொண்டதாகவும் அவர் கூறினார். அந்த புரிதலின் அடிப்படையிலேயே தாம் அந்தக் கட்சிகளில் இருந்து விலகியதாகவும், ஜனாதிபதித் தேர்தலுக்கு முன்பே மக்களுக்கு உண்மைகளை எடுத்துரைத்ததாகவும் அவர் தெரிவித்தார்.

அதன் விளைவாக மக்கள் பழைய அரசியல் சக்திகளை நிராகரித்து, புதிய அரசியல் பயணத்திற்காக தற்போதைய தரப்புக்கு ஆணை வழங்கியதாகவும் அவர் கூறினார்.

தற்போதைய அரசாங்கத்தில் குறைபாடுகள் இருப்பதை அவர் மறுக்கவில்லை. மக்கள் எதிர்பார்த்த அனைத்தும் இன்னும் நிறைவேறவில்லை என்பதையும் அவர் ஒப்புக்கொண்டார். எனினும், முந்தைய அரசாங்கங்களுடன் ஒப்பிடுகையில் தற்போதைய ஆட்சியாளர்களிடம் ஊழலுக்கு எதிரான நேர்மையான நோக்கம் இருப்பதாகவும், அரச வளங்களைப் பாதுகாக்கும் எண்ணம் இருப்பதாகவும் அவர் தெரிவித்தார்.

முன்னாள் ஜனாதிபதி ரணில் விக்ரமசிங்க குறித்து கருத்து தெரிவித்த அவர், அவர் பதவியேற்ற காலத்தில் ஊழலுக்கு எதிராக கடுமையான சட்ட நடவடிக்கை எடுக்க ஒரு சிறந்த வாய்ப்பு இருந்ததாக கூறினார். ராஜபக்ஷ அரசாங்கத்தில் இடம்பெற்ற ஊழல்களுக்கு எதிராக உரிய நடவடிக்கை எடுத்திருந்தால் நிலைமை வேறாக இருந்திருக்கும் என்றும், ஆனால் அந்த வாய்ப்பை அவர் பயன்படுத்தத் தவறியதால் மக்கள் அவரை நிராகரித்ததாகவும் அவர் தெரிவித்தார்.

இறுதியாக, தற்போதைய அரசாங்கம் தனது ஐந்தாண்டு காலத்தில் முழுமையான வெற்றியை பெறத் தவறினால், ஊழலற்ற மற்றும் நாட்டை நேசிக்கும் புதிய தலைமை உருவாக வேண்டும் என்றும் அவர் வலியுறுத்தினார். ஆனால் எந்த சூழ்நிலையிலும் பழைய அரசியல் குழுக்கள் மீண்டும் ஆட்சிக்கு வரக்கூடாது என்றும், அவ்வாறு நடந்தால் நாடு மீண்டும் வீழ்ச்சியடையும் அபாயம் உள்ளதாகவும் அவர் எச்சரித்தார்.

எனவே, அந்த பழைய அழிவுக்குரிய அரசியல் சக்திகள் மீண்டும் ஆட்சிக்கு வருவதைத் தடுப்பதே தற்போதைய காலத்தின் மிக முக்கியமான முன்னுரிமை என பீல்ட் மார்ஷல் சரத் பொன்சேகா தெரிவித்துள்ளார்